Өңірлік коммуникациялар қызметінде брифинг өткізген Павлодар облысының ауыл шаруашылығы басқармасы басшысының міндетін атқарушы Марат Шұғаев агроөнеркәсіптік кешенді дамыту бағытында аймағымызда бірқатар маңызды бастамалардың қолға алынғанын жеткізді. Атап айтсақ, Павлодар облысының әкімі Болат Бақауовтың тапсырмасына сәйкес, алдағы екі-үш жылда әрбір ауданда кем дегенде бір тауарлы сүт фермасын құру жоспарланған.

- Бүгінде тауарлы сүт фермаларын салу және модернизациялау бойынша жұмыстар жүргізілуде. Бұл, әсіресе, өсімдік шаруашылығы ерекше дамыған аудандарға қатысты болып отыр. Аталған бағытта 20 инвестормен келіссөздер жүргізілуде. Олар сүт өндірісін дамытуға ниеттеніп отыр. Сол арқылы әрбір аудан тұрғындарын жергілікті сүт өнімдерімен қамту мақсаты тұр, - дейді М.Шұғаев.

Сондай-ақ, облыстық ведомство басшысы ауылшаруашылық кооперативтеріне қатысты көзқарас өзгергенін атап өтті. Оның сөзіне сүйенсек, бұдан былай кооперативтердің санына емес, жұмысының сапасына мән берілмек.

- Жасыратыны жоқ, бұған дейін «ауылшаруашылық кооперативтерін құрамыз» деп сан қуып кеттік. Өкінішке қарай, бұған дейін құрылғандардың ішінде 30 кооператив мүлде жұмыс істемейтіні анықталды. Олар тек қағаз жүзінде ғана тіркелген. Алдағы уақытта осы олқылықтардың орнын толтыруға тырысамыз, - деді Марат Рашитұлы.

Сондай-ақ, М.Шұғаев шаруашылықтарға субсидия беру талаптарының да қайта қаралуы мүмкін екенін атап өтті. Себебі бұған дейін мемлекет тарапынан берілетін қолдау қаржысын өтініш берген ірілі-ұсақты ауыл шаруашылығы құрылымдарының барлығы алып келген. Сондықтан алдағы уақытта субсидияны кәсібін енді бастаған шаруа қожалықтарына ғана беру ұсынылып отыр. Сол арқылы оларды демеу көзделген. Ал аяғында нық тұрған ірі шаруашылықтарға субсидияның орнына жеңілдетілген пайызбен несие беру қажет, деп есептейді М.Шұғаев.

Атап өтерлігі, былтыр аймағымызда жалпы құны 13,9 млрд. теңге болатын 53 инвестициялық жоба жүзеге асырылды. Нәтижесінде 508 жаңа жұмыс орны ашылды. М.Шұғаевтың айтуынша, облысымыз жалпы ішкі өнімнің нақты көлем индексі бойынша Алматы және Маңғыстау облыстарынан кейін үшінші орында. 2017 жылы жалпы ішкі өнім 196, 4 млрд. теңгені құраған. Жалпы, өткен жылы аймағымыздың ауыл шаруашылығын қолдауға 16,2 млрд. теңге көлемінде қаражат бөлінген. Биыл бұл салаға 11,2 млрд. теңге бағытталмақ.

Данияр ЖҰМАДІЛ

saryarka-samaly.kz