Ерлік үлгісін көрсетті

Мемлекет басшысы Қасым-Жомарт Тоқаевтың Жарлығымен Павлодар облысының аумағында 13 қаңтардан бастап төтенше жағдай алынып тасталғаны мәлім. Осыған орай облыс басшылығы орталық алаңда төтенше жағдай уақытында көрсеткен батылдығы мен қайсарлығы үшін ішкі істер департаментінің қызметкерлеріне, Ұлттық ұлан, шекаралық қызметінің жеке құрамына алғыс білдірді.

Орталық алаңда сап түзеп жүріп өткен құқық қорғау органдарының қызметкерлері елге қызмет етуге әрқашан дайын екендерін білдірді. Облыс әкімі Әбілқайыр Сқақов Қазақстан полициясында жанкештілік пен ерлік үлгілерін көрсеткендер аз емес екенін атап өтті. Олардың сенімді әрі бірлесе атқарған жұмыстарына тоқталып, 5 қаңтар күні өңірде болған тәртіпсіздіктер кезінде және төтенше жағдай режимі уақытында Павлодарда адам шығынына жол берілмегенін еске салды.

- Елдегі тұрақтылық пен тыныштық үшін әрбір қазақстандық азамат өз қызметтік борышына адал құқық қорғау органдарының қызметкерлеріне қарыздар. Күш құрылымдарының қызметкерлері, сардар сарбаздарға Мемлекет басшысы Қасым-Жомарт Тоқаевтың атынан алғыс білдіремін. Біздің барлық құқық қорғау органдарының қызметкерлері аянбай ерлік көрсетті және еліміздің мүддесі жолында адал екенін байқатты. Осындай қиын кезеңде арандатушылыққа бармай, заңдылық пен тәртіпті қамтамасыз ете алдыңыздар,-деді Әбілқайыр Бақтыбайұлы. Сондай-ақ аймақ басшысы барлық уақытша шектеу шаралары тоқтап, стратегиялық маңызы бар нысандар жұмыс істей бастағанын мәлім етті. Әкім аймақтағы жағдай биліктің бақылауында екенін атап өтті.

Алтынбек ЕЛЕМЕСҰЛЫ,

Суреттерді түсірген - Валерий Бугаев.

Количество показов: 643

Возврат к списку