«Әр таңды Әнұранмен бастайтынбыз...»

Қазақ күресі мен белбеу күресінен республикалық және халықаралық деңгейде өңіріміздің атын танытып жүрген Омар Гауһардың жетістіктері - бір төбе. Балуан қыз Павлодар педагогикалық университетінің дене шынықтыру және спорт мамандығының 3 курсында оқиды. Жуықта спортшы қызбен тілдесудің орайы келді.

- Гауһар, спортқа келуге не түрткі болды?

- Спорт әлеміне бастауыш сыныптан бері келгенмін. Бастапқы кезде баскетбол, волейбол ойындарына ерекше құмарттым. Күреске қызығушылығымның бірден-бір себепкері әкем деп ойлаймын. Себебі, ол - күрестен жаттықтырушы. Алғашқыда рингке шыққан боксшыларды көріп, оларға қызыға қарайтынмын. Бірақ, ата-анам қарсы болып, әкем: «Күресті алдымен көр, ұнамай жатса, қалаған спортыңа барарсың» деді. Бірер ай күреспен айналысып, тастап кететін шығармын деп те ойладым. Боз кілемге шыққан сайын жекпе-жектің әртүрлі эмоцияларын бастан кешіреді екенсің.

- Алаңнан бөлек көшеде өз күшіңізді қолданған кезіңіз болды ма? Білуімше, спорт шеберінің кандидаттарына қатаң тыйым салынған бұл тұрғыда...

- Иә. Мектеп қабырғасында оқып жүріп, балалықпен әдейі қыр көрсеткендерге шыдамай, эмоцияға ерік бере жаздаған кездерім болды, оны жасырмаймын. Себепсіз қол жұмсайтын жағдайлар болған емес. Ағаттыққа жол бермеуге мейілінше тырысасың.

- Соңғы кезде қандай жарыстарға қатыстыңыз?

- Белгілі бір себептерге байланысты бір-екі жылда менде дұрыс оқу-жаттығулары болған жоқ. Қазіргі шығып жүрген жарыстарыма тыңғылықты дайындалуға тырысып жүрмін. Жарысқа барған кезде жарақат алып, денсаулығыңа зақым келетін сәттер де жоқ емес. Спорт болғаннан кейін ауыртпалығы мен қызығы қатар жүрді. Соңғы барғаным - Шымкент қаласында өткен республикалық белбеу күресінен өткен турнир. Жарыста ауыр жарақат алып қалдым. Маған белбеу күресінен әлем чемпионатына жолдама берді. Асқан қиыншылықпен келген бұл сәт жүрекке тебіреніс сыйлады. Жалпы, жарысқа дайындық кезінде қиыншылықта жарақат алып қалған сәттер болады. Айтпағым, қанша жарақат алып, жаның қиналып жатса да, оған шыдай біліп, соңына дейін өз-өзіңмен күресіп, төтеп беру. Негізгі мақсатым - күрес және белбеу күресінен спорт шебері дәрежесін иелену. Әкеме Қазақстан Республикасының еңбек сіңірген жаттықтырушы беделді атағын алып бергім келеді. 2019 жылы Шымкент қаласы Кентау өңірінде 2002-2004 жасөспірімдер арасында белбеу күресінен өткен Қазақстан Чемпионатында 1-орын, 2019 жылы Өзбекстан Республикасы Ташкент қаласы Алмалықта Әлем чемпионатында белбеу күресінен 3-орын, 2022 жылы белбеу күресінен Шымкент қаласында 23 жаска дейінгі жастар арасында өткен Қазақстан чемпионатында 3-орын иелендім. Павлодар қаласында өткен 2002-2004 жылы туған жастар арасында Төлеутай Қанаевты еске алуға арналған қазақ күресінен республикалық турнирде I орын, қазақ күресінен Павлодар қаласында 23 жасқа дейін жастар арасында Кемер Әшімбетовті еске алуға арналған республикалық турнирде I орын. Орал қаласында өткен Қазақ күрнесінен жоғары оқу орнының студенттері арасында республикалық лиганың арнайы жүлдесімен марапатталдым. 2002-2004 жылдар арасында Тараз қаласында өткен белбеу күресінің Қазақстан чемпионатында II орын алып, қазан айында өтетін Әлем Чемпионатына жолдама алдым.

- Қиналған сәтте спортты тастап кету жайлы ой болмады ма?

- Иә, ондай ойлар кейде болады. Дегенмен 1-2 ай жарысқа шықпасаң, бозкілемді кәдімгідей сағынасың. Тіпті, жаттығу жұмыстары жасалмаса да солай. Соны аңсап тұрып, бар ойың артта қалып, барлығын ұмытып кетесің. Спорт сол жағымен де ерекше.

- Спорт пен оқуды қатар алып жүру қиындық тудырмай ма?

- Онлайн оқытудың жақсы жақтары болды. Тыңғылықты дайындық пен еңбек жасалды. Оқу мен білім алуға құлшынысы бар адам барлы-ғына бірдей үлгеруге тырысады деп ойлаймын. Қазіргі кезде жарысқа барар кезде оқу басшылығына айтып, арнайы анықтама ұсынамыз. Кейін оқудан уақытша босату жайлы бұйрық шығады. Артынан оқу бағдарламасы бойынша дайындалып, меңгеріп алуға тырысамыз.

- Спорт жолында болған қызықты оқиғаңызбен бөліссеңіз...  

- Жуырда өткен бір жарысқа бапкерім әрі әкем бара алмады. Үлкен жарыс еді. Әкенің баласына деген қамқорлығы мен қолдауы орасан зор. Бұл маған осыған дейін де сезілетін. Мен белдескеннен кейін әкем қоңырау шалды. «Әке, қызың финалға өтіп, әлем чимпио-натына жолдама алды» десем, ол сенбеді. Ойнап жатсың ба деп тағы сұрады. Өз құлағына өзі сенбей, біразға дейін өзіне келе алмай тұрғанын сездім. Мен үшін де, дайындаған адамға да бұл - жан тебірентерлік сәт.

- Жалпы, спорт түрі нені талап етеді?

- Кез келген спорт түрі тәртіп пен төзімділікті қажет етеді. Жарысқа шыққан уақытта жеңіліп бара жатқан кезде де тырысып, әрекет пен қозғалыста болуың керек.

- Спорт саласында Мемлекеттік рәміздерге әсіресе, жеңісті сәттерде желбірете алып шығатын Көк туымызға құрмет қандай деңгейде? Бұл жайлы қандай да бір сабақтар өте ме?

- Қандай мереке не болмаса жарыс болмасын ашылу салтанаты Мемлекеттік туға қарап тіктеліп, Әнұран шырқаумен өтеді. Әр азамат өз елінің рәміздеріне қастерлеп қарауы - заңдылық. Республикалық оқу-жаттығу жиынында жүрген уақытта біз әр таңды Әнұран айтумен бастайтынбыз. Бұл біздің сол жақтағы бапкерлеріміздің бастамасы еді. Әнұранды айтып, жүрек тұсыңа қолыңды қойған сәтте толқисың. Басқа елде болғанда жеңіс тұғырына туды жамылып, желбірете шыққанда қазақтың намысын қорғап тұрғаныңды түсініп, жауапкершілікті сезіне түсетіндейсің. Өзге елде өз мемлекетіміздің әнұранын шырқатып, туымызбен жүріп өту - біз үшін мәртебе. Мұны сөзбен айтып жеткізу мүмкін емес. Дайындық барысында жаттығу ғана жасап қоймай, бапкерлеріміз бізге өз елінің патриоты болып, рәміздерімізге құрмет көрсетіп, жасампаз еліміздің жалынды жастары болуға шақырады. Өз еліңнің намысын қорғап шыққан соң кеудеңді қуаныш кернейді. Рәміздерге құрмет әр азаматтың жүрегінде болуы тиіс.

- Алдағы кезге қандай жоспарларыңыз бар?

- Биыл Нұр-Сұлтан қала-сында белбеу күресінен 2002-2004 жылғы балуандар арасында әлем чемпионаты өтеді. Жарысқа қызу дайындық басталып кетті. Бұл жерде қазақстандық спортшыларға тиімді жері, бәлкім, өз жерімізде өткеннен кейін тайсалмай күресеміз деген үміт бар. Өйткені бұл жақта қолдаушыларымыздың ыстық ықыласы ерекше сезіледі.

- Алда келе жатқан Мемле-кеттік рәміздер күніне орай айтар тілегіңіз бар ма?

- Халқымды мерейлі мерекемен құттықтаймын. Еліміз аман, көк байрағымыз асқақтап, желбірей берсін. Келешек ұрпақта әрқашан өз еліміздің ұлтаны болуға шақырамын.

- Сұхбатыңызға рахмет. Алдағы спорттық мансабы-ңызға сәттілік тілейміз!

Сұхбаттасқан - Аяулым ТӨЛЕГЕНОВА.