Өңірлік коммуникациялар қызметінде өткен брифинг барысында Павлодар облысының кәсіпкерлер палатасының кәсіпкерлер құқығын қорғау және әкімшілік кедергілерді төмендету бөлімінің басшысы Сейфолла Қасымханов жергілікті билік пен бизнес арасындағы байланысқа тоқталды. Айтуынша, кейбір мемлекеттік мекемелер жеке кәсіпкерлерге тауарлар мен қызметтердің сатып алу ақысын төлеуге асықпайды. Енді бірі мемлекеттік конкурссыз келісімшарт жасайды.

- Соның салдарынан шағын бизнес зардап шегеді. Ал кәсіпкерлерге осындай қиындықтар тудырған мемлекеттік мекемелер жауапқа тартылмайды. Осы жайтты ескеріп, белгіленген процедураларды орындамаған мекемелерге шара қолдану жөнінде ұсыныс жасалды, - дейді С.Қасымханов.

Сонымен қатар, бизнес өкілдерін жер телімдері, салық төлеу мәселелері алаңдататын көрінеді. Кәсіпкерлер палатасының бірінші санаттағы сарапшысы Мүбәрак Жақыповтың айтуынша, өткен жылы кәсіпкерлерден 220 өтініш түскен.

- Көп жағдайда жер телімін ресімдеу, оны пайдалану құқығын ұзартуға қатысты шағымданады. Біз мүмкіндігінше көмек көрсетіп, кеңес береміз. Айталық, былтыр түскен 220 өтініштің тең жартысы оң шешімін тапты. Палата сарапшылары 73 сот процесіне қатысып, жалпы сомасы 297 млн. теңге болатын кәсіпкерлер құқығын қорғады. Ал қалған 110 өтініш негізсіз болғандықтан қайтарылды. Бұл ретте кәсіпкерлердің өзі заң талаптарын жіті білмейтіні байқалды, - дейді М.Жақыпов.

Осы орайда Кәсіпкерлер палатасының өкілдері алдағы уақытта жерге қатысты мәселелер саны азаяды деп пайымдайды. Себебі биыл облыс тұрғындарына қолжетімді геоақпараттық жүйе қолданысқа енгізілмек. Яғни, жер телімдерін алу мен инженерлік желілерге қосылу бойынша қызметтер электронды форматқа көшіріледі.

 

Құндыз ҚАБЫЛДЕНОВА

saryarka-samaly.kz