Мүмкіндігі мол орталық

Павлодар қаласындағы «Жоғары электроника және коммуникациялар колледжі» базасында «Жас маман» жобасын іске асыру мақсатында «Мобильді робототехника» және «Ақпараттық кабельдік желілер» бағыттары бойынша құзыреттік орталықтар ашылды.

Махаббат ТӨЛЕБАЙ

Аталған құзыреттік орталықтың ашылу салтанатына облыстық білім беру басқармасы басшысының орынбасары және колледждің әлеуметтік серіктестері - «Қазақтелеком», «Транстелеком» АҚ, «PCN-101» ЖШС, «SNN company» ЖШС сынды өзге мекемелер өкілдері қатысты. Меймандарға Worldskills әлемдік стандарттарына сәйкес келетін жаңа жабдықтары бар дәрісханалар көрсетілді. Мобильді робототехника бойынша студенттер роботтарды құрастыру, бағдарламалау және басқарудың жұмыс барысын таныстырды. Оқу-өндіріс жұмысы бойынша басшы орынбасарының міндетін атқарушы Асқар Ахметшаиховтың айтуынша, бұл құзыреттілік орталықтар біздің студенттерге болашақта жұмысқа орналасуда артықшылықпен қатар кәсіби маман ретінде қалыптасуына септігін тигізеді.

- Құзыреттік орталықта жұмыс берушілер қолданатын жабдықтармен жұмыс істеу кезінде студенттер қажетті білім алады. Мұнда жұмыс берушілер, яғни әлеуметтік серіктестеріміз қолданбаған құралдар бар. Алдағы уақытта олармен тәжірибе жасаймыз. Мұның барлығы әлеуметтік серіктестермен өзара әрекеттесуді жаңа деңгейге көтереді. Бүгінгі таңда құзыреттілік орталықтар екі бағыт бойынша ашылды. Бірі - «Мобильді робототехника» болса, ал ендігі бір орталық - «Ақпараттық кабельдік желілер». Олар тек біздің колледж студент-теріне ғана емес, сонымен қатар өзге де білім мекемелеріне, өзінің біліктілік деңгейін арттыруды көздейтін, жұмыс істейтін буынға да қолжетімді, - дейді А.Ахметшаихов. Жалпы, колледжде электроника бойынша зертхана жұмыс істейді. Қазіргі таңда студенттерді Worldskills чемпионатына дайындау жүріп жатыр. Қонақтар мен әлеуметтік серіктестер «Ақпараттық кабельдік желілер» құзіреттілік орталығында байланыс қызметтерін көрсету барысында тәжірибеде қолданылатын соңғы үлгідегі жабдықтармен танысты. Мұндай орталықтардың ашылуы оқытушылар мен студенттерге білім беру бағдарламаларын кәсіби қызметке біріктіруге жаңа мүмкіндіктер береді. Сондай-ақ, жұмыс берушілермен ынтымақтастық перспективаларын кеңейтіп қана қоймай, орталықтар әртүрлі деңгейдегі Worldskills чемпионаттарын дайындау және өткізу үшін базалық алаң болып есептеледі. Еске салайық, «Жас маман» жобасы қатарына әр өңірде сұранысқа ие 100 кәсіп бойынша 180 колледж енген. Бұл тізімде облысымыздағы 10 білім мекемесі бар.

Суретті түсірген – Есенжол Исабек.

Количество показов: 935

Возврат к списку