Қамданған қапы қалмайды

Өткен жылу маусымы кезінде техникалық ақаулар айтарлықтай аз болғанмен, кейбір жылу-электр орталықтарының бейқамдығы байқалды. Айталық, бірқатар станцияда қатты отынның қажетті қоры болған жоқ. Биыл мұндай олқылықтар қайталанбас үшін қазірден-ақ дайындық жұмыстарын тыңғылықты жүргізу керек.

Облыс әкімдігінде аймақ басшысы Әбілқайыр Сқақовтың төрағалығымен өткен кеңейтілген мәжіліс барысында бірқатар мезгіл мәселесі қаралды. Алдымен Әбілқайыр Бақтыбайұлы облыстық мемлекеттік кірістер департаментінің басшысы Ержан Тоқтархановты таныстырды. Жаңа басшының салық саласындағы еңбек тәжірибесі мол екенін атап өтіп, біздің өңірдегі қызметіне табыс тіледі.

Одан соң облыстық энергетика және тұрғын үй-коммуналдық шаруашылық басқармасының басшысы Ержан Салханов өткен жылу маусымын қорытындылап, алдағы кезеңге дайындық барысын атап өтті. Сандарды сөйлетер болсақ, 2021-2022 жылғы жылу маусымы кезінде тұрғындардан түскен шағымдардың 70 пайызға азайғанын көреміз. Яғни, 2020-2021 жылдары пәтерлердегі температураның төмендігіне қатысты 2673 шағым болса, биыл 814 өтініш түсті. Сол сияқты энергия көздері мен коммуникациялық желілердегі технологиялық ақаулар саны 232-ден 191-ге дейін қысқарды.

- Технологиялық ақаулар саны азай-ғанмен, кейбір станциялардың қысқы дайындығы өз деңгейінде болмағаны байқалды. Мәселен, Павлодар қаласындағы №1 жылу-электр орталығында 214 күнге жететін қатты отын болуы тиіс еді. Алайда мұндағы қор тек 62 күнге қарастырылған. Сол сияқты Ақсу ферроқорытпа зауытында да осындай жағдай қайталанды, - деді Е.Салханов.

Бұл мәселелерді дер кезінде реттеудің нәтижесінде қыс кезінде айтарлықтай қиындықтар туындай қойған жоқ. Енді алдағы жылу маусымынан қысылмай шығу үшін негізгі 38 қондырғыны және 2 141,7 шақырым инженерлік-коммуникациялық желілерді уақыт оздырмай жөндеу керек. Сонымен қатар, әлеуметтік нысандарда қойылған, бірақ санитарлық және қауіпсіздік талаптарына мүлде келмейтін 31 қазандықты сыртқа шығарудың жолдарын қарастыру қажет. Айта кетелік, өңірдегі білім, денсаулық, мәдениет пен спорт нысандарына барлығы 121 мың тонна көмір керек. Қатты отынның бұл көлемі қазан айына дейін мекемелерге жеткізілуі тиіс.

Сонымен қатар, жиын барысында Павлодар қаласының әкімі Асайын Байханов көпқабатты үйлердің жылу маусымына дайындығы туралы есеп берді. Шаһар басшысының айтуынша, биыл облыс орталығында жылуға жарымай отырған баспаналардың саны 300-ден 103-ке дейін азайды. Яғни, былтыр ТМ-2 мен №6 сорғы станциясын салудың нәтижесінде Усолка, Дачный шағын аудандарындағы үйлерге жылу тиісті көлемде берілді. Ал биыл ТМ-4А магистралінің құрылысы жүргізілуде.

- Жоспар бойынша, бұл магистраль келесі жылы пайдалануға берілуі тиіс. Осы уақытқа дейін мердігер компания шамамен 800 млн теңге болатын ауқымды істі атқарды. Жылу желілерін осы жылы іске қосып үлгеру үшін республикалық бюджеттен тағы 1,4 млрд теңге қарастырған жөн. Сол кезде алдағы жылу маусымында қиындық болмайды, - дейді А.Байханов.

Сонымен қатар, шаһар басшысы бүгінде ТМ-31 магистралін жаңғырту мен «Павлодар жылу желілері» компаниясының жөндеу жұмыстарын жүргізуіне байланысты 63 көпқабатты үйде ыстық судың жоқтығын атап өтті. Қалған 1193 үйдің барлығында ыстық су бар.

Бұл ретте облыс әкімі Әбілқайыр Сқақов Орталық Азия электроэнергетикалық корпорациясымен жасалған меморандум аясында жол картасы дайындалғанын алға тартып, жылу желілерін жаңғырту жұмыстары соның аясында атқарылуы тиіс екенін атап өтті.

- Облыс орталығында жыл сайын дұрыс жылытылмайтын 100-ден астам үйге «Павлодар жылу желілері» компаниясы қызмет көрсетуі тиіс. Алайда бұл бағыттағы жұмыс сылбыр жүріп жатыр. Бұл – бір. Екіншіден, соңғы жылдары алғаш рет Павлодар қаласындағы үйлердің 95 пайызында ыстық су ары кеткенде бір айға өшірілді. Әдетте тұрғындар төрт-бес айға дейін ыстық суды пайдалана алмай отыратын. Енді бұл «әдеттен» арылып, жаңа «дәстүрге» көшу керек. Ол үшін сынақ, жөндеу жұмыстарының жан-жақты жүргізілуі маңызды, - деп түйіндеді Ә.Сқақов.

Осы орайда аймақ басшысы тұрғын үйлерді басқарудың формасы пәтер иелерінің кооперативінен мүлік иелері бірлестігіне ауысуы жылу маусымына дайындық кезінде салқынын тигізбеуі тиіс екенін қатаң ескертті. Сондықтан қазірден-ақ проблемалық баспаналарды монополист компанияның қарамағына беру мәселесін реттеу керек.

Құндыз ҚАБЫЛДЕНОВА.