Мандатқа әркімнің-ақ бар таласы

СОҢҒЫ ЖАРИЯЛАНЫМДАР

19.04.2022

Мандатқа әркімнің-ақ бар таласы

Алдағы уақытта елімізде аудандық мәслихаттардың құрамында партиялық тізім бойынша сайланған депутаттар болмайды. Бұл мандатты тек азаматтық ұстанымымен көзге көрінген, елдің қамын шынымен ойлайтын қоғам белсенділері иелене алады. Сол сияқты облыстық мәслихаттар мен Парламент құрамын да айтарлықтай өзгерістер күтіп тұр.

Кеше облысымызға Орталық сайлау комиссиясының төрағасы Нұрлан Әбдіров бастаған комиссия өкілдері жұмыс сапарымен келіп, өңір жұртшылығымен жүздесті. Айта кету керек, бұған дейін аталмыш орган мүшелері аймақтарды аралап, тұрғындармен кең ауқымда кездес- кен емес. Осыдан екі ай бұрын игі бастаманы қолға алып, осы уақыт аралығында 12 облысқа барып қайтты. Павлодарлықтармен өткен кездесу барысында жалпы сайлау жүйесі, дауыс беру процесі, электоралды мәдениет мәселелері талқыланды. Нұрлан Әбдіров жақында енгізілетін пропорционалдық-мажориторлық жүйеден күтер үміт мол екенін атап өтті.

- Қазіргі уақытта Мәжіліс пен мәслихат партия өкілдерінен ғана құрылған. Ал бұдан былай Мәжіліс депутаттарының 70 пайызы, облыстық мәслихаттардың 50 пайызы ғана саяси ұйымдардың мүшелерінен жасақталады. Қалған мандаттар және аудандық деңгейдегі мәслихаттағы барлық орын еш партияға қатысы жоқ, халықтың сөзін сөйлейтін жекелеген азаматтарға беріледі. Мұндай пропорционалдық-мажоритарлық жүйеге ауысу - қоғам мен уақыт талабы. Бұл үлкен жаңалық еліміздегі 10 мыңнан астам сайлау учаскесінің, онда қызмет ететін 70 мыңнан астам адамның жұмыс жүйесін де өзгертері анық, - деді Н.Әбдіров. Ашық диалог алаңында түрлі мәселелер қозғалды. Мәселен, облыстық қоғамдық кеңес мүшесі, кәсіпкер Асылбек Туғанбай соңғы уақытта сайлауға баратын жастардың азайып кеткенін алға тартып, жағдайды реттеудің жолдарын ортаға салды. Осы орайда Орталық сайлау комиссиясының төрағасы бүгінде жастармен байланыстың үзіліп қалғанын тілге тиек етті.

- Өкінішке қарай, бүгінде өскелең ұрпаққа сайлаудың маңыздылығы, мәні мен орны туралы емін-еркін әңгіме-дүкен құрылмайды. Осы уақытқа дейін облыстарды аралау барысында кездесуге келген жастардың 25-30 пайызы ғана сайлауға баруға ниетті екенін байқадық. Бұған телефон мен ғаламтордың да кері әсер еткені жасырын емес. Әлеуметтік желілердегі ұнаған жазбаға лайк басу мен саяси науқан барысында дауыс берудің жүгі бірдей емес. Әйтсе де, оған жеңіл-желпі қарайтын жастар бар. Сондықтан әр өңірге барған сайын жас буынмен жеке жүздесіп жатырмыз. Алдағы уақытта сайлау мәдениеті балалардың бойында ерте кезден қалыптасу үшін Білім және ғылым министрлігіне тиісті факультатив енгізуді ұсыну жоспарда бар, - деді төраға. Жалпыұлттық социал-демо-кратиялық партиясы облыстық филиалының төрағасы Ажар Сағандықова Парламентке өтетін партияларға белгіленген шекті төмендетуді ұсынды. Қазіргі уақытта Мәжіліске дауыс берушілердің кемінде 5 пайызының қолдауына ие болған партия өкілдері ғана өте алады.

- Сонымен қатар, кейбір сайлау учаскелерінде учаске мүшелерінің өздері бюллетень толтырып, «жоғарыдан» түскен тапсырма бойынша кандидат-тардың бірінің есімі жазылған тұста белгі қойып, жәшіктерді жалған бюллетеньдермен толтыратынын көрдік. Мұндай жағдайда әлемдік тәжірибеге сүйене отырып, сол сайлау учаскесіндегі процесті толықтай жарамсыз деп санаған дұрыс, - деген ойын білдірді А.Сағандықова. Орталық сайлау комиссиясы төрағасының орынбасары Константин Петров біздің елде де осы іспетті тәжірибенің барын алға тартып, нәтижені негізсіз деп тану үшін оның себебіне үңілу керек екенін айтты. Кездесу соңында Нұрлан Әбдіров былтырдан бері жүріп жатқан ауылдық округ әкімдерін сайлау әділ болып, қызметке лайық кандидат анықталуы үшін дебаттар ұйымдастыруды ұсынды. Бұл бастама көпшілік тарапынан қолдау тапты.

Құндыз ҚАБЫЛДЕНОВА.

Количество показов: 1221

Возврат к списку