Мал дәрігерлері жеткіліксіз

СОҢҒЫ ЖАРИЯЛАНЫМДАР

17.05.2022

Мал дәрігерлері жеткіліксіз

Аққулы ауданында өсімдік шаруашылығымен айналысатын кейбір шаруашылықтар суармалы алқапқа қол жеткізе алмай келеді. Ал төрт түлік бағып отырған ағайын жайылымдық жерлер құнарлылығын жойғанын алға тартады. Мұндай жағдайда агроөнеркәсіптік кешеннің дамуы туралы сөз қозғаудың өзі артық. Оған қоса, ауданда мал дәрігерлерінің тапшылығы анық байқалады.

Аққулы ауданы дәмі тіл үйіретін қарбыздарымен танымал. Оны ешкім жоққа шығара қоймас. Бас қалада жыл сайын өтетін ауыл шаруашылығы жәрмеңкесі кезінде де көпшілік «Аққулының қарбызын алуға келдік» деседі. Жергілікті тұрғындар өнімнің бұл түрімен қатар, басқа да көкөністер салып, егін егуді қалайды. Алайда құрғақ аймақта орналасқан ауданда өсімдік шаруашылығын тамшылатып суару әдісін қолданбай, суармалы алқаптарды айналымға енгізбей дамыту өте қиын. Сондықтан осыдан бірнеше жыл бұрын жергілікті шаруашылықтар 1987 жылдан бері қараусыз қалған Лебяжі су арнасын қайта қалпына келтіруді сұраған еді. Алдын ала есептеулер бойынша, жандандыру жұмыстарын жоспарлауға арналған жобалық-сметалық құжаттаманы жасауға 132 млн теңге, 37 шақырымдық су құбырын қайта іске қосуға шамамен 7 млрд теңге қаражат қажет. Қарбыздың түр-түрін өсіретін, бүгінде шаруашылықтың басқа да түріне ден қойып келе жатқан белгілі кәсіпкер, облыстық мәслихат депутаты Қайрат Шапуов бұл су арнасының берері мол болар еді деп пайымдайды.

- Жер учаскелерін суармалы алқапқа айналдыру оңай емес. Егіс алқаптарына құбырды тартудың өзі машақаты көп іс екенін жақсы түсінеміз. Десе де, біздің аудан шаруалары үшін телімдерді суарудың маңызы зор. Сол кезде ғана өнім бітік шығып, шаруалардың еңбегі еленеді. Өкінішке қарай, құзырлы министрлік Лебяжі су арнасын қайта қалпына келтіру жобасын экономикалық тұрғыдан тиімсіз деп танып отыр, - дейді Қ.Шапуов. Мал шаруашылығы саласында да қол байлайтын түйткіл жоқ емес. Айталық, елді мекендерде ветеринар мамандар тапшы. Сондықтан эпизоотиялық шаралар дер кезінде жүргізілмейді. Қазы ауылындағы «Ардақ» шаруа қожалығының басшысы Жанат Тұрлыбаев оның салдары зор қауіп тудыруы әбден мүмкін екенін айтады.

- Қазіргі таңда ветеринарлар малдардан жаппай қан алып, төрт түлікке түрлі жұқпалы ауруға қарсы екпелер салуы тиіс. Бірақ кадр тапшылығының салдарынан бұл іс кемшін қалып жатыр. Әр округте ветеринарлық пункттер ашылғанымен, онда жұмыс істейтін маман аз. Сондықтан айлық, тоқсандық жоспарлар орындалмай, төрт түлік бақылауға алынбай қалады. Ал қандай да бір жұқпалы ауру келсе, мал басы күрт азаяры белгілі. Мәселен, осыдан екі жыл бұрын нодульдік дерматит, былтыр бруцеллез аурулары анықталды. Эпизоотиялық шаралар дер кезінде жүргізілсе, мұндай қиындықтар болмас еді, - дейді Ж.Тұрлыбаев. Сонымен қатар, кейбір тұрғындар жайылымдық жерлер құнарлылығын жойып бара жатқанын айтады. Төрт түлікті жаюға арналған жер бөлінгенімен, оларда малға талғажау болар шөп жоқ. Сондықтан өрістен аш қайтады.

- Меніңше, мал басын көбейтудің ғана емес, оларды сапалы жайылымдық жермен қамтудың да қамын ойлау керек. Өкінішке қарай, жылдар бойы төрт түлік тек бір жерде жайылып келгендіктен, бүгінде оның құнарлылығы азайды. Сол себепті арнайы аудандық немесе үкіметтік бағдарлама әзірлеп, көпжылдық өсімдіктерді егудің жолын қарастырған жөн деп ойлаймын, - дейді шаруашылық басшысы. Аққулы ауданының басшылығы шаруалар мен тұрғындардың талап-тілектерін ескеріп, тиісті шаралар қолданады деген үміттеміз. Әйтпегенде, қарбызға ғана «қарын тоймайды». Ауыл шаруашылығының ілгерілеуі үшін әкімдік тарапынан қолдау болса, шаруалардың да еңбегі өнімді бола түсері анық.

Құндыз ҚАБЫЛДЕНОВА.

Количество показов: 1082

Возврат к списку