«Елбасымен кездесу өмірімді күрт өзгертті...»

Домбырамен дәстүрлі қазақ әндерін нақышына келтіріп орындап, қазақ тілінде емін-еркін сөйлейтін жерлесіміз Алексей Лодочников бүгінде көпшілікті тәнті етіп жүр. Ол қазіргі кезде Нұр-Сұлтан қаласына қоныс аударған. Мемлекеттік тілді білуінің нәтижесінде ашылған мүмкіндіктер мен алдағы жоспарлары жөнінде әңгімеге тартық.

Ақберен Елгезек – Қазақстан Жазушылар Одағы төрағасының орынбасары, Қазақстан «Серпер» жастар сыйлығының, Т.Айбергенов атындағы және Мемлекеттік «Дарын» жастар сыйлығының, «Алтын қалам» қоғамдық сыйлығының иегері, «Қазақ әдебиетін қолдау» қоғамдық қорының жетекшісі. «Кентавр» ұлттық әдеби апталығының негізін қалаушы Ақберен Елгезектің туындысын назарларыңызға ұсынамыз.

- Сәлеметсіз бе, Алексей! Ертіс-Баян өңірінің сәлемін қабыл алғайсыз! Қазақша еркін сөйлейсіз. Тілді қайдан және қалай меңгердіңіз?

- Алдымен жерлестеріме жалынды сәлем! Жалпы, өзім 5 жасымнан бастап қазақ тілін меңгере бастадым. Туған жерім - Ақсу қаласы. Бірақ, балалық шағым Тереңкөл ауданындағы балалар үйінде өтті. Міне, бұл жердегі мен өмір сүрген орта, достарым, тіпті қазақ тілді мектепте білім алуымның барлығы қазақша үйренуде көп көмегін тигізді. Дегенмен, қазақша сөйлеу маған еш қиындық туғызбады. Қазақ тілі – мемлекеттік тіліміз, әр азамат оны білуі міндетті деп есептеймін.

- Бүгінде дәстүрлі әндерді жиі орындап жүрсіз. Сізді ән өнеріне баулыған кім?

- Домбыра шертіп, ән айтуға деген құмарлығым балалар үйінен басталды. Балалар үйінде домбыра үйірмесі жұмыс істеді. Тәрбиеші апайларымыз бір топ баланы сол үйірмеге жетеледі. Бұл қатарда мен де болдым. Алғаш рет домбыра ұстауды, оның қылын шертуді ұстазым Асқар Еркебұланов үйретті. Кейіннен Медғат Манапов, Амангелді Қожанов сынды дәстүрлі ән өнерінің майталмандарынан дәріс алдым. Қос ішекті қазағымның домбырасы - бүгінде сенімді серігім. Домбыраны шертетін уақытта бойым ерекше күйге енеді. «Нағыз қазақ – қазақ емес, нағыз қазақ – домбыра» демекші, ұлттық аспапты игеруімнің нәтижесінде қазақтың «сары баласы» біршама жетістікке жетіп келеді және әлі де жете бермек ниетте.

- Елбасымыз Н.Ә.Назарбаевтың алдында өнер көрсеткен едіңіз. Сізді жалпақ елге танымал қылған сол сәт туралы айтсаңыз...

- Елбасымен кездесу екінің біріне бұйыра бермейтін бақыт екені жасырын емес. Тұңғыш Президенттің жастарға деген мақсат-міндеті тым бөлек. Кез келген шарада келешек ұрпаққа мол сенім білдіретін Н.Ә.Назарбаевпен жолыққан сәт әлі жадымда. Бұл күн менің өмірімді жаңа бағытқа күрт өзгертті десем болады. Кездесу күні бойымды бір ерекше қуанышпен қатар, қобалжу сезімі биледі. «Жақсыменен өткізген бір күн, жаманның өтіп кеткен ғұмырындай» дейді ғой?! Бұл уақыт көзді ашып-жұмғанша тез өтті. Бірақ, барлығы мен ойлағаннан да керемет өткен болатын. Елбасының алдында ән салдым. Ал бүгінде, Елбасының қолдауы мен ықыласының нәтижесінде біршама іс-шараларға шақырту алып, әлемдік деңгейдегі әртістермен бір сахнада өнер көрсетіп келемін. «Қазақстанның 100 жаңа есімі» атты жобасының жеңімпазы атанған болатынмын. Айта берсем, өмірімде өзгерістер көп орын алды. Қазіргі таңда Елбасы Академиясында жұмыс істеймін. Жеткен жетістіктерім мен бағындырар шыңдарыма Нұрсұлтан Әбішұлы атамыздың қосқан үлесі зор.

- Қазақ тілін еркін меңгергеннің нәтижесінде біраз есіктер айқара ашылғаны жасырын емес. «Қазақстанның 100 жаңа есімі» жеңімпазы атандыңыз. Осы тұста Елбасының жастарға деген қамқорлығы мен ұсынған мүмкіндіктері туралы не айтасыз?

- Еңбек жолын қарапайым жұмысшы ретінде бастаған Елбасы жастарға үнемі қолдау білдіріп келеді. Әсіресе, Елбасымен кездесу бұйырған жастардың көпшілігі еліміздің әр саласында қызмет атқарып, тәуелсіз мемлекетіміздің дамуына үлестерін қосуда. Осы жастардың қатарында мен де бармын. Н.Назарбаев қашанда болашақтың кілті - жастардың қолында екенін айтып, озық ойлы жастардың өсуіне жағдай жасап келеді. Әрқашан ел игілігіне арналған бастамаларды қолдап, іске асыру үшін еңбек ету, армандау, алға қойған мақсатқа жету сынды қасиеттерді қалыптастыра білу керектігін айтып келеді. Мүмкін емес нәрсе жоқ екендігін Елбасымен кездесуден кейін ұғынғандаймын. Мысалы, бас шаhарымыз Нұр-Сұлтан қаласы көз алдымызда өркендеп қана қоймай, жастардың ордасы, мүмкіндіктер мекеніне айналды. Мүмкіндікті сәтті пайдаланып, өз бағытыңнан жаңылмай, жолды таба білу үлкен маңызға ие екенін ескеріп, қызмет жолымды бастадым. Мұның өзі – бізге үлкен жігер.

- Әлеуметтік желіде Қайықбаев деген атпен танымалсыз. Өзіңізді вайнер, блогерлік бағытта жиі байқап та жүрміз. Қазір немен шұғылданып жатырсыз?

- Қазіргі заманның талабына сай әлеуметтік желіні тиімді пайдалануды жөн деп санаймын. Сол себепті, қоғамда болып жатқан мәселелерді әзіл аралас шындықты бейнероликпен жеткізуге тырысып жүрмін. Әлеуметтік желідегі парақшамды жүргізу сүйікті хоббиіме айналды. Десе де, өзімді блогер деп санамаймын. Желі қолданушылары мені Қайықбаев есімі арқылы тануда.

- Сіз үшін Тәуелсіздік деген не? Бұл ұғымды қалай түсінесіз?

- Менің жасым 22-де. Ал биыл Тәуелсіздігімізге 30 жыл толып отыр. Тәуелсіз әрі бейбіт күннің ұрпағы ретінде бұл ұғым бізге көп нәрсені ұғындырады. Тәуелсіздік – әр адамның, ұлттың, халық пен елдің еркіндігі. Әуелі, менің түсінігімдегі тәуелсіздік - сіз және мен тыныстап отырған бақытты күн деп санаймын. Қайта жаңғырған ұлтымыздың рухы мен еркіндігіміз құнды.

- Еліміздің астанасымен болашақты байланыстырасыз ба? Алдағы мақсат қандай?

- Иә, әзірше Нұр-Сұлтан қаласындамын. Болашақта Алматы қаласына қоныс аудару ойда бар. «Адамның емес, Алланың дегені болады» дейді емес пе?! Дегенмен де жоспар көп. Дәл қазіргі сәтте еліме пайдалы үлес қосатын іспен айналысып, айналаға жақсылығымды шашып жүргеннен артық мақсат жоқ.

- Отбасы құру ойда бар ма?

- Әрине, ойда бар. Қазіргі таңда мансап жолында жұмыс істеуді көздеймін. Үйлену оңай, үй болу қиын екенін ескеріп, әлі де бұл маңызды қадамға дайын емес екенімді сеземін. Мүмкін алдағы 5-6 жылдан кейін деп ойлаймын.

- Жерлестеріңізге айтар тілегіңіз қандай?

- Барша қазақстандықтарды және жерлестерімді алдағы ұлық мерекемен шын жүректен құттықтаймын. Білімді, заманауи, белсенді қазақ тілді жастарымыз көбейе берсін. Ең бастысы, ел еңсесі биік, Тәуелсіздігіміз мәңгілік болсын!

- Сұхбат бергеніңізге рахмет!

Сұхбаттасқан – Махаббат ТӨЛЕБАЙ.