Медициналық жылжымалы кешен: Шалғайдағы жұрт ырза ма?

Алыстағы елді мекен жұртшылығы қашанда кәсіби әрі білікті дәрігерлерге мұқтаж. Әсіресе, шалғайдағы ауыл тұрғындарының ақ желенділер қабылдауына бару үшін ұзақ жолды еңсеруіне тура келеді. Соңғы жылдары бұл мәселенің де шешімі табылған сыңайлы. Пандемия салдарынан өңір аралауы тоқтаған жылжымалы медициналық кешендер бүгінде қайта жұмыстарына кірісуде. Баянауыл аудандық ауруханасының бас дәрігері Серікжан Арыновтың айтуынша, көшпелі жылжымалы медициналық кешендер аймаққа қарасты ауылдарда екі күн қатарынан тұрғындарды қабылдайды.

- Ауданымыздан шалғайда орна-ласқан ауылдар да бар. Десе де, біз елді мекен тұрғындарының санына байланысты дәрігерлерді екі күнге бөлеміз. Яғни, мамандарымыз алғашқы күні рентген және флюорография қызметін көрсетумен айналысатын болса, екінші күні жалпы қабылдау кабинеттері жұмыстарын жалғастырады. Кешен іші цифрлық жабдықтармен жабдықталған. Одан бөлек терапевт, педиатр, хирург, акушер-гинеколог, окулист, кардиолог, невропатолог, онколог дәрігерлері де шағым бойынша қабылдайды. Жалпы, аудандық және қалалық ауруханаларға қатынай алмайтын адамдар үшін денсаулық жағдайының қалыпты екеніне көз жеткізу үшін жақсы мүмкіндік. Оған қоса, тиімді тұстары баршылық. Әсіресе, балалар мен жасөспірімдер скринингтен және кәсіби тескеруден өте алады. Қазіргі күнге дейін дәрігерлер Ұзынбұлақ, Сәтбаев, Мұса Шорман, Жарылғапберді, Жаңажол және өзге де ауылдар мен ауылдық округтерге барды. Шамамен мыңнан астам тұрғын қамтылды. Маусым айының соңына таман медициналық жылжымалы кешеннің сапары аяқталады. Әрі қарай кешен Екібастұз қаласына жіберіледі, - дейді С.Арынов. Бас дәрігердің сөзінше, аудандық ауруханадағы акушер-гинеколог маман жылжымалы медициналық кешенмен әркез бірге жүрмейді екен.

- Аудандық ауруханада 45 дәрігер, 180 мейірбике жұмыс істейді. Кадр тапшылығы жоқ. Дегенмен, акушерлік бос орын бар. Мысалы, тіркеуде тұрған 100 жүкті әйелдің 45-і жергілікті емдеу мекемесінде босанады. Сол себепті, шұғыл түрде акушерлік көмекке әзір болу мақсатында акушер-гинеколог ауыл аралай бермейді, - деді ол. Алдағы уақытта дәрігерлер Егіндібұлақ, Қаражар, Аймауытов ауылдарына бармақ. Қазіргі таңда медициналық жылжымалы кешен Күркелі ауылына жеткен.

- Атап өтер болсақ, жылжымалы медициналық кешенде қарт адамдар мен мүмкіндігі шектеулі жандарға жағдай жасалған. Өздеріңізге белгілі, Баянауыл ауданында ауа райынан бөлек, жолдар үнемі кешеннің қатынауына мүмкіндік бермейді. Сондықтан да, жер аяғы кеңіген уақытта және оқу жылының басында жылына екі мәрте кешенді көліктермен сапарды ұйымдастырамыз. Қыс мезгілінде қардың құрсауында жатқан ауылдарға бару мүмкін емес, - дейді аурухана басшысы. Сонымен қатар, бас дәрігер көпшілікті қан қысымы, жүрек аурулары мазалайтынын, осы сырқау түрімен жиі жүгінетінін атап өтті. Күркелі ауылы тұрғыны Айымгүл Шахан кешенді көлік-тердің қолайлылығын айтуда.

- Алдымен ауыл адамдарына жылжымалы медициналық кешен ыңғайлы ұйымдастырылған. Жұмат Шанин ауылына қоныс аударғаныма 1 жылдан астам уақыт болды. Алғаш рет көлік кешенінің дәрігерлерінің қабылдауына кірдім. Ұтымды тұсы, ұзын-сонар кезек күтпейсің. Кешеннің іші өте таза, жинақы. Бастысы, дәрігерлер сыпайы. Рентгенге түсу үшін аудан орталығына қатынаудың қажеті жоқ. Дегенмен, оған мемлекеттік мекемелерде жұмыс істейтін ажамдар тексеріле алмайды деседі. Басымдық қарапайым тұрғындарға арналған екен. Сол себепті, барлық ауыл тұрғынын қамтыған жөн деп санаймын, - деді Айымгүл Шахан. Ал облыстық денсаулық сақтау басқармасының арнайы медициналық қамтамасыз ету, денсаулық сақтау жүйесіндегі цифрландыру және мемле-кеттік көрсетілетін қызмет-терді мониторингілеу бөлімінің бас маманы Шолпан Меңдіғалиева соңғы 4 ай мерзімінде жылжымалы үлгідегі медициналық тексерумен 5025 адам қамтылғанын мәлімдеді.

- Оның ішінде 2384 адамға диаг-ностикалық, 1092 зертханалық зерттеулер жүргізілді. Бейінді мамандар 3110 тұрғынға кеңес берді. Бұл тұста, елді мекенге баратын дәрігерлердің әртүрлі саладан екенін атағанымыз жөн. Аймақтарда тапшы маман тізбегі анықталып, арнайы дәрігер жіберіледі. Жалпы, облысымызда Ақсу қалалық ауруханасы, Баянауыл, Железин, Ертіс, Шарбақты, Павлодар аудандары жылжымалы медициналық кешенмен қамтылған. Сәйкесінше, аталған аудандардағы көлік кешенінің жұмыс жоспары аяқталып, кешен көліктері облысымыздағы өзге қала мен аудандарға жіберіледі, - деді Шолпан Меңдіғалиева. Осыған дейін облыс әкімі Әбілқайыр Сқақов бірнеше ауданға жұмыс сапары барысында фельдшерлік-акушерлік пункт пен шалғай ауылдардың мұқтаждықтары үшін сатып алынған мобильді медициналық кешен, кадр мәселесін көтерген болатын. Сондықтан, ендігі кезекте өңір халқына қолжетімді, сапалы медициналық қызмет көрсету үшін кешенді көліктердің жұмысы бақылауда болмақ.

Махаббат ТӨЛЕБАЙ.