Бала денсаулығы - басты назарда

Бала – ұрпақ жалғастырушы, елдің болашағы. Ал балдырғандардың, естияр сәбидің саулығын жіті қадағалау үшін дәрігерлерге біліктілік пен сезімталдық қасиет аса қажет. Қазіргі уақытта осы бір ауыр жүкті еңсеріп, сырқатын айтуға тілі жоқ бүлдіршіннің еміне шипа беріп, қырағылық танытып жүрген облыстық балалар ауруханасының рөлі орасан зор. «Балалар жылында» жасөспірімдерге көрсетіліп жатқан игі қызметтер туралы кеңірек жазуды жөн көрдік.

Бүгінгі күні балақайларға мамандандырылған амбулатор-лық-емханалық, стационарды алмастырып, медициналық көмек көрсететін көп бейінді профи-лактикалық ұйым жоғары көрсет-кіштерге қол жеткізіп те отыр.

Барлық мүмкіндіктер ұсынылады

Бала дәрігері болуға көптің батылы жете бермейтіні шындық. Әсіресе, мазалап тұрған дертін жеткізуге жағдайы жоқ балақайлармен жұмыс істеу үшін маманның білімі жоғары болғанымен қатар, бала жаны мен тәнін түсіну білуі шарт. Осы жолда облыстық балалар ауруханасы үлкен ұйымдастырушылық-әдістемелік жұмыс жүргізеді. Аймағымызға қарасты қала мен аудандарға барып, кішкентай сәбиден жасөспірімдерге дейін жоспарлы және шұғыл консультациялар өткізуде. Аурухананың сыйымдылығы 460 орынға лайықталған. Сонымен қатар, 40-50 орынға шақталған хирургиялық, травматологиялық, отоларингологиялық, офтальмологиялық, соматикалық, кардионефрологиялық, неврологиялық бөлімшелер бар. Сондай-ақ, 4 инфекциялық, 6 төсектен тұратын 2 реанимациялық бөлімше де жасақталған.

Облыстық балалар аурухана-сының директоры Ардақ Күзековтің айтуынша, ауруханада балаларға медициналық көмек көрсету деңгейі өсуде.

- Мұнда балалар амбулаториялық хирургия орталығы жұмыс істейді. Оның ішінде хирургия, оториноларингология, офтальмология, травматология және ортопедия, жақ-бет хирургиясы бейіндері бойынша медициналық көмек көрсетіледі. Консультациялық емхана жанынан балалар онкогематологының диспансерлік бақылау кабинеті ашылған. Яғни, патологиясы бар балаларды бақылауды және емдеуді жоғары санатты педиатр дәрігер, ОДБ соматикалық бөлімшесінің меңгерушісі, облыстың штаттан тыс бас онкогематолог дәрігері О.Ким жүзеге асырады. Ауруханада «Диабет» мектебі бар. Мұнда науқас балалар мен олардың ата-аналарына көрнекі құралдарды пайдалана отырып оқыту сабағын жоғары санатты дәрігер Б.Саматова жүргізеді. «Диабет» мектебінің тиімді жұмысының нәтижесінде соңғы жылдары ауыр асқынулары бар балалардың саны айтарлықтай төмендеді. Ал күйік патологиясы бар балаларға шұғыл және жоспарлы түрдегі көмек травматологиялық бөлімше базасында көрсетіледі. Бұл тұста комбустиологиялық көмек көрсетудің барлық кезеңінде ауруханада өлім жағдайлары тіркелген жоқ екенін атап өтуге болады, - дейді Ардақ Мүбәракұлы.

Директордың сөзінше, онкологиялық науқастардың тізімі жүргізілген. 2021 жылы онко-гематологиялық орында 270 бала емделген екен. Облыстық балалар ауруханасының консультативтік емханасында онкологиялық патологиясы бар және онкологиялық патологияға күдікті 480, гематологиялық патологиясы бар 1019 емделуші қабылданды. Астана және Алматы қалаларындағы республикалық емханаларға 81 науқас жіберілгенін атап өтті.

- Облыстық балалар ауруханасында жаңа туған нәрестелерге арналған хирургиялық төсектердің ашылуы сәби өлімінің көрсеткішіне белсенді ықпал жасады. Дамуында ақауы бар бүлдіршіндердің отадан кейінгі өлімі 90,9 пайыздан күні бүгінге дейін 4,3 пайызға дейін төмендеді. 2020 жылдың қорытындысы бойынша аймағымызда нәресте өлімі 5,6 промиллені құрады. Бұл ел бойынша үздік көрсеткіш болып танылды.

Білікті маман – дені сау ұрпақ

Бүгінгі таңда кез-келген мекеменің жоспарларының жүзеге асуы, оның сәтті өтуі кадрға байланысты екені жалпыға белгілі. Ұжымның ұйымшылдығы, өзара тәжірибе алмасып, келешек жас дәрігерге кеңестерімен бөлісіп, білгенін үйретуде аурухананың қызметкерлері жұмыла жұмыс атқаруда.

- Жалпы, 55 жылға жуық еңбек өтілі бар қызметкерлер мен аурухана әкімшілігінің ұйымдастырушылық мәселелерінің жауапкершілігі арқасында науқастарға қажетті медициналық көмек көлемі үнемі, біркелкі, үзіліссіз атқарылып келеді. Жыл сайын ауруханаға медицина саласы бойынша жас мамандар келеді. Ауруханамызда резидент дәрігерлер оқытудан өтеді. Дәрігерлеріміз Қазақстанда ғана емес, сондай-ақ Ресей, Израиль, Беларусь, Литва елдерінде біліктіліктерін арттыруға мүмкіндік қарастырылған, - деді облыстық балалар ауруханасының директоры А.Күзеков.

2019 жылы Литваның Каунас қаласында «Литва денсаулық сақтау ғылымдары университеті» базасында «Балалар нейрохирургиясындағы жедел тактика, оның ішінде гидроцефалия» тақырыбында 2 нейрохирург дәрігер, 1 хирург дәрігер оқудан өткен. 2021 жылы Ресейдің Санкт-Петербург мемлекеттік педиатриялық медициналық университетінің «Жоғары білім берудің федералды мемлекеттік бюджеттік білім беру мекемесінің» базасында 2 реаниматолог дәрігер, инфекциялық стационар директорының орынбасары білімін молайтты. Спикер аталған оқытудың барлығы ауруханада жоғары білікті мамандарды даярлау стационарлық көмек көрсету сапасын жақсартуға, балалар денсаулығы сапасының көрсеткіштерін жақсартуға әкелетінін де айтты.

2020 жылғы наурыз айында Сovid-19 пандемиясының басталуымен карантиндік шараларды енгізуге байланысты күрделі эпидемиологиялық жағдай орын алды. Осы сәтте облыстық балалар ауруханасының инфекциялық стационарында КВИ бөлімшесі жұмыс істеді. Алдымен мұнда вирус анықталған науқастарға медициналық көмек көрсетілді. Қабылданған дұрыс ұйымдас-тырушылық шешімдердің нәти-жесінде денсаулық мекемесі стационар бойынша ҚР-да жалпы өлім-жітімнің төмен көрсеткішін көрсетті.

- Бұл эпидемиологиялық жағдай уақытында стационардағы балалар арасындағы өлім-жітімнің төмен көрсеткіші біздің мекемеде орын алды десем, артық айтқандығым емес. Себебі, жалпы пандемия кезіндегі қызметкерлердің 6 пайызы ғана вирус жұқтырған болатын. Осылайша, КВИ бойынша профилактикалық және эпидемияға қарсы іс-шараларды уақытылы және сапалы жүргізу пандемия жағдайында облыстық балалар ауруханасының тұрақты жұмыс істеуін қамтамасыз етті. Бастысы бұл балалар арасында аурудың таралу қарқынын тежеуге ықпалын берді, - деді А.Мүбәракұлы.

Республикада - үздіктер қатарында

Соңғы бес жыл ішінде, атап өтер болсақ, 2017 жылы республика бойынша 28 балалар ауруханасы арасында облыстық балалар ауруханасы 5 жұлдыз алған 3 стационар санатына енді. 2018 жылы 5 жұлдыздың ішінен 4 жұлдыз иеленсе, 2019 жылы еліміздегі 14 облыстық және 11 қалалық, жалпы саны 25 балалар ауруханасы ішінде 5 жұлдыз иемденіп, жоғары рейтингке қол жеткізді.

2020 жылы ҚР медицина саласындағы шаруашылық жүргізуші субъектілерінің қызметін рейтингтік талдау бойынша қазақстандықтардың денсаулығы үшін табысты жұмыс, қызметінің елеулі нәтижелері және мемлекет дамуына қосқан қомақты үлесі үшін «Денсаулық сақтау мақтанышы» құрметті атағымен марапатталды. Оған қоса, ҚР Үздік мемлекеттік кәсіпорындарының «Үздік жүздігіне» кірді. Өткен жылы Дүниежүзілік іскерлік бедел қорының халықаралық талдау тобы облыстық балалар ауруханасын тауарлар мен көрсетілетін қызметтерді өндірушілердің орташа іскерлік беделімен мінсіз кәсіпорын ретінде белгілесе, әлемдік кәсіпорындар арасында өтетін дәстүрлі халықаралық байқаудың лауреаты болып жарияланды. «Мінсіз іскерлік бедел» номинациясы бойынша халықаралық марапатқа ұсынылды.

Облыстық балалар ауруханасы бір реттік қолданыстағы медициналық бұйымдармен толық жабдықталған. Қазіргі уақытта Аурухананың материалдық-техникалық базасын жақсарту, оның ішінде медициналық жабдықтарды сатып алу бойынша жұмыстар жүргізілуде.

Ендігі кезекте балаларға көрсетілетін медициналық көмектің сапасын арттыру, аурухананың материалдық-техникалық базасын одан әрі нығайту, медициналық технологиялардың жаңа жетістіктерін енгізумен қатар мамандарды тұрақты және үздіксіз оқытумен қамтамасыз етілу жолға қойылуда. Сондықтан аурухана ұжымының бүгінге дейін қол жеткізген толағай табыстары артып, жылдан-жылға отандық медицинаның қарыштап дамуы мен бала денсаулығы үшін қалтқысыз еңбек ететініне сенім білдіреміз.

М.БАЯНБЕКҚЫЗЫ.

Суреттерді түсірген – Есенжол Исабек.