Азық қоры аз емес

Қазіргідей қысылтаяң кезеңде тұрғындарды арзандатылған азық-түлік өнімдерімен қамтамасыз ету маңызды. Мұндай сәтте тұрақтандыру қоры ойға оралатыны рас. Әлеуметтік маңызы бар тауарлардың бағасын реттеуге міндет-телген жергілікті қордағы жағдай қалай?

Облыстық кәсіпкерлік және индустриялық-инновациялық даму басқармасының басшысы Ернұр Жәутікбаевтың мәліметінше, бүгінде тұрақтандыру қорында жалпы құны 1,7 млрд теңгені құрайтын 7,5 мың тонна өнім сақтаулы. Атап айтсақ, 180 тонна күріш, 141 тонна қарақұмық, 2828 тонна қант, 2188 тонна 1 сортты ұн, 1377 тонна картоп, 149 тонна сәбіз бар екен. Басым бөлігі – жергілікті кәсіпкерлердің өнімдері. Өзімізде өспейтін, өндірілмейтін өнімдер өзге өңірлерден жеткізілуде. Бұл іске жауапты мамандар өңірде қажетті өнімдер мол екенін, яғни азық-түлік тапшылығы орын алмайтынына сендіруде. Қордағы өнімдер әдеттегідей әлеуметтік дүкендерге жол тартады. Байланыс орнатуға келіскен супермаркет иелері де тауарларды арзан бағамен саудалауда. Осылайша, тұрақтандыру қорынан 1 сортты ұнның бір келісі 135 теңгеден, «Лидер» күріші 228 теңгеден (1 кг), қарақұмық жармасы 341 теңгеден, қант 264 теңгеден, тұз 50 теңгеден, сүт 243 теңгеден, күнбағыс майы 664 теңгеден, пияз 66 теңгеден, макарон өнімдері 224 теңгеден босатылуда. Байланыс демекші, былтырдан бері жергілікті азық-түлік қауіпсіздігін қамтамасыз ету департаменті ірі сауда орындарымен жаңа жүйе арқылы байланыс орнатып келеді. Атап айтсақ, оларға тауар айналымын реттеу үшін жеңілдетілген несиелер үлестіріледі. Кәсіпкерлер өз кезегінде әлеуметтік маңызы бар азық-түлік өнімдерін қымбаттатпай, қолжетімді бағамен сатуы тиіс. Өткен жылдың қорытындысына көз жүгіртсек, жаңа жүйенің тиімділігі байқалады. Бұл бағыттағы жұмыстар биыл да жалғасын табуда. Айналым жүйесінің іске асуына 1,85 млрд теңге қаражат қарастырылыпты. Бүгінде 7 кәсіпорын әріптестік орнатуға ниет білдіріп, 13 өнімді шекті нормадан аспайтын бағамен сатуға келіскен. Әрине, өнім бағасы – әрдайым бақылауда. Өңірдегі төтенше жағдайға байланысты облыс орталығында әлеуметтік маңызы бар азық-түлік тауарларының бағасын қадағалайтын арнайы комиссия жұмысын бастады. Егер әлеуметтік маңызы бар азық-түлік өнімдері бағасының күрт өсуі оқиғаларына куә болсаңыз, 65-24-48, 32-07-30 (сағат 9:00-ден 18:30-ға дейін) жедел желі телефондарына немесе WhatsApp желісіне +7(747) 5061594; +7 (705) 6092074 (20.00-ге дейін) байланысқа шыға аласыз. Сондай-ақ, қала мен аудан әкімдіктері әлеуметтік маңызы бар азық-түлік тауарларының бағасына күн сайын мониторинг жүргізетінін атап өткен жөн. Естеріңізге салсақ, әлеуметтік маңызы бар өнімдер тізіміне 19 өнім кіреді. Олар: бірінші сұрыпты ұн, бірінші сұрыпты нан, рожки (салмағы бойынша), бірінші санатты жұмыртқа, қарақұмық (салмағы бойынша), күріш (салмағы бойынша), қант (салмағы бойынша), күнбағыс майы, сиыр еті (сүйегі қлса иық-кеуде бөлігі), тауық еті, майлылығы 72,5% сары май, жұмсақ қаптамадағы пастерленген 2,5% сүт, жұмсақ қаптамадағы 2,5% айран, майлылығы 5-9% ірімшік, көкөністер (картоп, сәбіз, пияз, орамжапырақ) және ас тұзы. Белгілі болғандай, бірінші сұрыпты ұн мен бірінші сұрыпты ұннан жасалған нан бағасын тұрақтандыру және бағаны ұстап тұру мақсатында облыстың ауыл шаруашылығы тауарын өндіру-шілермен астық қорын қалыптас-тыру туралы меморандумға қол қойылған. Өндірушілер үшінші сұрыпты бидайды 85 мың теңгеден (тонна), нанды 95 теңгеден асырмай сатуға міндеттеледі. Сондай-ақ жергілікті билік пен ауылшаруашылық өнімдерін өндірушілер жасасқан келісімге сәйкес, 30 мың тонна картоп пен 6 мың тоннадан астам сәбіз арзан бағамен тұтынушыларға жол тартуда. Қос өнімнің де босатылу бағасы – 95 теңге (1 кг). Бүгінде әлеуметтік дүкендерде килограмы 115 теңгеден саудалануда. 22 қаңтардан бастап ауыл шаруашылығы жәрмеңкесінің жұмысы қайта жанданады деп күтілуде.

Оралхан ҚОЖАНОВ.

Количество показов: 744

Возврат к списку