Фотосуреттер сөйлейді...

Әр жанұяның бас тұлғасы әке ғой әрқашан. Сондықтан мен үшін де алдым-дағы асқар тауым - әкем. Менің әкем - Дүкенбайұлы Сәбит. Әкеге қарап өстік, әрине...

Үйдегі фотоальбомдарды ақтарып отырсам, суреттер арқылы бір ойлар келеді... Міне, соғыс жылдары, міне, еңбек еткен қызметі, міне, өмірдегі, еңбектегі жетістіктері, міне, туыстары, жолдастары және майдангер солдаттары. Менің әкем 1939 жылы Қызыл әскер қатарына шақырылды (Қызыл қоғам ауылы Лебяжі ауданы). Бірден Ленинград округіндегі әскери училищесін бітіріп, соғыста әскери байланысшы болды. Фин соғысына қатысты (Ленинград орманындағы суреттер дәлел). Ұлы Отан соғысы осы округте өтті, капитан атағына дейін жетті. Естуімше, музыканы өте сүйген, аспаптарды меңгерген (домбыра, мандол, скрипка) – оған дәлел сурет (Ленинград картасының түсында скрипкамен ойнап тұр). Ленинград симфониялық оркестріне де қатысыпты (біреулер ойнап береді, әкем оны қайталап ойнайды екен). Майдангер жолдас-тарымен (Алматы қ.) хат алысып тұрды, оған дәлел - келесі суреттер (Майдангер жолдастары: майор Кутуков И., ст. сержант Рюмина Л., капитан Рюмин Л., старшина Романов В. - 1944 жыл Варшава түбінде, Соболева маңайы). 1946 жылы Шығысқа (Моңғолия-Япония) жібереді, поездан, орта жолдан Үкіметтің қаулысы бойынша, мұғалімдер елге қайтсын деп, елге оралды. Содан бері ұстаздық жолында қызмет жасап, 1961 жылы «Қазақстанның еңбек сіңірген мұғалімі» атағы берілді. 1967 жылы қайтыс болды. Бір айтатыны, әкемнің жақсы, елге танымал азаматтар - жолдастары болды: Әкіжанов Қабжан, Ахметов Асаубай, Қалданов Елеуке, Нұрғалиев Жұбай, Сатыбалдина Мүнира... Үлкен аға болып, өмірді көрген, соғысты өткен кейінгі жолдастары: Дүйсенов Қалы, Оспанов Ілияс, Шаяхметов Тасболат, Қайырбаев Қанатбек, Қасенов Шәмкен, Тезекбаев Хабиболла, т.б. Өзім әке жолын қуып, ұстаздық қызметті таңдадым, оның ішінде музыка-сазгерлігім. Бүгінде - Ұлы Отан соғысының аяқталуына 77 жыл. Жеңіс күніне арнап, ақын-ғалым Серік Елікбай екеуіміз «Қазақ хандығы тарихынан» атты музыкалық-поэзиялық топтама және «Ұлы дала жырлайды» атты оратория, «Бауыржан Момышұлы» атты өлең-ән жаздық. Ақын Ғалымбек Жұматовпен бірлесіп «Жеңіс жолы» өлең-әні пайда болды. Бағасын беретін - сіздер, «Жеңіс күні» мерекесіне арнау деп біліңіздер.

Н.ДҮКЕНБАЕВ,

ҚР Мәдениет қайраткері.

Сөзін жазған - Ғалымбек Жұматов.

Музыкасы - Назымбек Дүкембай.

1. Жастығымыз соғыста алаулаған,

Сағыныш туған жерге сан аунаған.

Ерлікке, қайсарлыққа жетеледі,

Намыс болып шайқаста жалаулаған.

Қайырмасы:

Жеңіс жолы армандарды жалғаған,

Әділетті қолдаған.

Өнегесін ерлердің,