Байдаланың жолы жаңаруда

СОҢҒЫ ЖАРИЯЛАНЫМДАР

14.06.2022

Байдаланың жолы жаңаруда

Қаладан таяқ тастам жерде орналасқан Кенжекөл ауылына қарасты Байдала және Долгое ауылдарында түйткілді мәселелер оң шешімін тауып, жыл өткен сайын халықтың әл-ауқаты жақсаруда. Соның ішінде, жол мәселесі де тұрақты назарға алынып, елді мекендердегі көшелер асфальтталып жатыр. Биыл да жүйелі жұмыстар жүргізіліп, бірнеше көшеге тас жол төселді.

«Жол қадірін жүрген білер» демекші, бұдан біраз жыл бұрын облыс орталығының іргесіндегі Байдала, Долгое ауылының халқы «жаңбырлы күні көшеде жүру мүмкін емес» деп базыналарын айтатын. Толарсақтан саз кешіп, белуардан балшық басудан әбден қажыған тұрғындар батпаққа былғанып, шұңқырға шалынып шаршадық деп шағымданатын. Ал қазір ондай әңгімелердің ауылы алыстады. Өйткені, әр жылы ауылдарда 3-4 көшеге тас жол салынып, тұрғындар өз алғыстарын айтып келеді. Ағымдағы жылы Кенжекөл ауылындағы бес көшенің жолы орташа жөндеуден өтпек. Бұған қалалық бюджеттен 133 млн теңге көлемінде қаражат бөлінді. Бүгінде жалпы ұзындығы 3,979 шақырымды құрайтын Саттарханов, Егемен, Ақсу, Болашақ, Желтоқсан көшелерінде жөндеу жұмыстары жүргізілуде. Мердігер «АВМ-98» ЖШС көп жылдар бойы арман болған жолдарды асфальттады. Бұдан бөлек, «Ауыл - ел бесігі» бағдарламасы бойынша қала бюджетінен 194 млн теңге қаражат бөлініп, Байдала, Долгое ауылдарында жолдарды жөндеу жұмыстары қарқын алды. «Қарағанды жолдары» ЖШС және «Дорстрой» ЖШС аталмыш елді мекендерде жол құрылысын бастап кетті. Атап айтқанда, Байдала ауылында Бәтжанов, Өзденов, Әзірбаев, Қуанова, Нұрпейісов, Дюженко көшелеріне асфальт төсеу жұмыстары жүргізілуде. Ал, Долгое ауылының тұрғындары Қазанғап би, Баспақов, Қимақ, Мұрагер көшелеріне асфальт жолдың салынғанына ризашылықтарын білдіруде.

Кенжекөл ауылдық округінің әкімі Жұлдыз Тәйкебаева мемлекеттік бағдарламалар жоғымызды бүтіндеп, барымыздың шырайын шығаруға сеп болып жатыр дейді. Даму даңғылына түскен аталмыш елді мекеннің тұрғындары да мемлекеттік қолдаудың шарапатын сезінуде.

- Бүгінгі таңда Кенжекөл ауылдық округінде жол жөндеу жұмыстары қызу жүргізілуде. Бұрын-соңды жөндеу жүргізілмеген жолдарға асфальт төселіп, ел игілігіне пайдалануға берілуде. Сондай-ақ, көптен бері жергілікті тұрғындардың өзекті мәселесіне айналған қоқыс полигоны да шешімін тапты. Ашығын айтсақ, мыңдаған қазақ ауылының маңы күл-қоқыс полигонына айналып кеткені жасырын емес. Қалыптасқан бұл сұмдықты биыл ретке келтірдік. Жергілікті билікке санитарлық жағдайларға тексеру жүргізіп, тиісті шараларды жүзеге асыру қажеті айтылды. Нәтижесінде, арнайы қаулы қабылданып, Кенжекөл ауылына 300 дана қоқыс контейнерлері орнатылмақ, - деді әкім.

Сонымен қатар, Жұлдыз Тәйкебаева жол жөндеу жұмыстарының сапасын бақылау үшін «Жол активтерінің сапасы» ұлттық орталығымен жұмыстың стандарттарға сәйкестігін тікелей қадағалайтын келісім-шарт жасалғанын мәлім етті.

Жыл сайын жолы жақсарып, көшесі көріктенген елді мекеннің биылғы жетістігі де талайдың аузында жүр. Көлік жүрсе, ақ шаңы аспанға көтерілетін көшелер асфальтталып, бюджеттен бөлінген қаржы осындай ақсап тұрған тұстарды жөндеуге мүмкіндік берді. Күрмеуі қиын болған қоқыс полигоны мен жол мәселесі осылайша жоба бойынша шешім табуда. Сонымен қатар, елді мекенде қазір бұдан бөлек ауызсу, жарықтандыру жұмыстары да жанданған.

Алтынбек ЕЛЕМЕСҰЛЫ.

Суреттерді түсірген - Есенжол Исабек.

Количество показов: 575

Возврат к списку