Мұнай өнімдері экспортын шектеуді ұзарту дұрыс па?

Бүгінгі таңда елдегі үш мұнай өңдеу зауытының екеуі жаңғыртылып, ішкі нарықты жеткілікті көлемде отандық өнімдермен қамтамасыз етуде. Сондай-ақ, былтыр Үкіметтің жанар-жағармай экспортын шектеу жөніндегі қаулысы мұнай өнімдерінің бағасын тұрақтан-дырды. Үкімет мүшелері мұнай өнімдеріне қойылған шектеуді ұзартуды ұсынып отыр. Мұндағы мақсат - бағаның шарықтап кетуіне жол бермей, жанар-жағармайдың қосымша қорын жасақтау. Алайда, жанар-жағармайды экспорттауға қойылған шектеу мұнай өңдеу зауыттарына әсер етпей қоймасы анық. Осы мәселені «Алаң» қатысушыларының талқысына салдық.

Болат АҚШОЛАҚОВ, ҚР Энергетика министрі (пікір интернеттен алынды):

- Жанар-жағармайды мамыр айына дейін экспорттауға қойылған уақытша шектеу мерзімі ұзартылады деп жоспарланып отыр. Мақсатымыз – бағаның шарықтап кетуіне жол бермеу. Біз ақылдаса келе бұл жайттың алдын алуды ұйғардық. Бағаны қалыпты ұстап тұрғаннан бөлек, көтерме жеткізушілердің меншігінде жеке мұнай базаларының болуына баса мән береміз. «Қазмұнайгаз» ұлттық компа-ниясының базасында мұнай өнім-дерінің 150 мың тоннаға жуық қосымша қоры жасақталады. Сондай-ақ, «Қазақстан теміржолы» акционерлік қоғамының базасындағы сыйымдылығы 50 мың тоннадай болатын қойманы пайдалану ойда бар. Сондай-ақ, бұл арқылы нарықтағы «өнімсіз делдалдарды» тізбектен шығару қажет.

Қобланбек ҚОЖИН, «Blue star PV» ЖШС негізін қалаушы, Павлодар қалалық мәслихат депутаты:

- Мұнай өнімдерін экспорттауға қойылған шектеу экспорттаушы компанияларға қолбайлау болмақ. Десек те, шектеу қойылмаса, бағаның шырқырап кететіні анық. Мысалы, одақтас Ресейдің бізбен көршілес қалалары - Новосібір, Омбы, Барнауылда АИ-92 бензинінің литрі 276 теңге тұрады. Сондықтан, ішкі нарықтағы баға халықтың табысына сәйкес болуы қажет. Тағы бір айтатын мәселе, біздің зауыттарымыз шығаратын өнімнің сапасы жақсартуды талап етеді. Мысалы, біздің мазутты пеш отыны түрінде сатып ала отырып, еуропалықтар одан жоғары октанды мотор отынын шығарады. Біздің зауыттар, өкінішке қарай, олардан технологиялық жағынан артта қалып отыр. Жанар-жағармай бағасын еркін нарыққа жіберу үшін, халықтын табысын арттырып, балансты қамтамасыз ету қажет. Себебі оның құнын сұраныс пен ұсыныс айқындаса, жанар-жағармай одақтас елдердің тұтынушыларына «ағып» кете баратыны анық.

Арман АЙДАРҒАЗИНОВ, көлік жүргізуші:

- Бензин бағасының көтерілуі тұрмысқа қажетті барлық тұтыну тауарларының құнына тікелей әсер ететіні сөзсіз. Жанармай бағасының көтерілетіндігін жыл сайын әбден запы болып қалған автокөлік жүргізушілері жақсы сезінеді. Былтыр Энергетика министрлігі мұнай өнімдерін сыртқа тасымал-дауға шектеу қойды. Бұл - дұрыс шешім. Себебі, алдымен ішкі нарықты толық қамтамасыз етуіміз керек. Көктем мен күз келсе, сұйық отынға жарымай жүретін ауылшаруашылық саласына да баса мән берілуі тиіс. Бірінші кезекте Үкімет жанар-жағармаймен шаруаларды қолдаса екен дейміз. Мамандардың айтуынша, еліміздің бірқатар өңірлерінде, әсіресе, шекара маңындағы облыстарда бензин тапшылығы қатты сезіледі. Өйткені, сол аймақтардан көрші елдердің көліктері біздің арзан жанармайды тасып әкететін фактілер тіркелген. Алдағы уақытта жанармай нарығындағы ахуалды тұрақтандырудың барлық шаралары қолға алынады деп сенеміз.

«Алаңды» үйлестірген – Алтынбек ЕЛЕМЕСҰЛЫ.

Количество показов: 734

Возврат к списку