Күрделі жағдайға дайынбыз ба?

Соңғы уақытта ел көлемінде коронавирустық инфекция өршіп, эпидемиологиялық жағдай ушыға түсті. Павлодар облысында пандемия басталған екі жыл аралығында болмаған жағдай тіркелді. Бұрнағы күні бір тәулікте қауіпті індетті жұқтырған өңір тұрғындарының саны 800 адамнан асып кетті. Жергілікті медицина саласы мұндай күрделі жағдайға дайын ба? Дәрі-дәрмек қоры, білікті қызметкерлер мен емдеу мекемелерінде төсек-орын саны жеткілікті ме? Көпшіліктің көкейінде жүрген осы және өзге де сауалдарды облыстық денсаулық сақтау басқармасының басшысы Айдар Сейітқазиновке қойдық.

- Айдар Кенжетайұлы, осы жылды «жасыл» деңгеймен Павлодар облысы бірнеше күн дересінде бірден «қызыл» аймаққа өтті. Өңірде коронавирустық инфекцияның күрт таралуына не себеп?

- Эпидемиологиялық ахуал тек біздің аймақта емес, күллі ел көлемінде күрделене түсті. Бұған дейін жалпы республикадағы науқастардың саны көп дегенде 7 мыңға жетсе, қазіргі таңда Нұр-Сұлтан қаласының өзінде 6 мыңға жуық адамның қауіпті дертке шалдыққаны анықталуда. Мұның барлығы Павлодар облысындағы жағдайға да әсер етері сөзсіз. Сонымен қатар, қазіргі уақытта тұмау қатты жүріп жатыр. Құбылмалы ауа райы кезінде вирустық инфекциялар тез тарайды. Бұрындары бұл сырқаттың белгілері наурыз-сәуір айларында ғана байқалса, биыл ауа температурасының тұрақсыз болуына байланысты қаңтарда да көпшілікті қызудың жоғарылауы, жөтел сынды ауру белгілері мазалайтыны байқалуда. Бұл КВИ-дің кең таралуына әсер етуі мүмкін. «Дельта» штамының әлі беті қайтпағанын да естен шығаруға болмайды.

- Білуімізше, облыс аумағында әзірше «Омикрон» анықталған жоқ. Десе де, вирустың дәл осы штамының белгілері байқалып жатыр. Бұл қалай болғаны?

- Иә, ресми түрде бұл штам өңірде тіркелген жоқ. Себебі жергілікті ПТР-талдау зертханалары короновирустық инфекцияның бар-жоғын ғана анықтай алады. Оның «Дельта» немесе «Омикрон» екенін растайтын мүмкіндік жоқ. Сондықтан тиісті талдамалар Алматы қаласындағы зерттеу орталықтарына жолданды. Бүгінгі ахуалды сараптай отырып, штаммның бұл түрі ресми түрде тіркелмесе де облыста таралып жатыр деген болжам бар. «Омикронның» ерекшелігі – жұғу деңгейінің жоғары болуы. Сондықтан тұрғындардан санитарлық талаптарды қатаң сақтауды сұраймыз.

- Келесі аптадан бастап білім беру мекемелерінің штаттық режимдегі оқу жүйесіне көшуіне рұқсат берілді. Бұл індеттің одан әрі таралуына кері әсер етпей ме?

- Оқу орындарының басшылығы санитарлық талаптарды қатаң сақтаса, яғни 600-ден астам оқушы білім алатын мектептер балалардың тек 50 пайызын қабылдаса, жағдай қиындай қоймас. Шәкірттер ата-аналарынан, бауырларынан вирус жұқтырып алса, бұрынғыдай тек сыныптар карантинге жабылуы мүмкін. Негізі, жыл басынан бері қауіпті індетті жұқтырған балалар саны айтарлықтай көбейгені байқалады. Қаңтар айының алғашқы күндері шамамен 10 бала стационарлық жағ- дайда ем қабылдаса, бүгінде 75 жеткіншек ауруханаларға жатқызылды. Бірақ олардың қатарында ауыр жағдай жоқ. Тағы 171 жасөспірім амбулаторлық түрде дәрігерлердің бақылауына алынды.

- Эпидемиологиялық жағдай күн сайын күрделеніп барады. Жергілікті денсаулық сақтау саласы тұрғындарға дер кезінде ем-дом көрсетуге дайын ба? Емдеу орындарындағы төсек-орындар саны жеткілікті ме?

- Өңірде медициналық қызметкерлердің, дәрі-дәрмектердің, аппараттар мен төсек-орындардың саны жеткілікті. Жағдайдың одан әрі ушығуы мүмкін екенін ескеріп, бірнеше шаралар жоспарын дайындадық. Мәселен, қауіпті індетті жұқтырғандар саны күрт өссе, облыс аумағындағы 4 мыңға жуық төсек-орынның барлығын жұмылдырамыз. Қазір- гі уақытта тек 1280 орын ашылды, оның 42 пайызы толық. Реанимациялық 130 орынның 16 пайызында науқастар ем қабылдауда. Тұрғындар өздерін және жақындарын күтіп, төсек-орынның барлық қорын пайдалануға дейін жеткізбейді деген үміттеміз.

- Ақпаратыңызға рақмет!

Әңгімелескен – Құндыз ҚАБЫЛДЕНОВА.

Количество показов: 734

Возврат к списку