«Қазпошта» АҚ облыстық филиалының директоры Ерік Әліпұлының айтуынша, бүгінде облыстағы 24 мыңға жуық зейнеткерге қызмет көрсетіледі. Шамамен 7 мың адам зейнетақыны «Қазпошта» карталары арқылы алса, 5 мыңға жуық зейнеткерге бөлімше қызметкерлері үйге дейін апарып береді. Олардың қатарында Павлодар қаласында тұратын 800-ден астам қарт бар.

- Соңғы жағдайларға байланысты тұрғындардың, әсіресе егде тартқан адамдардың үйден шықпай, барлық қызметті алуы үшін тиісті жағдайлар жасалуда. Біздің бөлімше қызметкерлері де соңғы бірнеше күн бойы зейнеткерлерге қоңырау шалып, зейнетақыны поштаға келмей алудың жолдарын ұсынып жатыр.

Біріншісі – «Қазпошта» картасын ашу. Ол үшін зейнетақы алушының жеке деректері болса жеткілікті. Біздің қызметкерлер 5-7 минут аралығында дайындап береді. Кейін сол карта арқылы поштаның немесе «Halyk Bank» банкінің банкоматтарынан кез келген уақытта ақшасын комиссиясыз ала алады. Екінші жолы – зейнетақыны үйге дейін апару. Яғни, клиенттің жеке шотына тиісті сома түскен күні атаған мекенжайына жеткізіп береміз. Мұндай ұсыныстарға түсіністікпен қарап жатқандары да, бас тартып, бұрынғы әдетше бөлімшеден келіп алуды құп көретіндер де бар, - дейді Е.Әліпұлы.

Сонымен қатар, Ерік Әліпұлы тұрғындардың зейнетақысын үйге дейін жеткізу еш қиындық тудырмайтынын айтты. Оған қажет құралдар, мүмкіндіктер мен қалыптасқан технология бар, деді ол. Зейнетақы жеткізумен айналысатын мамандардың қауіпсіздігі үшін арнайы көлік пен күзет қарастырылады.

 

Құндыз ҚАБЫЛДЕНОВА

saryarka-samaly.kz