Биылғы меже

Бұл мәселе облыс әкімі Әбілқайыр Сқақовтың қатысуымен өткен  ауқымды жиын барысында талқыланды.

Өңір басшысының тапсырмасынан кейін облыстық құрылыс басқармасының басшысы Бақытжан Әлімғазинов есеп берді. Оның айтуынша, биыл аймағымызда жалпы аумағы 346 мың шаршы метр баспана салу жоспарлануда. Ағымдағы жылы 48 көпқабатты тұрғын үй пайдалануға берілмек. Атап айтқанда, «Сарыарқа» және «Достық» шағын аудандарында құрылыс жұмыстары атқарылуда.

- Биыл  тұрғын үй құрылысына 38,2 миллиард теңге бөлінген. Бұл қаражат 2019 жылмен салыстырғанда 2,5 есеге артық. «Нұрлы жер» бағдарламасы бойынша үй салу ісіне 15,1 млрд. теңге бөлінсе, «Еңбек» бағдарла-масы арқылы қоныс аударғандарды жаңа баспанамен қамту үшін 3,7 млрд. теңге қарастырылған. «Жұмыспен қамтудың жол картасы» аясында 2020-2021 жылдары баспана салу және тұрғын үйлерді жөндеу жұмыстарына 9,8 миллиард теңге бөлінді. 2020 жылы аймағымызда 48 көпқабатты үйді салу және қайта қалпына келтіру жоспарланған. «Жұмыспен қамтудың жол картасы» бойынша аудандарда 24 пәтерлі 5 үй тұрғызылады. Сондай-ақ қалалар мен аудандарда «Еңбек» бағдарламасы бойынша өзге өңірлерден көшіп келетіндерге 431 пәтер сатып алынады, - деді Бақытжан Әлімғазинов.

Ескі аудандар - жаңа мүмкіндіктер

Жиында сүрілмеген ескі үйлердің мәселесі де сөз болды. Қазір облыс орталығындағы «Сарыарқа» шағын ауданында ескі үйде тұрып жатқан 12 адам қалды. Бұл жағдайға баспана иелерінің құжаттары түгел болмай отырғаны себеп. Яғни, тұрғындар үйдің өздерінікі екенін дәлелдей алмауда. Осы орайда, Әбілқайыр Сқақов құрылыс жұмыстарына бөгет болатын мәселелерді шешуді тапсырып, жаңа шағын аудандардың  халыққа жайлы болу керектігін ескертті.

- «Сарыарқа» шағын ауданын-дағы ескі үйлерді сүру мәселесін сот арқылы болса да шешу қажет. Жаңадан бой көтеріп келе жатқан «Достық» шағын ауданының жағдайын қарастыру керек. Біздің басты мақсатымыз - халық үшін ыңғайлы болатын толыққанды шағын аудан құру, инфрақұрылымды дамыту. Әсіресе, мектеп, балабақша, медициналық ұйымдар қолжетімді болуы шарт. Оны салу үшін  тек бюджет қана емес, жеке инвестицияны да тартуымыз тиіс. Өйткені бюджеттік жүктемені азайту біздің стратегиялық міндеттеріміздің бірі болып табылады, - деді Ә.Сқақов.

Облыс орталығында Затон шағын ауданында 22 ескі үйдің орнына 900-ге жуық пәтер салынатын болады. Құрылыс жұмыстары кезінде «Сарыарқа» шағын ауданында жүргізілген тәжірибе ескерілмек. Павлодар қаласының әкімі Қайрат Нүкеновтің сөзіне сүйенсек, Затон шағын ауданындағы 22 ескі үйде 176 пәтер бар.

- Тұрғындардың басым бөлігі ескі үйлерін сүруге келісіп, уақытша көшуге дайын. Аталмыш орында 11 жаңа үй тұрғызылып, 900-ге жуық пәтер пайда болады. Қазіргі уақытта шағын ауданның жобалық-сметалық құжаты әзірленуде. Шілде айының соңына дейін сараптамадан өтеді, - деді Қ.Нүкенов.

Облыс әкімі Затон шағын ауданындағы құрылыс барысында «Сарыарқа» шағын ауданында жіберілген қателіктерге бой алдырмауды тапсырды. Ол «Сарыарқадағы» ескі үйлерді сүру бағытындағы жұмыстар 4 жылдан бері жүргізіліп келетінін айтты. Сондықтан тәжірибе жинайтын уақыттың болғанын жеткізді. Құрылыс басқармасына заңгер-лердің көмегі арқылы барлық келісімшартты қарастырып шығуды жүктеді. 

Болашақта Павлодарда тозығы жеткен үйлердің учаскелерінде құрылыс жұмыстары қарқын алмақ. Мұндай ауқымды іс Толстой, Иса Байзақов, Бекмаханов (Киров)және Павлов көшесінің қиылысы, темір жол вокзалының аумағында жүргізілмек. Бұл жобалар «Сарыарқа» шағын ауданы толық пайдалануға беріліп, «Достық» шағын ауданының бірінші кезегі аяқталғаннан кейін қолға алынбақ.

Жоспарлау – стратегия негізі

Аймақ басшысы тұрғын үй салудағы жоспарды құрылыс саласының өкілдерімен талқы-лауды тапсырды. Бұл ретте құрылысқа қажетті заттарды өндіретін кәсіпорындардың дайын-дығын да пысықтаған жөн. Құрылыс индустриясының жоспарлы жүзеге асырудағы дайындығын ескеру қажет.

- Өндірушілердің қауқарын білу керек. Олар қажетті көлемді қамтамасыз етуге дайын ба? Кәсіпорындарды аралап, олардың жағдайын білу керек. Құрылысшылардың несие алып, жаңа технологияларды игеруіне мүмкіндік берейік, - деді Ә.Сқақов.

Өңір басшысы жаңа үйлерді жобалаудағы дайындықты пысық-тады. Бұл ретте Екібастұздағы жағдайды мысалға келтірді. Кеншілер шаһарындағы көп- қабатты тұрғын үйлердің жобалары «Жұмыспен қамтудың жол картасы» бағдарламасы арқылы іске аспақ.

- Жобалық-сметалық құжат-тарды жасауда уақыт пен бюджет қаражатын ысырап етпес үшін жобаларды барынша пайдалану қажет. Спорт кешендерінің, оқу орындарының, мәдени ошақтар мен тұрғын үйлердің ең үздік жобасын алған дұрыс. Бұл арқылы уақытты қысқарта аламыз, - деді Ә.Сқақов.

Қашан қоныстанады?

Жиын барысында облыс әкімі әуежай қалашығындағы үйлерге тұрғындарды қоныстандыру мәсе-лесін де қозғады. Қайрат Нүкенов аталмыш орындағы құрылыстың аяқталуға жақын, алайда қоныс-тануға ниет білдірушілердің саны аз екенін айтты.

- Әуежай қалашығындағы 55 үйдің құрылысы аяқталуда. Тұрғындарға баспананы түрлі бағдарлама арқылы сатып алуды ұсындық. Жалпы саны 30 адам өтініш беріп, 8-і ғана төлем қабілетін растады, - деді Қ.Нүкенов.

Облыс әкімі әуежай қалашы-ғындағы құрылыс жұмыстарын жүргізген кезде қателік жіберілгенін айтты. Өйткені аталмыш орын қала орталығынан алыс, жылу жүйе-сімен қамтылмаған. Инфрақұрылым дамымаған.

- Құрылысты бастамас бұрын үйлерді сату мәселесі қиынға соғатынын ескеру керек еді. Павлодардың қысы суық. Адамдар қомақты қаражатқа сатып  алған үйіне кіргенде жылыту жүйесі болмағаны дұрыс емес. Мәселені шешу керек, - деді  Ә.Сқақов.

Аймақ басшысы бұл бағыттағы ұсыныстарды қарастыруға 2 апта берді. Құрылыс жұмыстары кезінде сапаға ерекше мән беру керектігін жүктеді. Тұрғын үй құрылы-сының жаңа стратегиясының басты мақсаты - мұқтаж жандарды баспанамен қамтамасыз ету екендігін алға тартты.

Отырысты қорытындылаған аймақ басшысы әлемді жаулаған коронавирусты болдырмау мәсе-лесіне тоқталды. Індеттің таралмауына жол бермеу үшін санитарлық талапты қатаң сақтау керектігін атап өтті.

- Облыс тұрғындары сани-тарлық дәрігердің қаулысындағы ережелерді ескеруі тиіс. Әсіресе, балаларды коронавирустан сақта-уымыз керек. Адам жинауды қажет ететін акциялар кезінде сақтық шараларын ескерген жөн. COVID-19-бен 3 ай бойы күресіп келеміз. Тәжірибеміз бар. Соны жетілдіру арқылы індетті жеңуіміз қажет. Басқарма басшылары бұл мәселені бақылауда ұстауы керек, - деді Ә.Сқақов.

Бұдан бөлек, құрылысқа қажетті заттарды өндіретін кәсіпорындардың дайындығын да пысықтаған жөн. Құрылыс индустриясының жоспарды жүзеге асырудағы дайындығын ескеру қажет. Өндірушілердің қауқарын білу керек. Құрылысшылардың несие алып, жаңа технологияларды игеруіне мүмкіндік берейік, - деді Ә.Сқақов.

 

Айдана ҚУАНЫШЕВА

saryarka-samaly.kz