Басым бағыттар белгілі

Келер жылы өңірдің ауыл шаруашылығы саласын дамытуға 89 млрд теңге қаражат бөлінбек. Бұл – биылғымен салыстырғанда 2 есеге көп. Сәйкесінше, инвестициялық жобалар жүзеге асып, жаңадан жұмыс орындары ашылмақ.

Облыс әкімінің орынбасары Мейрам Өтешовтің айтуынша, биыл жоспарлардың бәрі табысты жүзеге асқан. Тіпті, кейбір көрсеткіштерді асыра орындаудың сәті түсіпті. Әрине, мұның бәрі - мемлекеттік қолдаудың зор нәтижесі. Облыстық ауыл шаруашылығы басқармасының басшысы Нұрболат Мақашевтің мәліметінше, осы жылы суармалы алқапты дамыту бойынша 8 жоба іске қосылған. Осылайша, өңірдегі суармалы жердің көлемі 136 мың гектарға жетіп отыр. 1 гектардан 16 мың тонна өнім алуға мүмкіндік туындағанын атап өткен жөн. Дәстүрлі егіншілікпен айналысатындар гектарынан небары 1 мың тонна өнім жинайтынын ескерсек, суармалы алқапты дамытудың тиімділігін есептей беріңіз.

- Келер жылы ұлттық жоба шеңберінде саланы дамытудың жоспары әзірленген. Жалпы құны 30 млрд теңгені құрайтын 13 инвестжоба жүзеге асады деп күтілуде. Оның басым бөлігі -
көкөніс сақтау қоймалары мен тауарлы сүт фермалары. Егіс алқабы шамамен 6 процентке (81 мың гектар) артып, 1 млн 554 мың гектарды құрайды деп жоспарлануда. Әсіресе, жем-шөп дақылдары алқабын 23 процентке, дәнді дақылдар алқабын 2 процентке, картоп алқабын 4 процентке арттыру көзделуде. Жергілікті ғалымдармен кеңесіп, көктемгі егіс жұмыстарына шамамен 23 мың тонна арзандатылған жанар-жағармайдың қажет екені анықталды. Қысқасы, басым бағыттар – басты назарда, - дейді Н.Мақашев. Мейрам Өтешов азық-түлік қауіпсіздігін қамтамасыз ету үшін келер жылы пияз бен орамжапырақ алқабын арттыруды тапсырды. Оған еш кедергі жоқ. Суармалы алқап жеткілікті. Заманауи қондырғылармен жабдықталған көкөніс сақтау қоймалары да аз емес. Бір атап өтерлігі, келесі жылы алғаш рет облыстық бюджеттен елді мекендердегі жарамсыз қалған жерлерді шалғынға айналдыру мақсатында қомақты қаражат бөлінбек.

Оралхан ҚОЖАНОВ

Количество показов: 788

Возврат к списку

Сарыарқа самалы, 20 қаңтар, бейсенбі

Раздел не найден.