Ұлтқа қызмет – мінезден

СОҢҒЫ ЖАРИЯЛАНЫМДАР

19.05.2022

Ұлтқа қызмет – мінезден

Сәкен Сейфуллин атындағы Қарағанды облыстық академиялық қазақ драма театры Ертіс-Баян өңіріне гастрольдік сапармен келді. Арқаның ақсарайы жұртшылыққа Қанат Жүнісовтің «Ұлтқа қызмет» деректі-көркем драмасын ұсынды. Әлихан Бөкейханов бастаған Алаш арыстарының ел мен жерге құрметі, ұлтқа адал қызмет етуді насихаттауды көздеген қойылым көрерменнің шексіз қошеметіне бөленді.

Махаббат ТӨЛЕБАЙ

Қазақстанның еңбек сіңірген әртісі, Сәкен театрында жарты ғасырдан астам уақыт қызмет атқарып жүрген Кеңес Жұмабектің сөзінше, Кереку жері - ерекше әрі естен кетпес сәттерге толы мекен.

- Бұл өңір табиғатының сұлулығымен, жақсы да жайсаң жандарымен, зиялы қауым өкілдерінің білімділігімен жадымда сақтаулы. Алматы қаласындағы театр студиясында Әбдрахманов есімді азамат оқыды. Мен Жайықтың жағасында ер жеттім. Ал ол Ертіс өзенінің бойында туып-өскенін айтатын. Осындай азаматпен дос болғанымды мақтан етемін.Шығармашылық кәсіби актер ретінде тұсауымды кескен - Павлодар қаласы. Ең алғашқы марапатымды да Ертіс-Баян жерінен алған болатынмын. Бүгінгі қойылым қазақ театр сахнасында әлі қойылмады. Театр басшысының арнайы тапсырысымен дайындалған спектакль болып табылады. Мұндағы мақсат – бүгінгі және келер ұрпаққа тарихи шындықты, әсіресе Алаш азаматтарының ұлт жолындағы ерлігін көрсету. Мұнда Лениннің образын сомдаймын. Ұлт болып жұмылуымызға кедергі болған сол бір кезеңнің ауыртпалығын көрсететін боламыз, - дейді Кеңес Жұмабек. Ал театр актері Сұлтан Серікұлы «Ұлтқа қызмет» қойылымы 1 ай көлемінде дайындықтан өткенін атап өтті.

- Маған қазақтан шыққан тұңғыш заңгер Жақып Ақбаев рөлі берілді. Әрбір образдың астарын ашу тар жол, тайғақ кешумен келеді. Әсіресе, портреттік тұлғаны ойнау - қиынның қиыны. Дегенмен, білім мен тұлғаны зерттеудің нәтижесінде барынша Жақып Ақбаевтың келбетін қолдан келгенше сомдауға тырыстым. Біз алдыңғы буынға қарап бой түзейміз. Ұлттық құндылығымыз тарихты ұмытпайық, - деп түйіндеді актер.

Дастан БЕКНҰР, көрермен

- Сейфуллин атындағы Қарағанды облыстық академиялық қазақ драма театрының қойылымы Алаш арыстарына арналған екен. Бұл қойылым тек Сәкен театрының сахнасында емес, барша еліміздегі қазақ театрларында қойылуы тиіс. Өйткені, келер ұрпаққа өткен тарихымызды тануда ауадай қажет қойылым. Спектакль соңында жігерленбей, қазақ болып туып, Әлихан мен Ахметтердің ұрпағы екеніңе мақтанбай кету мүмкін емес. Театр ұжымына ерекше алғыс. Шығармашылық табыс тілейміз!

Количество показов: 547

Возврат к списку