Өңірде еріктілер қозғалысы қарқынды дамып келе жатқаны күн сайын айтылып келеді. Елдегі кез келген жағдайда алдыңғы шепте бой көрсетіп, халықтың қуаныш-қайғысын тең көтеретін жүрегі кең жастар саны артқаны қуантады. Мәселен, еріктілер қатарына қосылу үшін адамның мүмкіндігінен бұрын, жүрегіндегі мейірім мен еліне деген махаббаты болса жеткілікті. Бұл - «Әлеуеттік волонтерлік орталығының» мүшесі Әлішер Бекжанның пікірі.

- Волонтерлік қызметімді 2016 жылы бастадым. Сол жылы облыс орталығындағы «Самал» оңалту орталығында жұмыс істеп жүрген едім. Әлі есімде, жаз мезгілі болатын, аталмыш орталыққа еріктілердің бір тобы келді. Олар халықаралық ЭКСПО-2017 көрмесіне волонтерлер іріктеліп жатқанын айтты. Дәл осы сәтте еріктілер қатарына қосылып, қоғамға өз пайдамды тигізгім келді. Осылайша, волонтерлер орталығына тап болдым. Бүгінде еріктілік өмірімнің ажырамас бөлігіне айналды. Бұл қызметсіз күндерімді елестете алмайтын сияқтымын, - дейді Ә.Бекжан.

Әлішер Инновациялық Еуразия университетін психолог мамандығы бойынша тәмамдаған. Әлеуметтік бағытты таңдағаны да сондықтан болар. Оның өміріне үлкен өзгеріс алып келген шараның бірі халықаралық мамандандырылған ЭКСПО-2017 көрмесінде мәдени шараларда еріктілер қатарына қабылдануы еді. Сонымен қатар, Мәскеуде өткен «Ерікті – 2017» бүкілресейлік форумға еліміздің атынан қатысып келген жастың бірі. Сол шарада ТМД елдері кеңістігінде еріктілік қозғалысына қосқан үлесі үшін арнайы марапатқа ие болса, сол жылы «Қазақстанның үздік волонтері» атанды.

- Биылғы жылы «Еріктілер жылы» болып жарияланғандықтан, атқарып жүрген жұмысымыздың ауқымын кеңейттік. Біздің ұйым қарттар мен балалар үйіне, сонымен қатар, Ұлы Отан соғысының ардагерлері мен тыл еңбеккерлеріне қамқорлық жасауды бірінші орынға қойып келеді. Айналамыздағы жастарды мейрімді болуға, көмекке мұқтаж адамдарға саусақ шошайтып қарамай, көмек көрсетуге шақыруды мақсат етеміз. Сол себепті, еріктілік жолға жастарды көптеп тартқымыз келеді, - дейді ол.

Екі жыл қатарынан «Үздік волонтер» атанған ол бұл жеңісін өзінің командасының ортақ жемісі деп санайды. Ерікті осы күнге дейін ардагерлерге көмек көрсету аясында 100-ден астам волонтерлік рейдке қатысып, белсенді азаматтық позициясын дәлелдей білген. Мүмкіндігі шектеулі азаматтармен қарым-қатынас орнатып, балалар үйінің тәрбиеленушілерін ас әзірлеу, үй тұрмысындағы негізгі дағдыларға үйретуде белсенділік танытқан.

- Облыс орталығындағы психоневрологиялық ауытқулары бар азаматтарға арналған «Альрами» клубтық үйі бар. Біз осында жиі келеміз. Оларға шығармашылық терапия арқылы, яғни сурет салу арқылы көмек көрсетеміз. Мүмкіндігі шектеулі немесе ақыл-есінде ауытқуы бар адамдармен жұмыс жасау үлкен шеберлікті талап етеді. Олардың жанын жаралап алмай сөйлесу, ойындағысын айтқызу, қалағанын жасауға жол ашу үшін кез келген адамға мейірімді жүрек пен сабыр қажет. Онсыз да адамзат баласында бір-біріне деген мейірім азайып кеткен шақта, осы асыл қасиетті өз замандастарымызға ұғындыра білсек, біздің жетістігіміз де сол болмақ, - дейді волонтер.

Былтыр Павлодар облысындағы үздік 30 ерікті тобына қосылған Әлішер бүгінде волонтерлік қозғалысты әлеуметтік желілер арқылы насихаттауды қолға алған. Сондай-ақ ол былтыр Birlik форумында «Әлеуметтік волонтер» аталымы бойынша бірінші орынға ие болғаны тағы бар.

- Менің өмірімнің әр сәті ерекшеліктерге толы.  Соның бірі былтыр «Жастар жылының» жабылуына орай Мемлекет басшысы Қасым-Жомарт Тоқаевтың қолынан Алғыс хатпен марапатталып, кеудеме «Алтын Барыс» төсбелгісін таққан кезім болды. Бұл - менің өмірімнің ең жарқын сәттері, - деді Әлішер.

Атқарған ісімен қатарластарына үлгі болып жүрген Әлішер белсенділердің көшін бастап келеді. Оған осы биігіңнен түспе дейміз!

 

Қарлығаш ХАШЫМҚЫЗЫ

saryarka-samaly.kz