«Ұрпақтан - ұрпаққа»

Облыстық С.Торайғыров атындағы ғылыми-әмбебап кітапханасында «Ұрпақтан - ұрпаққа» атты виртуалды кітап көрмесі өтуде. Мұнда тарихтан сыр шертетін көне кітаптардың негізгі мазмұны бірге берілген.

Павлодарлықтар пандемия салдарынан енгізілген карантиннің әсерінен ауқымды шараларды, айтулы мереке-лерді, тіпті, осындай көрмелерді де онлайн тамашалауға үйренді. Кітапхана-
ның инстаграм парақшасында оқырманға жол тартқан виртуалды кітап көрмесін тамашалағандар саны күн өткен сайын артып келеді. Бұл да жерлестеріміздің виртуалды өмірге үйрене бастағанын аңғартса керек. Көрмеге қойылған кітаптар қатарында Әбіш Кекілбаевтың «Плеяды – созвездие надежды» романы бар. Онда Қазақстанның Ресейге қосылуының тарихи үрдісі баяндалады.

- Виртуалды көрмеде Бердібек Соқпақбаевтың атақты «Чемпион» повесі бар. Бұл - қарапайым дене шынықтыру мұғалімінің жастарды боксқа шақырып, спортқа деген сүйіспеншілігін оята алғанын тамаша суреттейтін туынды. Оның жарық көргеніне 70 жыл болады. Сонымен қатар, жарық көргеніне 45 жыл толып отырған Қалижан Бекқожиннің «Таңдаулылар» өлеңдер жинағы бар. Мұнда автордың өмірі, туған жер, уақыт және өзі жайлы ой толғаныстарын көруге болады. Жалпы, көрмеге қойылған әр кітаптың тарихы тереңде. Оны бүгінгі жас буын білмеуі де мүмкін. Сондықтан жастарға біздің кітап қорымызда да осындай құнды дүниелердің барын ескертіп, кітап оқуға шақырамыз, - дейді кітапхана басшысы Шолпан Шахметова. Виртуалды көрмеден – Тахауи Ахтановтың 55 жыл бұрын жарық көрген «Боран» романын да көруге болады. Шығармадан біздің заманымыздың ең өзекті мәселелерін байқайсыз. Мәселен, туындының басты кейіпкері Қоспанның өмірде кездескен қиындықтарды, басына түскен сынақтарды жеңіп, жарқын мұраттарға деген сенімін өшірмеуі кез келген адамға жігер беретіні сөзсіз. Ал Ілияс Есенберлиннің «Көшпенділер» романы хроникасының қазақ халқы үшін орны ерекше екені белгілі. Сонымен қатар, Сәбит Мұқановтың «Ботагөз», Әзілхан Нұршайықовтың «Ақиқат пен Аңыз» романдары бар. Кітапхана ұжымы алдағы уақытта да дәл осындай мазмұндағы виртуалды кітап көрмесін жалғастыра бермек.

Қ.МҮСӘЙІП.

Количество показов: 135

Возврат к списку

Сарыарқа самалы, 13 сәуір, сейсенбі

Раздел не найден.