Газет ұтыс жариялады

СОҢҒЫ ЖАРИЯЛАНЫМДАР

07.06.2022

Газет ұтыс жариялады

Облыстық «Saryarqa samaly» және облыстық жастар бастамаларын дамыту орталығы бірлесіп Dombyra Party атты күй кешін ұйымдастырды. «Batyr mall» сауда-ойын-сауық орталығының алаңында өткен шара барысында басылым ұжымы өз оқырмандары арасында ұтыс ойынын жариялады.

Махаббат ТӨЛЕБАЙ

Газеттің бас редакторы Нұрбол Жайықбаев 93 жылдық тарихы бар басылымның оқырмандарына ерекше алғысын білдірді.

- «Saryarqa samaly» газетіне ағымдағы жылдың екінші жартысына «Қазпошта» және редакция арқылы 25 маусымға дейінгі аралықта жазылушылар арасында бағалы сыйлықтар ойнататын боламыз. Ол үшін жазылу түбіртегін және аты-жөніңізді 8 707 497 7057 нөміріне Whatsapp мессенджері арқылы жолдасаңыз жеткілікті. Бас жүлде – қой. Сонымен қатар өзге де жұбаныш сыйлықтары бар. Ұтыс нәтижесі шілде айында жарияланады. Әрдайым «Saryarqa samaly»-мен бірге болыңыздар! - деді Нұрбол Қанатбекұлы. Кешті тамашалауға келген басылымның тұрақты оқырманы Динара Тілебалдина қазіргі қоғамдағы газеттің рөлі зор екенін атап өтті.

- 9 жылдан астам өңіріміздегі аталмыш газетпен тығыз байланыстамыз. Саламыздың қиындығы мен жетістігі туралы мұнда жиі жариялаймыз. Кейде өз мақаламды шығарып тұрады. Жалпы, әлеуметтік қызметкердің жұмысын насихаттауда басылымның алар орны ерекше. Газет қызметкерлерінің өз ісінің маманы екенін де атап өткенім жөн. Оларға тек қана шығармашылық табыс тілеймін, - деді оқырман. Dombyra Party кешіне қатысуға өз еркімен ниет білдірген әнші-домбырашы Толқын Сүлейменқызы бірлескен ұлттық аспапты дәріптейтін ерекше жоба екенін айтып өтті.

- Ертіс жағасында бастау алған мұндай домбыра кештеріне қатысып келемін. Шынымен, жас өрен бойына өнеге көрсететін шараның бірегейі. Өйткені, талантты азаматтар қатары көбейіп, өнер үшін Баянауыл, Ақтоғай, Ертіс, Железин сияқты жер-жерден қатысуға келіп жатыр. Ал «Saryarqa samaly» қазақ мәдениеті мен әдебиетінің жандануына үлкен ықпалын тигізуде. Алар асу, шығар биіктеріңіз көп болсын! - деген лебізін жеткізді. Рухани шара аясында Павлодар қаласы Ленин кентіндегі Жаяу Мұса атындағы мәдениет үйінің халық ән үйірмесі - «Гауhартас» студиясы және «Сарыарқа» домбырашылар ансамблі өнер көрсетті. Оған қоса, Музыкалық колледж–дарынды балаларға арналған музыкалық мектеп интернатының жас өрендері ұлттық аспаптарда әндерден топтама орындап, көрерменнің ыстық ықыласына бөленді. Музыкалық колледждің қыздарынан құралған қылқобызшылар мен примақобызшылар «Алламжар», «Абылайхан», «Қасқыр», «Гауһартас» күйлерін орындаса, домбырашы ұл-қыздар ел арасында танымал «Адай», «Балбырауын», «Көрұғлы», «Көңілашар» күйлерін тамаша сарында тартып шықты. Атап өтерлігі, мәдени шарада газеттің инстаграмдағы «@saryarqa_samaly» парақшасына жазылып, ең әдемі пікір қалдырған оқырмандарға кәдесыйлар берілді. Айрықша рухани кешті ұйым-дастыруға атсалысқан облыстық жастар бастамаларын дамыту орталығына және Жаяу Мұса атындағы мәдениет үйі мен музыкалық колледж ұжымдарына алғысымызды білдіреміз. Оқыр-манмен байланысымызды арттыра түсетін шаралар алдағы уақытта жалғасатын болады. Құрметті оқырман! Басылымнан көз жазбай, тұрақты оқимын десеңіз, алдағы жартыжылдыққа жазылып қоюды ұмытпаңыз. Басылым байқауында бағыңызды сынап, күллі мұсылман қауым үшін қасиетті Құрбан айт мерекесі қарсаңында бас жүлде - қойды ұтып алуға тырысыңыз.

Суретті түсірген – Есенжол Исабек.

Количество показов: 814

Возврат к списку