Балабақшаға жолдама алыңыз!

СОҢҒЫ ЖАРИЯЛАНЫМДАР

19.05.2022

Балабақшаға жолдама алыңыз!

Мемлекеттік қызмет көрсетудің сапасын арттыруға түрлі ақпараттық технологиялар ықпал етіп жатыр. Бүгінде өңірімізде жүзеге асып жатқан цифрлық жобалар балабақша кезегіне тұрып қана қоймай, ерте жолдама алу үшін де қолжетімді. Жалпы, ерте жолдама алу дегеніміз не? Ата-аналар балабақшаға жолдаманы қалай алады? Талаптары қандай? Өтініш беру қай уақытқа дейін жалғасады? Осы және өзге де сауалдар бойынша Павлодар қалалық білім беру бөлімінің басшысы Самал Айтқазинаны әңгімеге тарттық.

- Жалпы, ерте жолдаманы алу дегеніміз не?

- Ерте жолдама алу - бұл осы орын босатылғанға дейін мектепке дейінгі ұйымға баланы қабылдау үшін балабақшаға орындарды ерте алу мүмкіндігі. Биыл жаңа оқу жылына балабақшаға балаларды жинақтау жөніндегі жұмысты ұйымдастыру ерте жолдама алу шеңберінде жүзеге асырылады.

- Бұл жолдаманы қалай алуға болады?

- Жолдаманы алудың еш қиындығы жоқ. Алдымен ата-аналар орындардың жарияланған кестесімен танысуы керек. Содан кейін орындар жарияланған күні indigo24.kz сайтына кіріп, қалаған балабақшаны таңдай алады. Мектепке дейінгі ұйымдарға орын бөлу және жолдама алу үздіксіз жүргізіледі. Күн сайын таңертең сағат 07.00-де өткен тәулікте мектепке дейінгі ұйымдарда босаған жаңа орындар тізілімге түсіп, жаңарып отырады. Тізімдегі барлық орындар екі санатқа бөлінген. Олар - қолжетімділігі басым орындары (жеңілдіктерге байланысты), барлық санаттағы еркін қолжетімді орындар. Тізілімге таңертең түсетін барлық жаңа орындар алдымен басымдыққа ие болады. Бұл дегеніміз тізімнің алдыңғы қатарына түседі. Мұндай орындар кезекке алғаш болып өтініш берушілерге қолжетімді болып отыр. Алдымен сайтта жолдама қолжетімдігі жоғары балаларға беріледі. Басым қол жеткізу кезеңі аяқталғаннан кейін қалған орындар өзге санаттағы бүлдіршіндер үшін қолжетімділікке ауысып, тізім өзгереді. Жолдама алу үшін бала міндетті түрде балабақша кезе-гінде тұруі тиіс. Ата-ана жеке ЖСН арқылы (кезекке тұру кезіндегі деректерге сәйкес) indigo24.kz сайтындағы жеке кабинетке өтеді. «Жолдама алу» батырмасына өткен кезде жүйеде автоматты түрде баланың жасы ескеріледі. Нәтижесінде балақайдың жасына сәйкес балабақшалардағы бос орындар тізімі шығады. Ата-ана қалауы бойынша балабақшаны таңдайды. Аталған жұмыстың ұзақтығы 3 жұмыс күнінде қаралады. Еске салайық, балабақша орнына алдын ала белгілеу 16 мамырдан бастап 17 маусымға дейінгі аралықта ғана жүзеге асырылады.

- Топтарды қалыптастыруда балалардың жасы қалай ескеріледі?

- Ол жайлы ақпарат сайтта толық көрсетілген. Жалпы айтар болсам, топтарды қалыптастыру оқу жылының басындағы толық жастарды ескере отырып, мынадай жас топтары бойынша жүзеге асырылады. Яғни, 1 жастан бастап - ерте жас тобы, 2 жастан - кіші топ, 3 жастан - орта топ, 4 жастан - ересек топ және 5 жастан бастап мектепке дейінгі дайындық тобы болып жіктелген.

- Яғни, әуелі кезекте балабақшадан орындар кімдерге беріледі? Кезектен тыс жағдай қарастырылған ба?

- Толығырақ тоқталатын болсақ, ата-аналары немесе заңды өкілдері әскери қызметшілер және арнаулы мемлекеттік органдар қызметкерлері санатына жататын, оның ішінде Қазақстан Республикасының «Әскери қызмет және әскери қызметшілердің мәртебесі туралы» және «Арнаулы мемлекеттік органдар туралы» Заңдарына сәйкес қызмет атқару кезінде қаза тапқан, қайтыс болған немесе хабар-ошарсыз кеткен ата-аналардың балалары кезектен тыс орын алуға құқығы бар. Сонымен қатар, бірінші кезекте орын алу мүмкіндігі заңды өкілдері мүгедек болып табылатын, ата-анасының қамқорлығынсыз қалған, жетім, көпбалалы отбасылардан шыққан және мүгедек баласы бар отбасылардан шыққан, ерекше білім беруді қажет ететін балалар ие болады. Сонымен қатар, ҚР «Педагог мәртебесі туралы» Заңына сәйкес педагогтердің балаларына беріледі.

- Ақпаратыңызға рахмет!

Сұхбаттасқан – Махаббат ТӨЛЕБАЙ.

Количество показов: 509

Возврат к списку