Алғыс арқалайтын арда мамандық!

Бүгінгі күні жас талғамайтын дертке шалдыққан балақайлар мен жалғыз өмір сүруге мәжбүр қарттар қатары аз емес екені - ащы да болса шындық. Бұл жандарға қолайлы жағдай жасау, қамқорлық пен мейірімділік таныту - қоғамның басты міндеті. Қазіргі таңда Павлодар қалалық халыққа әлеуметтік қызмет көрсету орталығы мамандары тағдыр тауқыметіне тап болған осындай тұрғындарға жан-жақты көмек көрсетуде.

Аталмыш орталықтың құрамындағы 11 бөлімше жалғызбасты қарттарға, 1, 2-топтағы мүгедектігі бар ересектер мен 18 жасқа дейінгі мүмкіндігі шектеулі балаларға жағдай жасау бағытында жұмыс істейді. Бүгінгі таңда орталықтағы 139 әлеуметтік қызметкер 900-ден астам адамның қиындығына ортақ-тасып, демеу болып қана қоймай, отбасының бір мүшесіне айналған. Сондай жанның бірегейі – Камал Бәденова.

- Алғаш жұмысқа келген кезім әлі көз алдымда. Анам алғашқыда қарсылығын білдіргенмен, кейін келісімін берді. Себебі, мұндай әлеуметтік топ өкілдерімен жұмыс істеу – қиынның қиыны. Өзім де бойым-дағы қорқынышты ысырып, орталыққа келдім. Мені 1,5 жастан 18 жасқа дейінгі мүмкіндігі шектеулі балалар бөлімшесіне жіберді. Үйде арнайы әлеуметтік қызметтерді көрсетуге қабылданып, 6 баланы қарамағыма берген еді. Әр балаға аптасына 2 мәрте барамын. Жас маманның бірі болғандықтан, бастапқыда балақайлар мені қабылдамады. Кейін 10 күндей бақылау жүргізіп, әрқайсысының қалауына қарай жоспарымды құрып, жұмысымды бастадым. Осылайша, 3 жылдан соң кеңесші болдым. Бүгінгі таңда мүмкіндігі шектеулі балаларға арналған әлеуметтік көмек көрсету бөлімінің меңгерушісі қызметін атқарып келемін, - дейді Камал Бәденова. Оның айтуынша, әлеуметтік қызметкерлердің барлығы қызмет алушылармен жекелей қарым-қатынас орнатып, олардың талап-тілектерін тыңдап, өмір сүру салтын барынша жеңілдетуге күш салады. Сонымен қатар, балақайлардың ата-анасының айтуымен далаға шығарып, ойын ойнатады. Оған қоса, сурет салу, аппликация тапсырмаларын орындайды.

- Жалпы, орталықта 900-ден астам қызмет алушы бар. Оның ішінде психоневрологиялық ақаулары бар 90 бала, 600 қартқа көмек көрсетіледі. Мен жетекшілік ететін бөлімшеде тірек-қимыл аппараты бұзылған мүмкіндігі шектеулі 80-ге жуық бала тіркелген. Оларға медициналық, психологиялық, педагогикалық және тағы да басқа бағыттар бойынша қызмет көрсетеміз. Атап өтер болсақ, әрбір әлеуметтік қызметкер 6 адамға қызмет көрсетеді. Басым бөлігі отбасына әлеуметтік-психологиялық тұрғыдан көмек көрсетеді, көңілдерін аулап, дәрігер қарауына апарады, - деп атап өтті ол. Камал Шаймарданқызының сөзінше, бүгінгі таңда әлеуметтік қызметкерлерге мемлекет тарапынан жағдай жасалуда.

- Расымен де, әртүрлі дертке шалдыққан балалармен де, қарттармен де жұмыс істеу қиынға соғады. Бастысы, адам жұмыс ортасында теңдікті ұстай білу керек. Себебі, шектен тыс көңілге ерік беру де жұмысқа кері әсерін тигізеді. Әлбетте, оларға жанашырлық танытып, сабырлық пен ортаға бейімдеу арқылы санасына сілкініс әкелу үшін тұрақты жұмыс істеу қажет. Осыдан біраз уақыт бұрын Анна есімді даун синдромы анықталған қыз балаға қызмет көрсеттім. Ол зерек балақай болатын. Бисерді қағазға жабыстыруды ұнататын. Тіпті, қолынан келгенінше әрекет етіп, инемен бисерді дұрыс әрі әдемі қоюды үйренді. Бір сөзбен айтқанда, мені мұғалім ретінде қабылдап, өзінің сүйікті ісін тапты. Осындай, ерік-жігері мықты баланы көрген сәтте өмірге деген көзқарас өзгереді. Күн сайын түрлі науқас бүлдіршіндермен жұмыс осыған дәлел, - дейді бөлім меңгерушісі. Сонымен қатар, көмекке мұқтаж жандардың көңілін сергітіп, жадырату мақсатында мәдени шараларды ұйымдастыруға баса мән берілетінін атап өтті.

- Атаулы мейрамдар қарсаңында орталықтағы әр қызмет алушы мерекені сезінуі үшін концерттік бағдарламалар ұсынамыз. Демеушілер тарапынан сыйлықтар береміз. Бұл тұста павлодарлықтардың мейірімге толы кең жүректі екенін айтқым келеді. Апта сайын қызмет алушыға барған кезде ата-ананың баланы дамытуға деген ниетін ерекше бағалаймыз, - деді К.Бәденова. Жүгі ауыр көшті бастап жүрген Камал Шаймарданқызы мен «Әлеу-меттік қызметкер» атағын абыроймен атқарып, барлық жан дүниесімен іске белсене кірісетін бұл сала мамандарының еңбегі өлшеусіз. Олар үшін өзгенің мәселесі деген ұғым жоқ. Керісінше, қиналған адамды көрсе, көмекке әркез дайын тұрады. Бүгінгі қоғамда осындай жандардың бары қандай бақыт десеңізші!

Махаббат ТӨЛЕБАЙ.

Суретті түсірген – Есенжол Исабек.