Барлық деректер - бірыңғай жүйеде

Елімізде білім беру, әлеуметтік қорғау және денсаулық сақтау жүйе-леріндегі деректер базасының арасында өзара ықпалдастық жоқ. Көші-қон саласында бақылаудың тиісті деңгейде жүргізілмеуі де түрлі қиындықтарға әкеп соқтыруда. Облысымызға жұмыс сапарымен келген вице-премьер Ералы Тоғжанов бұл түйткілдерді шешу жолдарын атап көрсетіп, нақты міндеттерді белгіледі.

Бұрнағы күні өңірімізге Үкімет басшысының орынбасары Ералы Тоғжанов бастаған делегация келіп, Екібастұз қаласындағы бірқатар мекеменің жұмыс барысымен танысты. Алдымен Е.Тоғжанов халықтың тұрмысы төмен топтарын әлеуметтік қорғау және медициналық көмек көрсетудің түйткілді мәселелері бойынша кеңес өткізді. Жиынға облыс әкімі Әбілқайыр Сқақов, орталық және жергілікті мемле-кеттік органдардың басшылары қатысты. Басқосу барысында өткен аптада Екібастұздағы жалдамалы пәтерлердің бірінен табылған төрт баланың жағдайына ерекше назар аударылды. Қазіргі уақытта қиын жағдайға тап болған отбасыға жан-жақты қолдау көрсетілуде. Ал құзырлы органдар көмекке мұқтаж балалар мен олардың ата-аналары жергілікті атқарушы органдардың назарынан не себепті тыс қалғанын анықтап жатыр.

– Балаларды әлеуметтік тұрғыдан қамтамасыз ету, олардың құқықтары мен мүдделерін қорғау – мемлекеттік саясаттың басым бағыты. Бүгінгі таңда елімізде 6,3 миллион бала бар. Бұл Қазақстан халқының
32 пайызын құрайды. Біз олардың әрқайсысының өміріне жауап-тымыз, - деді Е.Тоғжанов. Аймақ басшысы Әбілқайыр Сқақовтың пайымынша, тұрмысы нашар отбасының билік назарынан тыс қалуының бір себебі – көші-қонда бақылаудың болмауы. Еске сала кетейік, екібастұздық көпбалалы отбасы тұрғылықты жерін жиі ауыстырған. Атап айтқанда, 2019 жылы Ақсу қаласының ауылдық аймағынан кеншілер шаһарына қоныс аударған. Бірақ бұл туралы әлеуметтік қорғау органдары мен дәрігерлерге хабарламаған.

– Бұл ретте отбасы бұған дейін қай әкімшілік аумақтың тіркеуінде тұрса, сол аумақтың өкілдері олардың жағдайына жауапты болуы тиіс. Себебі көші-қон әр түрлі деңгейлі болуы мүмкін. Тұрғындар бір ауданның ішінде тұрғылықты жерін ауыстыруы – бір мәселе. Ал олардың бір аймақтың ішінде бірнеше елді мекенге көшіп-қонуы немесе басқа облысқа қоныс аударуы – мүлде басқа жағдай, - деді Ә.Сқақов. Тағы бір мәселе – білім беру, әлеуметтік қорғау және денсаулық сақтау жүйелерінің деректер базасында бірыңғай жүйенің болмауы. Мәселен, Білім және ғылым вице-министрі Бибігүл Асылова ұлттық білім беру жүйесі мен дәрігерлер платформасы арасында ықпалдастықтың жоқтығын растады. Сондықтан Үкімет басшысының орынбасары Е.Тоғжанов Цифрлық даму, инновациялар және аэро-ғарыш өнеркәсібі министрлігімен бірлесе отырып, бұл мәселені шешуді тапсырды. Сондай-ақ, вице-премьер бір айдың ішінде республика бойынша әлеуметтік-медициналық көмекке мұқтаж отбасыларды анықтауды, қиын өмірлік жағдайға тап болуы мүмкін тұрғындарға қолдау көрсету бойынша ведомствоаралық ынтымақтастық алгоритмін бекітуді жүктеді. Ералы Тоғжанов кеңейтілген жиыннан соң еліміздің отын-энергетика кешенінің мамандарын даярлау мақсатында құрылған өңіраралық кәсіптік орталыққа барды. Бұл оқу орны жатақхана, қонақ үй, асхана, акт және спорт залы сияқты бірнеше корпустан тұрады. Десе де, бүгінде мұнда оқу процесі әлі іске қосылмаған. Облыстық білім беру басқармасы өкілдері орталықта кәсіби мамандар мен техникалық сала қызметкерлерін дайындауды ұсынып отыр. Бұл жобаға өңірдегі ірі өнеркәсіп және ауыл шаруашылығы кәсіпорындары қатыса алады. Олар қазірдің өзінде өз қаражаттары есебінен орталық базасында зертханалар ашуға әзір. Осылайша, орталықта оқыту ғана емес, қайта даярлау, оның ішінде қысқа мерзімді курстар ұйымдастыру жүргізіледі. Кәсіптік және техникалық білім беру сапасын арттыру жөніндегі мәселе «Қайнар» мәдени-демалыс орталығында да талқыланды. Вице-премьерге бірден екі жоба таныстырылды. Олар - «Innova Tree» ғылыми-білім беру орталығы және республикада алғаш рет қолға алынған «Жаңа мамандықтар атласы» жобасы. Жұмысшы кадрларды дайындайтын колледждерді «Innova Tree» орталығына сенімді басқаруға беру есебінен оларды бәсекеге қабілетті оқу орындарына айналдыру көзделіп отыр. Бұл ретте облыс әкімі Әбілқайыр Сқақов нарықтың нақты сұранысын саралап, шын мәнінде керек мамандарды оқытуға баса назар аударылатынын атап өтті. Ал «BTS Education» компа-ниясының өкілдері «Жаңа мамандықтар атласы» туралы айтты. Сарапшылар облыстағы техникалық және кәсіптік білім беру мекемелерінде алдағы ондаған жыл аралығында жоғары сұранысқа ие болатын 40 жаңа мамандық бойынша оқу бағдарламаларын енгізу ісін жалғастыруда. Ералы Тоғжанов Екібастұздағы Естай атындағы музыка мектебінде де болды. Бүгінде мұнда 13 бағыт бойынша 670-тен астам бала білім алуда. Үкіметтік делегацияға домбыра бөлмесі, кітапхана және камералық зал таныстырылды. Вице-премьер оқушылардың ата-аналарымен, қосымша білім беру педагогтарымен тілдесіп, шығармашылық және спорт үйірмелерін жан басына шаққандағы қаржыландыру бағдарламасының тиімділігін талқылады. Осы жобаның нәтижесінде өткен жылдың өзінде Павлодар облысында 16 мыңнан астам бала мен жасөспірім бюджет есебінен төленетін түрлі бағыт-тағы секцияларға қатыса бастады. Сондай-ақ, 700-ге жуық ұстаз бен жаттықтырушы қосымша табыс табуға мүмкіндік алды. Сондай-ақ, мектептердің спорт залдарын жалға беру тәжірибесі туралы айтылды. Арнайы жабдықталған мұндай залдарда жеке секциялардың қатысушылары сабақтан тыс уақытта жаттыға алады. Әсіресе бұл жүйе спорттық инфрақұрылымы аз ауылдық жерлерде тиімділігін көрсетіп отыр. Ералы Тоғжанов павлодарлық биліктің бастамасын мақұлдап, бұл тәжірибені Қазақстанның басқа аймақтарына да таратуды ұсынды.

Облыс әкімінің баспасөз қызметі.