Көрікті әрі қолайлы болуы тиіс

Облыс әкімі Әбілқайыр Сқақов облыс орталығында жөндеуден өтіп жатқан бірқатар құрылыс алаңдарын аралады. Әлеуметтік нысандар жыл соңына дейін іске қосылатын болады.

Мәдениет үйі болмаған

Аймақ басшысы ең алдымен қалаға жақын орналасқан Павлодарский ауылында салынып жатқан мәдениет үйінің құрылыс жұмысымен танысты. Ауылда 30 жылдан соң мәдениет үйі бой көтермек. 300 орынды мәдениет үйінің құрылысы өткен жылдың желтоқсан айында басталған. Айта кетейік, бұл ауылда 30 жылға жуық уақыт бойы ауыл тұрғындарына арналған мәдениет үйі болмаған. Қазірде аумақ абаттандырылып, ғимарат қасбеті салынуда, ішкі әрлеу жұмыстары, мәдениет үйінің аумағы мен саябақ аймағы жарықтандырылуда. Құрылыс жұмысына өткен жылы 100 млн, биыл 476 млн теңге қаражат бөлінген. Нысан келесі жылы пайдалануға берілмек. Алайда құрылысқа жауапты мердігер «КазЕвроСтрой» ЖШС директоры Аслан Құсайынов құрылыс жұмыстарын жыл соңына дейін аяқтауға бар күшін салатынын айтты. Облыс әкімі Әбілқайыр Сқақов қала әкімі Асайын Байхановқа жұмыс сапасын қадағалауды міндеттеді.

- Ең бастысы, жұмысты сапалы және уақытылы аяқтау қажет. Ғимарат жылы болуы тиіс. Кезең-кезеңімен мекеме штатын толтырып, басшылықты бекітіп, жиһазбен қамту керек, – деді өңір басшысы. Ғимараттың бірінші қабатында: үйірме сабақтарына арналған бөлмелер, хореография залы, 300 орындық аудитория, әкімшілік бөлмелер, екінші қабатында проекциялық бөлме, радиоорталық болады. Бұл бөлмелер дыбыс және проекциялық жүйелерге, сондай-ақ, сахналық жарық-тандыру жүйесіне техникалық қызмет көрсетуге және басқаруға арналған.

Тұрғындар дән риза

Торайғыров көшесі, 6-үй тұрғындары аулаішілік аумақты абаттандыру бойынша жобаны қолдағаны үшін облыс басшылығына алғыс айтты. Мұнда қыркүйек айында «Халық қатысуындағы бюджет» бағдарламасы бойынша балалар ойын алаңдары, спорт тренажерлері, бірнеше демалыс аймағы салынған. Көшедегі жарықтандыру жұмыстары да аяқталуға жақын. «Строй Монтаж 2008» ЖШС директоры Берік Сұлтанбековтің айтуынша, жоба қараша айының ортасына дейін аяқталады. Әбілқайыр Сқақов әр санаттағы адамдардың мүддесін ескеру керектігін, алайда құрылыс уақытының маңыздылығына емес, жұмыстың сапасын бақылау қажеттігін айтты.

- Жұмыс сапасы жоғары болуы маңызды. Басты назарды соған аудару қажет. Негізі бұл жоба көктем айларында қолға алынуы қажет еді. Енді қателіктерді жібермеу қажет. Сапасын аула тұрғындары, балалар бағалайтын болады. Себебі, бұл алаң тұрғындар үшін салынуда, - деді аймақ басшысы. Облыс әкімі қала әкіміне тұрғындар өтінішін тыңдап орындауға тапсырды. Биыл «Халық қатысуындағы бюджет» бағдарламасына облыс орталығында 120 млн теңге бөлінді. Жоспарда келесі жылы соманы 1 млрд теңгеге дейін арттыру бар.

Құрылыс аяқталуда

«Достық» шағын ауданында сорғы станциясының құрылысы аяқталуда. Нысан іргетасы қаланып, өрт сөндіру резервуары, қаладан ЖЭО-1-ге қарай судың жұмсалуын өлшеуіш қондырылды. Төртінші сорғыны орнату үшін қажетті құрал-жабдықтар орнату жүргізуде. Үш сорғыны іске қосу бойынша іс-шаралар қолға алынуда. Жоба құны 204,3 млн теңге. Өңір басшысы қала әкіміне ауа температурасының -30 градусқа дейін төмендеген кездегі ОНС-6 жұмысын тексеруді тапсырды. Сонымен бірге, жылу желілерін цифрландыру да қала басшылығына тапсырылды. Кез келген штаттан тыс оқиға цифрлық тарихта қалуы тиіс. Дайындық және жөндеу жұмыстарының алдында барлық гидравликалық сынақтар «Цифрлық баламадан» өтуі тиіс. Сол жерден осал тұстарды көретін боламыз. Бағдарламаны ойдағыдай жүзеге асырсақ, маусымдық жөндеу жұмыстарына жұмсалатын қаражатты 30-40%-ға қысқартамыз, - деді Ә.Сқақов.

Саябаққа өң берді

Сапар соңында өңір басшысы Гагарин саябағының ретке келтіру жұмыстарымен танысты. Биылғы қыркүйекте саябақтың барлық бөліктері біртұтас аумаққа бірік-тірілді. Балаларға арналған ойын алаңдары, спорт тренажерлері, демалыс аймақтары, баскетбол, футбол алаңдары, қырлы кеспе, сыртқы жарықтандыру, веложүгіру жолақтары және ағаш егу жұмыстары жүргізілуде. Саябақтың құрылыс жұмысына жауапты мердігер «ЭкспоМегаСтрой» ЖШС директоры Бақытжан Қасымовтың айтуынша, 15 қарашаға дейін аяқталады.

- Құрылыс жұмысы осы айдың ортасына дейін аяқтау жоспарда. Саябақты қайта құру жұмыстары нәтижелі жүруде. Бұрынғы автожолда орындықтар, әткеншектер, ойын алаңы, құрғақ субұрқақ пайда болды. Сондай-ақ, масалардан құтқарушы шағын архитектуралық форма – инелікті орнату жоспарланған. Ә.Сқақов бір кезде Гагарин саябағына тәжірибе жасау идеясы дұрыс болмағанын айтып, қолданыстағы саябақтарды қайта құру кезінде көше инфрақұрылымымен жабдықтап, бар аумақты абаттандырумен айналысу қажеттілігін және қандай жағдай болмасын ағаштарды кеспеу керектігін еске салды.

- Орталық мешіттің тәжірибесін ескеретін болсақ, онда ешбір ағашты кесіп тастаған жоқпыз. Тек жолдарды үлкейтіп, ойын алаңдарын, құрғақ субұрқақ, тренажерлер орнатып, саябақты төрт жағынан да аштық, - деді аймақ басшысы. Әбілқайыр Сқақов Асайын Байхановқа саябақты сапалы модернизациялау мәселесін бақылауға алып, жұмыстарды белгіленген уақытта аяқтауды міндеттеді.

Айдана БОРАНБАЕВА.

Суреттерді түсірген - Валерий Бугаев.