Демалыс қалай өтеді?

СОҢҒЫ ЖАРИЯЛАНЫМДАР

14.06.2022

Демалыс қалай өтеді?

Өкінішке қарай, облыстағы демалыс орындарында туристерге көрсетілетін қызметтің сапасы көңіл көншітпейді. Таулардың етегінде, көлдердің жағасында демалуға келушілер сервиске жиі сын тағатыны тағы бар.

Бұл кемшіліктерді реттеудің жолдары кеңейтілген мәжіліс барысында талқыланды. Облыстық кәсіпкерлік және индустриялық-инновациялық даму басқармасының басшысы Ернұр Жәутікбаевтің сөзінше, өңірдегі демалыс орындары бір уақытта 8 мыңнан астам адамды қабылдауға дайын. Бір адамға демалу үшін орта есеппен 9178 теңге керек. Баянауылда үш гид туристерге 13 бағыт бойынша турлар ұйымдасты-руды жоспарлап отыр. Торайғыров университеті мен басқарма өкілдері облыстағы курорттық аймақтардың танымалдылығын арттыру үшін «Ертіс-Баян» брендін ойластырып, логотип те жасап үлгеріпті.

- Қазіргі уақытта ресми органдардың сайтында жарияланған мәліметтер туристерге толық ақпарат бермейді әрі оларға ыңғайсыздық тудырады. Сондықтан бірыңғай сайт пен туристік-ақпараттық орталық ашу керек, - деген ұсыныс айтты Е.Жәутікбаев.

Бірақ облыс әкімі Әбілқайыр Сқақов алдымен сын-ескертпелерді жойып, атқарылған жұмысты көпшілікке таныстырудың амалдарын қарастыру қажеттігін айтты.

- Туризмге қатысты сын көп. Сондықтан біз оның даму бағытын нақты білуіміз керек. Логотипті бекітумен іс бітпейді. Өңірдегі көлдердің сандары, орналасқан жерлері, ерекшеліктері сынды бағыттардың барлығын саралап, соған сәйкес жұмыс атқару керек. Торайғыров университетімен бірлесе жасалған карта жұртшылыққа, әсіресе кәсіпкерлерге таныстырылуы тиіс. Ал туристік-ақпараттық орталық жазғы уақытта ғана емес, жыл-он екі бойы демалушыларға ақпарат ұсынатын алаңға айналуы қажет, - деген облыс әкімі жобаны әлі де жетілдіруді жүктеді.

Аймақ басшысы Әбілқайыр Сқақов облыстық білім беру басқармасының балалардың жазғы демалысын ұйым-дастыруға қатысты жоба-жоспарларында да кемшін тұстар барын айтып, оны толықтыруды тапсырды. Себебі нақты тұжырымдама жоқ.

- Білім беру басқармасы балалардың бос уақытын өткізудің ең оңай, қарапайым жолдарын ғана назарға алып, соған сай жоспар жасаған. Есесіне «Көпбалалы, аз қамтылған отбасы балалары қалай, қайда демалады?», «Отбасылық демалыстар қалай ұйымдастырылады?» сынды сауалдарға жауап жоқ. Үш ай аралығында еңбекке тартылатын жоғары сынып оқушыларының саны пандемия кезінде жұмыс істеген жеткіншектерден әлдеқайда аз. Мұның барлығы жүйелі жұмыстың жасалмағанын көрсетеді, - деді Ә.Сқақов.

Облыстық білім беру басқармасы басшысының міндетін атқарушы Роза Ақанованың айтуынша, биыл 1-10-сыныпта білім алатын 106 мыңнан астам оқушы лагерьлермен қамтылады. Өңірде мектеп жанындағы және профильді 784, қала сыртында 12 лагерь ашылады.

Құндыз ҚАБЫЛДЕНОВА.

Количество показов: 600

Возврат к списку