23.06.2022

Үлгі болатын үздіктер көп

- Ержан Нағызханұлы, бүгінде Павлодар облысында қанша мемлекеттік қызметші бар? Олардың қатарында жастардың үлесі қанша? Жалпы, өңірде кадр тапшылығы байқала ма?

- Қазіргі кезде аймақтағы мемлекеттік мекемелерде барлығы 4325 штат бар. Іс жүзінде 4 063 мемлекеттік қызметші тұрақты түрде еңбек етіп келеді. Олардың қатарында жастардың үлесі аз емес. Атап айтар болсақ, бүгінгі таңда 579 жас осы салада жұмыс істейді. Бұл ретте жыл сайын жастардың қатары артып келе жатқаны ерекше қуантады.
Кадрмен қамту мәселесіне келер болсақ, әзірше 263 жұмыс орны бос тұр. Мәселен, соңғы деректерге сүйенсек, Ертіс, Тереңкөл аудандарына қарасты кейбір ауылдарда 5-6 бос орын бар. Меніңше, бұл мәселе елді мекендердің аудан мен облыс орталығынан едәуір алыста орналасуы, лауазымдардың уақытша болуына байланысты туындап отыр. Ал жалпы алғанда өңірде кадр тапшылығы бар деп айта алмаймын.

- 2021 жылдың 1 шілдесінен бастап еңбекақы төлеудің жаңа жүйесі енгізілгені белгілі. Еңбекақының өсуі жұмыс сапасына әсер етті ме?

- Былтыр қолға алынған жаңа жүйеге сәйкес, мемлекеттік қызметшілердің жалақысы орындалатын жұмыстың қиындығы мен лауазымның деңгейіне байланысты шамамен екі есе көбейді. Соның нәтижесінде кадрлар тұрақтылығы сақталатын болды. Бұрынғыдай жиі ауыс-түйіс жоқ. Тіпті, бір бос орынға «таласатын» үміткерлердің саны бірден екі есе өсті. Бұл өз кезегінде бәсекелестіктің артуына, мемлекеттік қызметке неғұрлым білімді, білікті мамандарды көптеп тартуға оң әсер етті. Қысқасы, орталық органдар департаменттері, жергілікті атқарушы органдар қызметкерлерінің айлығы жеке секторда жұмыс істейтін мамандардың еңбекақысына жақындап, теңесе бастаған соң мемлекеттік қызметке келуге ниетті адамдардың саны артты. Бірақ бұл ретте мәселе тек қаржылай жағдайды жақсартуға тірелмеуі тиіс. Алдымен адамның елдің игілігі үшін нәтижелі жұмыс істеуіне ниеті болуы керек. Содан соң атқарған еңбегіне қарай көңілге қонымды ақы ала алады.

- Сондай-ақ, былтыр алғаш рет ауыл әкімдерінің сайлауы өтті. Сол тұста сайлаушылардың басым дауысына ие болып, басшы атанған азаматтардың іске кіріс-кеніне бір жылдың жүзі болды. Олардың осы уақыт аралығындағы жұмысына қандай баға берер едіңіз?

- Жалпы, ауыл әкімдерінің сайлау - мемлекеттік аппаратты жаңғырту жолындағы маңызды қадамдардың бірі. Кандидаттардың мемлекеттік қызмет саласындағы заңнама талаптарына сәйкестігі сайлау комиссиясы ұсынатын құжаттардың негізінде уәкілетті орган, яғни мемлекеттік қызмет істері Департаментімен белгіленеді. Жаңадан тағайындалған әкімдерге кейін қайта даярлау курстары ұйымдастырылды. Аудан-қала мен басқарма басшылары тәжі-рибелерімен бөлісті. Осындай кездесулер барысында жаңадан сайланған әкімдердің жұмысқа деген құлшынысы зор екені байқалады.
Ал сайланған әкімдердің жұмысына бірінші кезекте оларды таңдаған тұрғындар баға берді. Нақты нәтиже, бірлескен іс – барлығы сол кезде көзге көрінеді. Сондай-ақ, ауыл әкімдері әкім-шілік лауазымның E-R-1 санаты болғандықтан, «Мемлекеттік қызмет» туралы Заңға сәйкес мемлекеттік қызметшілер жұмысының тиімділігі мен сапасын айқындау мақсатында олардың жұмысын бағалау жүргізіледі.

- Әлеуметтік желі дамыған уақытта әкімнің шалыс басқан әр қадамы интернет қолданушыларының талқысына айналып жататыны рас. Мәселен, қардың түскеніне байланысты түсірілген «кешірім» видеосы, малды жайылымға қосуға қатысты туындаған дау-дамайдың бейнежазбасы кеңінен тарап кетті. Осындай жағдайлар алдағы уақытта қайталанбас үшін  қайтпек керек?

- Мемлекеттік қызмет істері департаменті алдын алу шараларын тұрақты түрде жүргізіп жатқанына қарамастан, кейбір мемлекеттік қызметшілер тарапынан әлі де Әдеп кодексінің нормалары бұзылатыны рас. Десе де, жоғарыда аталғандай жағдайлар сирек кездеседі. Мемлекет басшысы Қасым-Жомарт Тоқаев жақында өткен құрылтайда атап өткендей, өкінішке қарай, «Бір қарын майды бір құмалақ шірітеді» деген де бар. Ал түптеп келгенде мемлекеттік қызметте адал әрі білікті кадрлар көп. Олар өңірдің, еліміздің дамуы үшін аянбай еңбек етуде. Бұл ретте Президенттік жастар кадрлық резервінің мүшелері Дидар Ибраев, Дархан Мырзабаев, Сағыныш Нұркимбаев сынды азаматтарды атап өтуге болады. Сонымен қатар, «Үздік ауыл әкімі» республикалық жобасының жүлдегері Меруерт Мадағұлова өзінің туған ауылы - Башмачин ауылдық округі әкімнің қызметін жемісті атқаруда. Өзгелерге үлгі боларлық осындай мамандар мемлекеттік қызметтің мәртебесін арттыра түседі.

- Жасыратыны жоқ, қазір жастардың көбі мемлекеттік қызметке келген соң бірден басшы болуды қалайды. Сіздің ойыңызша, жетекші  қызметке жету  үшін  қанша  уақыт  керек? Жалпы, жұмыстың нәтижесі маңызды  ма,  әлде  лауазымның атауы маңызды ма?

- Мемлекеттік саясатты іске асыруда жас мемлекеттік қызметшілердің де үлесі бар. Осы орайда Президенттік жастар кадр резерві оларға серпін беретін баспалдақ деп айтуға болады. Айталық, өткен жылы резервке іліккен Дидар Ибраев облыс әкімі аппаратының басшысы, Ержан Досымханов облыс прокуратурасының Үкім-дердің орындалуын қадағалау басқармасы бастығы лауазымдарына тағайындалды. Сондай-ақ, облыстың цифрлық технологиялар басқармасының басшысы болып 50 резервшінің қатарына енген Дархан Мырзабаев лайық деп танылды. Яғни, бұл сынақ еңбек етуге ниетті жастарға мол
мүмкіндік беріліп отырғанын айғақтайды.  
Оған қоса, қабілетімен, жетіс-тігімен, еңбексүйгіштігімен көзге түсіп, табысты еңбек еткен мамандардың лауазымы меритократия қағидаты бойынша жоғарылайды. Былтыр жоғары тұрған лауазымдарға 102 мемлекеттік қызметші тағайындалды. Бұл қағидат аудандық деңгей-лерде де сәтті жүзеге асуда.
Жалпы, жетекші қызметті иеленудің белгіленген нақты уақыты, формуласы жоқ. Басқа қызметтердегі сияқты мемлекеттік жұмыста да мамандар талапты, табанды екенін, қолынан іс келетінін көрсете білсе, лауазымы жоғарылауы әбден мүмкін. Десе де, алдымен мансапты көтеруге емес, адал әрі нәтижелі жұмыс істеуге ден қойған дұрыс болар.

- Әңгімеңізге рақмет! Кәсіби мереке құтты болсын!

Сұхбаттасқан – Құндыз ҚАБЫЛДЕНОВА.

Количество показов: 587