Балаларға - жаңа мүмкіндіктер

Балаларды жан-жақты дамыту – заман талабы. Жастайынан ұл-қыздарын өнер-білімге баулыған ата-аналар келешекте еңбектерінің жемісін көреді.

Мемлекет басшысы Қасым-Жомарт Тоқаев «Жаңа жағдайдағы Қазақстан: Іс-қимыл кезеңі» атты Жолдауында: «Балалар үйірмесі» қызметін қайта қалпына келтірген жөн. Онда жастарымыз қолөнердің және шығармашылықтың бастапқы негіздерімен танысар еді» деп атап көрсетті. Осы тапсырманы орындау мақсатында облыста ағымдағы жылдың 1 мамырынан бастап балалар мен жасөспірімдерге арналған мемлекеттік шығарма-шылық тапсырысты жан басына қаржыландыру бағдарламасын енгізу бойынша белсенді жұмыс жүргізілуде. Бағдарлама балаларды дамытуға арналған шығармашылық үйірмелердің санын арттыруға, отбасылық бюджетті үнемдеуге, жаппай кәсіпкерлікті дамытуды көздейді. Бұл бағдарламаның артықшылығы 4 жастан 17 жасқа дейінгі балалар, оның ішінде ерекше балалар мемлекеттік бюджет есебінен шығармашылық үйірмелерге тегін қатыса алады. Облыстық мәдениет, тілдерді дамыту және архив ісі басқармасының мәдениет және өнер бөлімінің бас маманы Әйгерім Букурубованың айтуынша, мәдениет ошақтары жанында 875 балалар үйірмесі 23 бағытта жұмыс істейді. Қазір онда 11498 бала тегін қатысып жүр. Бұдан бөлек мемлекеттік шығармашылық тапсырыс бойынша 57 үйірме жұмыс істейді. Биыл мемлекеттік шығармашылық тапсырысты іске асыру үшін 1004 баланы қамту жоспарланғанымен, бүгінде бағдарлама аясында тегін үйірме-лерге қатысып жүрген балалар саны екі есе көп. Бүгінгі таңда облыста 32 ұйым балаларды ұлттық, заманауи билер, кескіндеме, сурет салу, балет, бейнетүсірілім және монтаждау, компьютерлік графика, эстрадалық вокал, эстрадалық аспаптар, көркемсөз оқу, хореографиялық ансамбль, ағаш ою, шешендік өнер, киімдерді үлгілеу, пішу және тігу, құрақ тігу, домбыра, актерлік өнер, қағаз модельдеу, оригами, өлкетану, кестелеу бағыттарына баулуда. Білім басқармасының мемлекеттік білім беру тапсырысын жеке қосымша білім беру ұйымдарына орналастыру бойынша жұмыс жүргізілуде. Облыстық білім беру басқармасының тәрбие жұмысы және қосымша білім беру бөлімінің басшысы Бекбатыр Айтмахановтың сөзіне сүйенсек, ағымдағы жылы қосымша білім берудің жеті негізгі бағыты бойынша барлығы 1110 орын бөлінген. Қараша айында өткен конкурс қорытындысы бойынша байқауға қатысқан 34 жеке қосымша білім беру ұйымының 15-і балаларға қосымша білім беруге мемлекеттік білім беру тапсырысын жүзеге асыратын ұйымдар тізбесіне енгізілген. Ағымдағы жылдың желтоқсан айынан бастап қалалар мен аудандардың білім бөлімдері жеке ұйымдармен келісімшарттар жасады. Балалар туристік-өлкетану, экологиялық-биологиялық, ғылыми-техникалық, әлеуметтік-педагоги-калық, көркем-эстетикалық, спорттық, музыкалық-аспаптық үйірмелерде білім алу мүмкіндігіне ие болды. Білім беру басқармасы 2025 жылға дейін мемлекеттік білім беру тапсырысының көлемін ұлғайтуды жоспарлап отыр. Биыл 1110 орын болса, 2022 жылы – 2220, 2023 жылы – 3330, 2024 жылы - 4440, 2025 жылы 4440 орынға жетпек. Павлодар қаласының «Мансұр» жеке кәсіпкерлігі – шығармашылық және білім беру бағыттарында кәсібін дөңгелетіп отырған бизнес өкілдерінің бірі. 2015 жылдан бастап кәсіпкерлікпен айналысып жүрген орталық басшысы Жанар Қалиеваның айтуынша, дамыту орталығында балалар жалпыэстетикалық және музыкалық білім алады.

- Қыркүйек айынан бастап белсенді жұмыс істеп келеміз. Орталығымызға мәдениет саласы бойынша 40 орын, білім беру саласы бойынша 148 орын бөлінді. Қазіргі таңда сегіз кәсіби білікті маман балалармен жұмыс істеуде. Балаларға қойылатын басты талап – сабақты себепсіз босатпау. Қазір ата-аналар тарапынан өтініштер көп түсуде. Балалардың болашағы - өз қолымызда, - дейді Жанар Серікқызы. Орталықта мектепке дейінгі білім берумен қатар, тіл үйрену курстары жұмыс істейді. Өнерге жақын балалар домбыра, қобыз сынды ұлттық аспаптарда, тіпті скрипка, фортепиано, виолончельде ойнап, вокал үйірмесінде ән айтып үйренуде. Сонымен қатар би билеп, сурет салып, шығармашылық қабілеттерін дамыта алады.

- Ата-ана ретінде баламның жан-жақты болғанын қалаймын. Сондықтан ақылы және тегін үйірмелерге бірдей қатыстыруға тырысамын. Балам Арлан қазір «Знатоки» білім орталығының шешендік өнер үйірмесіне қатысады. Екі тілде жүргізілетін үйірмеге қатысқан балалар ашылып, өз ойын еркін жеткізуге дағдыланады. Ата-аналар мемлекет тарапынан берілген зор мүмкіндікті пайдаланып, балаларын тегін үйірмелерге барынша қатыстырғаны жөн, - дейді №29 мектептің қазақ тілі мен әдебиеті пәнінің мұғалімі Айсана Сейітқалиева. Қорыта айтқанда, жан-жақты білімді, өнерлі, мәдениетті балаларды тәрбиелеуді қалайтын әрбір ата-ана осы мемлекет ұсынып отырған таптырмас мүмкіндікті жіберіп алмай, балаларын тегін үйір-мелерге жаздырса, көп ұзамай жемісін де көре бастайды.

Торғын ОРАЗАЛЫ.