Ақ тілектер төгілгенде жүректен

Павлодар облыстық «Saryarqa samaly» газетінің ұлттық «URKER» сыйлығының иегері атануы көпшілік оқырманның қуанышын туғызды. Осы ұлттық жүлдеге орай жан-жақтан құттықтаулар легі жетіп, ақ тілектер төгілуде. Осынау ақжарма лебіздердің бірқатарын жұртшылық назарына ұсынуды жөн көрдік.

                                                                                                                                                                                                                                                                                                                            Редакция.

Құрметті Павлодар облыстық «Saryarqa samaly» газетінің ұжымы және оқырмандары!

Міне, күні кеше ғана ел ордасы - Астанада өзіміздің «Saryarqa samaly» газеті «URKER» ұлттық журналистика сыйлығының жеңімпазы атанды! Бұл қуанышты хабар лезде еліміздің түкпір-түкпірін шарлап өтіп, облыстық газетіміздің мерейі мен мәртебесін аспандатып жіберді! Бұл ұлттық байқауға 500-ден аса өтініш түсіп, солардың арасында «Үздік өңірлік БАҚ» номинациясы бойынша «Saryarqa samaly» газетінің бағы жанды. Ұлттық бәйгеде бұлайша оза шабу барлық ақпарат құралының маңдайына жазылған емес. Бұл табыс - жеке газеттің ғана емес, Павлодар облысының журналистикасының жетістігі, айта берсек, тұтас облыстың қуанышы! Оған қуанушылардың қатары мол екенін көріп отырмыз. Бұл марапат - кешегі тарландарымыздың, газеттің бастауында болған алғашқы редактор, алаштанушы ғалым Бейсембай Кенжебаевтың, одан кейін еңбек еткен өзге де ұлы қаламгерлер мен ардагерлердің аманатын ақтаудың бір белгісі. «URKER» ұлттық сыйлығы - бүгінгі бас редакторы Нұрбол Қанатбекұлы Жайықбаев бастаған «Saryarqa samaly» газетінің шығармашылық ұжымның зор еңбегінің толағай табысы деп тануымыз керек. Ардақты ағаларымыз салған сара жолды қазіргі жастар лайықты жалғастырып келеді. «Saryarqa samaly» - елдің газеті, оның беттерінде Павлодар өңірінің талай қаламгерлері мен ұлы тұлғаларының қалам ізі сайрап жатыр. Ғұлама академиктер Қаныш Сәтбаевтың, Әлкей Марғұланның, қолбасшы Әбілқайыр Баймолдиннің, майдангер жазушы Қалмұқан Исабаевтың мақалаларын іздесеңіз, осы сарғайған парақтардан табылады. Бүгінде өзіміздіp де халыққа айтар сөзіміз осы газетте жарияланып келе жатқаны - біз үшін де абырой. Қолымнан келгенше «Saryarqa samaly» газетінің бетінде туған жер мен тарихи тұлғалар туралы мақалаларымды жариялап жатқаныма мен де қуаныштымын. Осындай тамаша жоғары мәртебеге ие болған Павлодар облыстық «Saryarqa samaly» газетінің ұжымы және оқырмандарын шын жүректен құттықтаймын! Алдағы уақытта басылымның зор шығармашылық табыстарға бөленуіне, халықаралық деңгейде танылуына тілектеспін!

Ізгі ниетпен, ҚР Парламенті
Сенатының депутаты
Алтынбек Нухұлы.
Астана қаласы,
2022 жыл, 28 қазан.

Самғай бер, «Saryarqa samaly»!

«Saryarqa samaly» газетінің сенбілік нөмірін (30.10.2022) алып қарасам, «Сүйінші, ағайын» деген сөзге көзім қадалып қалды. Тіпті, жаңағы қуаныш сезіміне бөлеген сөзден айырылып қалмайын деп тағы бір рет қарадым!

- Рас болғанда қандай! Неткен керемет десеңізші! Алпыс жылдан бері оның оқырманы болып келе жатқан, ерекше ыстық көрінетін газетім көңіл-күйімді көкке жеткізгендей әсер етті ғой.

- О, ғажап жаңалық. Осылай сезім әсеріне бөленіп кете бардым... Кешегі ұлы ғалым, журналист Бейсембай Кенжебаев газетіміздің бірінші санына қол қойған басылым осы уақытқа дейін абырой-атақ, алғыс, құрметке бөленіп келеді. Бұған қалай толқымайсың, қалай шаттанбайсың! Енді бір-екі жылдан кейін 95 жылдығын атап өткелі отырған газет оқырмандары, жанашырлары, тілеуқорлары үшін бұл керемет тарту ғой! Иә, мыңдаған оқырмандарының көзайымына айналған басылым үнемі қуантумен келеді. «Біздің газет - жеңімпаз!» Республикадағы облыстық газеттер арасынан суырылып шығып, жүзден жүйрік, мыңнан тұлпар атанған дарабоз газеттің табысына қалайша сүйсінбеске. Тарих қойнауына бір сәт үңілейікші... Сонау Ұлы Отан соғысының отты жылдарында жерлес атақты Қалижан Бекқожин, Мұзафар Әлімбаев сияқты ақындар өз өлеңдерін осы газетке жолдап тұрған. Олардың аталық аманатын бұлжытпай орындап, газет абыройын ойдағыдай алып келе жатқан кейінгі толқын намыс туын жоғары ұстауда. Төлеубай Төлеубеков, Төлеубек Қоңыров, Қажымұрат Смағұлов сияқты менің замандастарым қызмет еткен алтын ұямыз, қара шаңырақ иесі - «Saryarqa samaly» газетінің ұжымы біздердің дәстүрімізді жалғастырып келеді. Бұған қалайша қуанбайсыз, қалайша шаттанбайсыз, қалайша толқымайсыз. Ләйім, газеттің мерейі үстем болсын деп тілейік.

                                      Тұрсынбай ИБАДУЛЛИН,

Қазақстанның
Құрметті журналисі,
«Saryarqa samaly» газетінің
ардагер журналисі,
Павлодар қаласы.

Газет - халықтың тілі, көзі һәм құлағы.

А.Байтұрсынұлы.

Бұқара болмысы

(«Saryarqa samaly» газетіне) 

Дерек пен дәйек болса, дөп сөйлеші,

Салмақты ойлар санадан кетпейді осы.

Бұқаралық ақпарат құралдары -

Бұқараның болмысы, бет-бейнесі!

«Газет - тілі, көзі мен құлағы елдің»,

Назарыңды ел жаққа бұра бергің.

Ақпарат та - арғымақ, жүйткиді екен

Жалына жармасып ап Құлагердің!

Жадыңызда жаңғырса ғасыр үні,

Өткен күннің жарқ етер жасыны ұлы.

Бұл өлкенің тарихын жазады әлі,

Павлодар облысының басылымы!

Қалам - қару, әр сөзі - Әнұраны,

Мәселе де қозғайтын табылады.

«Saryarqa samaly» редакциясы -

Журналистің екінші шаңырағы!

Беу, жаршым, жақсылығыңды халық көрсін,

Қауырсынға қалғымас шабыт қонсын,

Жарқырап «Үркер» менен «Алтын жұлдыз»,

Жарқын күнің алдағы жарық болсын!