Егін алқабы – астық қалқаны

СОҢҒЫ ЖАРИЯЛАНЫМДАР

16.06.2022

Егін алқабы – астық қалқаны

Облыстық ауыл шаруашылығы басқармасының мәлімдеуінше, облыс бойынша көктемгі егіс жұмыстары толығымен аяқталды. Биылғы көктем мезгілінде ауа райының тұрақсыздығынан жұмыс қарқыны жиі тежелді. Десе де, түрлі қолайсыздықтарға қарамастан, шаруалар мен диқандар егін алқаптарында қыруар жұмыс атқарылғанын алға тартады.

Ағымдағы жылы 1 млн 920,3 мың гектар алқапта агротехникалық шаралар жүргізіліп, егіс алқабы 1 554,7 мың гектар немесе жоспардың 100 пайызын құрады. Облыс механизаторлары көктемгі температуралық қарама-қайшылықтарға қарамастан, 1 млн гектардан астам жердегі ылғалдылықты жауып, 294,6 мың гектар жерді соқалармен басып, 619 мың гектар алқапта егіс алдындағы өңдеу жұмыстарын жүргізді.

Биыл көктемгі дала жұмыстарын жүргізуге 4,1 млрд теңге қаражат бөлінді. Ал, субсидиялауға бюджетте 1,8 миллиард теңге қарастырылған. Егіс науқанына барлық модификациядағы 4 462 трактор және 245 егіс кешені жұмылдырылды.

Павлодар облысы әкімінің орынбасары Мейрам Өтешов өзінің Instagram парақшасында биыл егіс алқабы кеңейіп, өңірдегі ауыл шаруашылы-ғының әлеуеті артып келетінін жазды. Оның ішінде дәнді дақылдар 19,2 мың гектарға, күнбағыс 6,0 мың гектарға, картоп 1,7 мың гектарға, сәбіз 0,2 мың гектарға, қырыққабат 0,1 мың гектарға және пияз 0,2 мың гектарға ұлғайтылды.

- Облыстың ауыл шаруашылығы тауарын өндірушілері тыңайтқыштарды сатып алуға 17,8 мың тоннаға келісім шарт жасасты. Бүгінгі күні 16,1 мың тонна тыңайтқыштар тиелді. Бұл бағыттағы жұмыс әлі де жалғасуда. Қазіргі уақытта «минералды тыңайтқыштардың құнын субсидиялау» және «тұқым шаруашылығын дамытуды қолдау» бағдарламалары бойынша өтінімдер қабылдау жүзеге асырылуда, - деп жазды әкім орынбасары.

Үстіміздегі жылы егін алқаптарына майлы дақылдар 268,3 мың гектарға, оның ішінде күнбағыс 221,7 мың гектарға егілді. Бұл - жоспарланған көрсеткіштен бір пайызға артық. Сонымен қатар, биыл мал азығы дақылдары да жоспардағы көрсеткіштен жоғары тұр. Өңірдегі барлық жем-шөп дақылдары 102,9 мың гектарды құрады. Облыстың көкөніс өсірушілері де көктемгі егін егу науқанын аяқтап, күзгі өнімді жинау жұмыстарына ертеден қамданып отыр.

Ағымдағы жылы картоп 21,8 мың гектарға, яғни өткен жылдан 400 гектарға артық егілді. Көкөніс 7,5 мың гектарды, бақша дақылдары 2100 гектарды алып жатыр.

Айта кетерлігі, биыл аймақ басшысы Әбілқайыр Сқақовтың қолдауымен облыс бойынша азық-түлік қауіпсіздігін қамтамасыз ету және ауылшаруашылық дақыл-дарын өсірудің тиімділігін арттыруға қатысты бірқатар іс-шаралар қолға алынған. Жыл өткен сайын Павлодар облысының көкөніс, бақша және дәнді дақылдарды өсіретін егін алқаптары кеңейіп келеді. Сондай-ақ, егіншілікпен айналысатын шаруа-ларды субсидиялауға бөлінетін қаражат көлемі де ұлғайды.

Ауыл шаруашылығы басқармасы мамандарының айтуынша, жанар-жағармай мәселесі де толығымен шешілген. Тұқым, гербицитке, минералды тыңайтқыштарға қаржы бөлініп, ауыл шаруашылығы дақылдарының егіс алаңы артуда. Бұл соңғы жылдардағы жоғары көрсеткіш болып отыр. Сол себепті, биылғы егіннен диқандардың үміті зор. «Көктемгі егу жұмыстары аяқталғанымен, күзгі өнімді теру жұмыстары алдымызда» дейді олар. Диқандар биыл әр гектардан шамамен 10-15 центнерден өнім алуды көздеп отыр.

Алтынбек ЕЛЕМЕСҰЛЫ.
Сурет газет мұрағатынан алынды.

Количество показов: 489

Возврат к списку