Төлем мөлшері көбейді

Биыл облыс орталығында тұратын Ұлы Отан соғысының ардагерлеріне Жеңіс күні қарсаңында 1 млн. теңге көлемінде бірреттік төлем беріледі. Ал Ауған соғысы, Таулы Қарабақтағы қақтығыс ардагерлеріне 75 мың теңгеден үлестірілетін болды.

Павлодар қалалық мәслихатының ІІ сессиясы кезінде осы және өзге де мәселелер қаралды. Қалалық жұмыспен қамтуды үйлестіру және әлеуметтік бағдарламалар бөлімінің басшысы Гүлбарам Белялова Ұлы Отан соғысы ардагерлеріне берілетін төлем 500 мың теңгеден 1 млн. теңгеге, халықаралық келісімшарттар негізінде Ауған соғысына, тәжік-ауған шекарасында, Таулы Қарабақта болған қақтығысқа қатысушыларға төленетін ақы көлемі 50 мың теңгеден 75 мың теңгеге дейін көбейетінін хабарлады. Павлодар қалалық экономика және бюджеттік жоспарлау бөлімінің басшысы Қанат Қапуовтың айтуынша, қазына шамамен 12 млн. теңгеге толықты. Сөйтіп, бюджеттегі қаржының жалпы көлемі 112 млрд. 12 млн. теңгені құрады. Қосымша құйылған қаражат бірқатар әлеуметтік-экономикалық жобаларды жүзеге асыруға жұмсалмақ. Олардың қатарында мәдениет, спорт нысандарын жөндеу мен жабдықтау, 12 жол учаскесін жөндеу, Мойылды, Кенжекөл ауылдарында дене шынықтыру-сауықтыру кешендерін салу және тағы басқалары бар. Бұл ретте Павлодар қаласының әкімі Ержан Иманслям депутаттардан нақтыланған бюджетті қолдауды сұрады.

- Бүгінгі күні қала мен оған қарасты ауылдық аймақтардағы қордаланған мәселелерді шешіп, ауқымды істерді қолға алу үшін қаржы ауадай қажет. Мәселен, Сарыарқа, Достық шағын аудандарындағы тұрғын үйлердің құрылысы, оларға инженерлік желілерді тартуда қиындықтар бар. Сондықтан бюджеттен тиісті қаржыны қарастыруды сұраймыз, - деді Е.Иманслям.

Мәслихат депутаттары бюджетке енгізілген өзгерістерді мақұлдады. Демек, жоғарыда аталған жобалардың жүзеге асуына қажет қаржы бағытталады. Сонымен қатар, сессия барысында Павлодар қалалық қаржы бөлімінің басшысы Алтынай Бектасова баспаналы болуға мүмкіндік беретін мемлекеттік бағдарламалар туралы атап өтті. Былтыр «Бақытты отбасы» бағдарламасы аясында 37 көпбалалы, 92 толық емес және мүмкіндігі шектеулі баланы тәрбиелеп отырған 18 отбасы көптен күткен пәтер кілттерін қолға алған екен. Биыл мемлекеттің қаржылай қолдауы арқылы жеңіл-детілген ипотекалық несиені 120-дан астам отбасы ала алады. Ол үшін қазынадан 123 млн. теңге қарастырылды.

Құндыз ҚАБЫЛДЕНОВА.

Количество показов: 114

Возврат к списку

Сарыарқа самалы, 13 сәуір, сейсенбі

Раздел не найден.