Қалтаны қағудың айласы ма?

Павлодар қаласының кейбір тұрғындарына берілген түбіртекте өткен жылдың желтоқсан айында орталық желіден пайдаланған су үшін төлеуі тиіс ақы әдеттегіден бірнеше есеге артық көрсетілді. Тіпті, монополист компания – «Павлодар-Водоканал» кей пәтер иелері бір айда 12 мың (!) теңгенің суын қолданды деп есептейді. Ең қызығы, сумен қамтуға жауапты мекеме басшылығы мұның бәрінен бейхабар болып шықты.

Бүгінгі күні тұрғындардың шағым білдіруіне арналған жолдар көп. Солардың бірі – әлеуметтік желілер. Жақында Павлодар қаласының тұрғыны Инстаграм желісіндегі жергілікті пабликтердің бірі арқылы қаңтарда қолына тиген түбіртекте отбасының бір айда 6 текше метр су пайдаланғаны көрсетілгенін айтып, шағымын жеткізді.

- Біздің пәтерде жеке есептеуіш құралдар орнатылған. Сондағы көрсеткіштер әр ай сайын «Павлодар-Водоканал» мекемесіне беріледі. Бірақ желтоқсан айы үшін берілген түбіртекте пайдаланылған су көлемі жалпы үйге ортақ құралдар арқылы есептелген. Көрсеткіштерді уақытылы беретін тұтынушылар бұл іске немқұрайлы қарайтын өзге тұрғындардың кесірінен неге артық ақша төлеуі тиіс? Жеке есептеуіш құралы жоқ көршілер төлеуге міндетті ақыны неге тұрғындардың бәріне бірдей бөледі? Бұл мәселені мекеме басшылығы мен жергілікті билік органдары тексерсе екен деймін, – деп ашынды тұрғын. Шағым білдірушінің сөзін өзгелер де қостады. Белгілі болғандай, осы айда бір емес, бірнеше тұрғынға коммуналдық төлем көлемі екі-үш есеге артық көрсетілген. Солардың бірі – Оксана Патрахина. Тұрғынның сөзінше, бұған дейін әр ай сайын пайдаланған су үшін 1100 теңге төлеп келген. Ал осы айда бұл сома бірден екі есеге өсіп, түбіртекте 2200 теңге төлеу міндеттеліпті. Әсем Маратқызы есімді тұрғынның «мойнына» тіпті 18 мың теңге ілінді.

- «Павлодар-Водоканал» мекемесінде өз ісін білмейтін, жұмысына салғырт қарайтын адамдар жұмыс істейтін сияқты. Олай демеске лаж жоқ. Әйтпегенде, бір айда үш адам тұратын отбасы
300 текше метр су пайдаланатынын көрсете ме? Түбіртекке бір айдың коммуналдық төлемі 18 мың теңге деп жаза ма? Бұл – қисынға келмейтін сандар. Жеке есептеуіш құралы бар пәтердің иесі бір айдың көлемінде осынша суды пайдаланбайды, - дейді ол. Осы орайда коммуналдық төлем сомасына қатысты мәселе көпқабатты баспаналардың ғана емес, жеке үйлер тұрғындарының «жүйкесін жұқартқанын» байқадық. Мәселен, Затон шағын ауданындағы жеке үйлердің бірінде тұратын Думан есімді тұрғын қаңтар айында таратылған түбіртекте төлем сомасы 12 мың теңге деп көрсетілгенін айтты.

- Мен жеке үйде ата-анаммен бірге тұрамын. Үш адамның бір айда пайдаланған суы үшін әдетте 1500-2000 теңге аралығында төлейтін едік. Ал осы жылы бірден 12 мың теңгелік түбіртек келді. Мәселені білмек болып, «Павлодар-Водоканал» мекемесіне бардым. Бір сағатқа жуық кезек күттім. Әйтеуір кезегім келіп, терезелердің біріне барғанымда оның ар жағында отырған маман «Неге мұндай сома есептелді?» деген сұрақтарыма мардымды жауап бере алмады. Тек қайта есептеу жүргізілетінін айтты, - дейді Думан. Желтоқсан айына арналған төлемдер сомасының дұрыс көрсетілмеуі сумен қамтитын мекемедегі өзге де өзекті мәселелердің бетін ашып берді. Мәселен, Анар есімді желі қолданушысы бағасы удай модульдік есептеуіш құралдар орнатқанмен, оның түк пайдасы жоқ екенін алға тартты.

- Осыдан бірнеше жыл бұрын «Павлодар-Водоканал» басшылығы пәтер иелерінен модульдік есеп-теуіш құралдарды орнатуды талап еткені мәлім. Сол тұста кәсіпорын басшылығы мұндай есептеуіш құралдарында көрсеткіштер автоматты түрде орта жүйеге түсетініне уәде беріп, ай сайын көрсеткіштерді айтып, хабарласудың керегі болмайтынын айтқан еді. Сондықтан пәтерге әрқайсысының бағасы 37 мың теңге болатын төрт құрал қойдық. Бірақ түбінде бәрібір әр айдың көрсеткішін беруім керек екені анықталды. Ол аздай бір айдың төлемі ретінде 13 мың теңге жазылды. Мекемеге барып, мәселені шешпек болып едім, бірақ одан еш қайыр жоқ. Қызметкерлер тұтынушылармен тіл табыса алмайды, - деп қынжылысын білдірді тұрғын. Жалпы, бұл жағдайлардан соң монополист компанияның қоғаммен байланыс орнатуы кемшін қалып жатқаны анық аңғарылды. Түбіртекте көрсетілген телефон нөмірлерінің тұтқасын ешкім көтермейді. Мессенджерлер арқылы жазған хабарламаларға кері байланыс жоқ. Ал мекемеге барған күннің өзінде мардымды жауап алу қиын. «Павлодар-Водоканал» ЖШС басшысы Анатолий Моисей азаматтарды жеке қабылдауға әрі кез келген тұрғынның өтінішін қарастыруға дайын екенін айтады. Алайда әлеуметтік желідегі жұрттың шағымдарынан бейхабар болып шықты.

- Желтоқсан айында кейбір тұтынушыларға төлем сомасы дұрыс есептелмегенін бұған дейін естімеппін. Тұрғындар тарапынан қандай да бір сауалдар болса, жауап беруге дайынмын. Аптаның әр сейсенбі күні сағат 17.00-18.00 аралығында азаматтардың жеке қабылдауын өткіземін. Ол үшін алдын ала қабылдау бөлмесіне хабарласып, мәселенің мәнісін айтса жеткілікті. Кейін жағдайды бірге қарастырып, шешу жолдарын талқылаймыз. Компания сайтындағы директор блогы бөліміне де хат жолдауға мүмкіндік бар, - дейді А.Моисей. Бұл ретте аталмыш кәсіпорын биылдан бастап тарифті 14 пайызға арттыруды жоспарлағанын атап өткен жөн. Яғни, бір текше метр су ақысын 32 теңгеден 35 теңгеге дейін көтеруді қалады. Бұл жоспар былтыр бекітіліп те қойған еді. Бірақ Мемлекет басшысы Қасым-Жомарт Тоқаевтың коммуналдық төлемдерді өсіруге қатысты 180 күндік мораторий жариялануына байланысты бұл іс кейінге шегерілді.

- Ел көлемінде біздің 32 теңгелік тарифтен төмен баға жоқ. Дүкенге бара қалсаңыз, бір литр судың өзі кемінде 150-160 теңге тұрады. Өкінішке қарай, тұтынушылардың басым бөлігі су тарату, су бөлу жұмыстарының жүйесін білмейді. Біз Ертіс өзенінен су алып, оны үйлер мен мекемелерге тарата салады деп жаңсақ ойлайды. Ал оған дейін ол арнайы сорғы арқылы өтіп, қондырғыларда тазаланады. Басқа да бірнеше сатыдан өтеді. Содан соң ғана тұтынушыларға жетеді. Мамандар апаттық жағдай орын ала қалса, жаздың аптап ыстығы мен қыстың аязында дем алмастан жұмыс істейді. Сондықтан тұрғындар біздің жұмысқа түсіністікпен қараса екен дейміз, - деген тілегін білдірді кәсіпорын басшысы. Аталмыш компанияға тұты-нушылар тарапынан шағымдардың көп екенін ескеріп, облыстық табиғи монополияларды реттеу департаментіне хабарластық. Себебі дәл осы мекеме коммуналдық төлемдердің дұрыс есептелуін жіті қадағалауы тиіс. Департамент басшысы Ибрагим Тангиев тұрғындардың желтоқсан айында пайдаланған су төлеміне қатысты тексеру жұмыстары басталғанын хабарлады. Оның қорытындысы жақын уақытта белгілі болады. Айта кетелік, жарты жылдық мораторий кезінде монополист компаниялар тарифті өсірсе, оларға 1600 айлық есептік көрсеткіш көлемінде айыппұл салынады.

Байқағанымыздай, тұтынушылардың басым бөлі-гінің «Павлодар-Водоканал» кәсіпорнының қызметіне көңілі тола бермейді. Тарифтің есептелуі, жеке және жалпы үйдегі есептеуіш құралдар көрсеткіште-рінің берілуі, кері байланыстың орнатылуы сынды мәселелердің оң жолға қойылмағаны байқалады. Сондықтан жергілікті билік бұл мәселеге назар аударып, мораторийдің сақталуына ғана емес, екі тарап арасындағы байланысты реттеуге де бет бұрса, артық болмас.

Құндыз ҚАБЫЛДЕНОВА.