Көктемнің әр күні

СОҢҒЫ ЖАРИЯЛАНЫМДАР

17.05.2022

Көктемнің әр күні – несібе

Павлодар ауданына қарасты Черноярка елді мекені маңында орналасқан «Арман» шаруа қожалығында көктемгі егіс жұмыстары қарқынды жүріп жатыр. Қазіргі таңда 120 гектар алқапта көкөніс түрлерін егіп, мамыр айының соңына дейін аяқтауды жоспарлап отыр. Сондай-ақ, арнайы егіс алқабын игеру үшін тапсырыс берген жаңа техниканың артықшылығын сынап көрмекші.

2014 жылы құрылған «Арман» шаруа қожалығының басшысы Ботагөз Ілиясованың айтуынша, мемлекеттік бағдарламалардың нәтижесінде көштен қалыс қалмаған екен.

- Қазіргі таңда егіс алқабы 120 гектарға жетті. Бұл жерлерге сәбіз, картоп және қызылша отырғызудамыз. Тұқымды сатып аламыз. Себебі, жыл сайын сорт түрлеріне байланысты өнімді жаңартамыз. Мысалы, биылғы жылы сәбіз, картоп және қызылшаны егудеміз. Кемінде, 1 гектарға 1 млн.-нан астам тұқым кетеді. Біздің өңірімізде ауа райы құбылмалы. Жел жиі болады. Әрине, бұл өнімнің шығуына тікелей байланысты. Шамамен, 60-70 тоннадай өнім түседі деп күтіп отырмыз, - дейді шаруа қожалығының иесі. Бүгінде «Арман» ШҚ тұрақты түрде 10 адамды жұмыспен қамтып отыр. Мұндағы мамандардың барлығы - әмбебап, өз ісінің шебері.

- Тұқым себу жұмыстары әлі де жүріп жатыр. Маусым айынан бастап жәндіктермен күрес басталады. Қожалықта 4 трактор, суару машинасы бар. Тағы да алқапты суару үшін арнайы машинаға тапсырыс беріп қойдық. Шілде айында келуі тиіс. Ал өнімді жинау кезінде қосымша адамдар жалдаймыз. Сәйкесінше, ақыларын төлейміз. Егіс жұмыстары аяқталған соң, күз айларына дейін күту, суару жұмыстары жалғасады, - дейді Б.Ілиясова. Сонымен қатар, шаруашылық басшысы жыл сайын бұл саланы қолдау керек ететінін де атап өтті.

- Жалпы, қай шаруашылық саласы болсын жақсы қаржыны талап етеді. Мемлекет тарапынан қолдауға ие қожалықтың біріміз. Екінің бірі қол жеткізе бермейтін техника «ҚазАгроҚаржы» ЖШС арқылы алдық. Жеңілдетілген әрі төмен пайызбен несиеге де қол жеткіздік. Бір сөзбен айтқанда, мүмкіндік өте көп. Тек қана еңбектену қажет, - дейді «Арман» ШҚ иесі Ботагөз Ілиясова. Атап өтер болсақ, биыл облыс бойынша жалпы егіс алаңы 1554,1 мың гектарды құрайды. Бұл өткен жылдың деңгейінен 85,2 мың га немесе 6%-ға артық. Ал өсімдік шаруашылығын қолдауға 3,9 млрд теңге субсидия бөлінген екен.

Махаббат ТӨЛЕБАЙ.

Количество показов: 1457

Возврат к списку