Айшықты істер - аудан ажары

Шарбақты ауданы Есілбай ауылы тұрғындарының қуанышында шек жоқ. Соңғы екі жыл аралығында облыс басшылығының тікелей қолдауымен мұнда ауқымды істер атқарылды. Елді мекенде орталықтандырылған су құбыры тартылып, мәдениет үйі салынды. Қаймағы бұзылмаған қазақы ортаға өзге өңірлерден қоныс аударушылардың да легі қосылып, ауылдың ажары артып келеді.

Көптен күткен қуаныш

Кеше облыс әкімі Әбілқайыр Сқақов Шарбақты ауданына жұмыс сапарымен барды. Алдымен аймақ басшысы Есілбай ауылына ат басын бұрып, өткен жылдың соңында ел игілігіне берілген мәдениет үйінде тұрғындармен кездесті. Айта кетейік, елді мекендегі клубтың ғимараты осыдан 25 жыл бұрын өртеніп кеткен еді. Содан бері мұнда көпшілікті тоғыстыратын арнайы мекеме болған жоқ. Ал былтыр қазынадан 130 млн теңге көлемінде қаражат бөлініп, небары бес айдың аралығында заманауи ғимарат салынды.

- Жыл басынан бері 100 орындық мәдениет үйінде түрлі шара ұйымдастырылып, мерекелер атап өтілді. Осындай шаралардың барысында LED-экран пайдаланылады. Балалар мен жастар би, вокал, домбыра үйірмелері мен теннис секциясына тұрақты түрде қатысады. Сонымен қатар, мәдениет үйі ғимаратының ішінде кітапхана, ардагерлер кеңесі, «Қазпошта» орналасқан. Облыс басшылығының көмегімен көптен күткен тілегіміз орындалып, ауылдықтардың игілігі үшін осындай мекеменің салынғанына қуаныштымыз, - дейді мәдениет үйінің меңгерушісі Үмітжан Нұртазина. Әбілқайыр Сқақов заманауи үлгідегі нысанның іші үнемі ауылдықтарға толы болуы тиіс екенін қадап айтты.

- Алдымен баршаңызды ұлттық мереке – Республика күнімен құттықтаймын. Республика - барлығы бірлесе атқарған игі істер мекені. Соның бір жарқын үлгісі – Есілбай ауылындағы мәдениет үйінің құрылысы. 2020 жылы аудан басшылығы жобалық-сметалық құжаттама дайын болғанымен, құрылысты бастауға қаржының жоқтығы қолбайлау боп тұрғанын айтқан еді. Мұндай мекеменің тұрғындар үшін қажет екенін түсініп, уақыт оздырмай қажетті қаражатты қарастырдық. Мәдениет бар жерде бірлік болады. Ал бірлік барда тірлік бар. Сондықтан мәдени ғимараттың болғаны көңілге қуаныш ұялатады. Ендігі ретте ауланы абаттандырып, елді мекенге кіреберіс жол мен ауыл ішіндегі жолды ретке келтіру қажет. Біз жоба-жоспарларды қолдауға әзірміз, - деді Ә.Сқақов. Шарбақты ауданының әкімі Әзілхан Әбеуовтің айтуынша, Есілбайда футбол алаңын орнату да ойда бар. Сол кезде спортқа бет бұратын жеткіншектер мен жастарға тағы да жайлы жағдай жасалмақ. Ақсақалдар осындай игі істердің атқарылуына қуанышты екенін білдіріп, аудан мен облыс басшылығына алғыс айтты.

Мүмкіндікті тиімді пайдалануда

Содан соң Әбілқайыр Сқақов Шалдайдағы «Ертіс орманы» мемлекеттік орман табиғи резерватына барып, жұмыс барысымен танысты. Кәсіпорын басшысы Арман Бектеміровтің айтуынша, қазір 81 трактор, 28 өрт сөндіру көлігі бар. Сонымен қатар, былтыр резерваттың техникалық паркі өздігінен жүк тиейтін үш техникамен толықты. Бұл техникалар қысқы уақытта орманшылықтар арасындағы жолды тазалау кезінде де пайдаланылады. Мамандар техникалардың барлығын өздері жөндеп, күтіп-ұстайды.

- Орман үшін басты «жау» - өрт. Оның алдын алу үшін де жұмыстар атқарылуда. Мәселен, өртті бақылау мұнарасында тәулік бойы күзет жұмыс істейді. Қандай да оттың ошағы пайда болса, дереу тиісті органдарға хабар беріледі, - дейді А.Бектеміров. Сонымен қатар, өткен жылы табиғи резерват маңынан ағаш өңдеу орны ашылды. Бұған дейін санитарлық кесу кезінде жарамсыз болған ағаштың барлығы тек сол күйінде сатылса, қазір олардың бір бөлігі өңделіп, тұтынушыларға дайын өнімдер ұсынылады. Кәсіпорын басшысының айтуынша, ағаштың 60 пайызы шикізат, 40 пайызы өңделген түрінде сатылады. Әсіресе, аудан тұрғындары тарапынан үстел, орындық, қоршаулар, басқа да тұрмыстық заттарға сұраныс жоғары. Жаңадан ашылған цехта 9 адам еңбек етеді.

- Өңдеу орнында қажетті құралдар да, жұмыс күші де жеткілікті. Санитарлық тазарту кезінде жиналған ағаштың бір бөлігін алдымен кәсіпорын ардагерлеріне, қарттарға үлестіріп, оларды отынмен қамтимыз. Қалған бөлігі өңделеді. Бір айда 300-350 текше метр ағаштан дайын өнім аламыз, - деді кәсіпорын басшысы. Әбілқайыр Бақтыбайұлы шикізатпен шектеліп қалмай, қайта өңдеуге ден қою дұрыс шешім екенін алға тартты.

- Шикізат бар жерде өңдеу де болу керек. Жұмысты жүйелі ұйымдастыра білсе, сол арқылы тұрғындарды сапалы өніммен қамтуға мүмкіндік туады. Оған қоса, бұл кәсіпорынның әлеуетін арттырып, табысты еселейді. Ендігі ретте жұмыс ауқымын кеңейте түскен жөн, - деді аймақ басшысы.

Ауыл тұрмысы жақсарады

Облыс әкімі Әбілқайыр Сқақов Галкин ауылында да болып, жергілікті жұртшы-лықтың тұрмыс-тіршілігін көрді. Мұнда дене шынықтыру-сауықтыру кешенінің құрылысы жүріп жатыр. Аудан басшысы Әзілхан Әбеуовтің айтуынша, биыл 100 млн теңге көлемінде қаржы бөлініп, негізгі құрылыс жұмыстары атқарылды. Спорттық нысан мәдениет үйіндегі қазандық арқылы жылытылатын болады. Нысан келесі жылдың алғашқы жартыжылдығында қолданысқа тапсырылады. Сондай-ақ, Галкин-Жаңаауыл-Алексеевка бағытындағы жолға орташа жөндеу жұмыстары жүргізілуде. Қазіргі таңда межелі істің 88 пайызы аяқталды. Ол толығымен атқарылған соң аудандағы жақсы деңгейдегі жолдардың үлесі 92 пайызға жетеді. Келесі кезеңде осы бағыттағы тағы 11 шақырым жолды қалпына келтіру жоспарланып отыр. Биыл аудан көлемінде барлығы 65 шақырым жол жөндеуден өтті. Мұндағы жолдардың барлығы жақсы деңгейде болуы үшін 4 жобаны жүзеге асыру қажет. Аймақ басшысы Галкин ауылы тұрғындарымен кездесу барысында жұртшылықтың жағдайын жақсарту үшін мемлекет тарапынан тиісті жұмыстар атқарылатынын атап өтті. Өз кезегінде көпшілік те қоршауларды ретке келтіріп, ағаштар отырғызып, ауылдан шыққан азаматтар жақсы істердің басы-қасында болса, ауыл одан әрі өркендейді деген ойын да білдірді.Содан соң Әбілқайыр Бақтыбайұлы Ғабдыл-Уахит хазірет кесенесіне тағзым етті. Ал бүгін облыс әкімі аудан орталығында тұрғындармен кездеседі.

Құндыз ҚАБЫЛДЕНОВА.