Мектеп қазандықтары қысқа дайын ба?

Білім мекемелерінің ғимарат ішінде орналасқан қазандықтары оқушылардың өміріне аса қауіпті. Бекітілген ережелерге сәйкес, кез келген әлеуметтік ғимаратқа жылу беретін от ошақтары адамдар отырған объектіден тыс болуы шарт. Ал бұл ретте облысымыздағы мектептердегі қазандықты сыртқа шығару бойынша қандай жұмыстар атқарылып жатыр?

Баянауыл ауданына қарасты Ұшқұлын негізгі мектебінің іргетасы 1968 жылы қаланған. Мектеп директоры Жаннұр Бейсембаеваның айтуынша, алюминий зауытының «Рудный Керегетас» филиалы басшылығының бастамасымен 2000 жылға дейін аталмыш елді мекендегі мектеп, әлеуметтік нысандар, жеке үйлердің барлығы орталықтандырылған жылу жүйесі арқылы жылытылған. Кейіннен, ауыл тұрғындарының қарыздары көбейген соң, жылыту жүйесі жұмысын тоқ-татқан.

- Атап өткенімдей, 2000 жылдары оқу ғимаратының ішіне қазандық салынған. Содан 2010 жылы мұндағы жылу жүйесі мен пеш жаңартылды. Бір қазандықты қолдану мерзімі 10 жыл болғандықтан, «Песчан» зауытынан шыққан арнайы қазандыққа ауыстырылды. Өткен оқу жылында мектептегі от ошағын сыртқа шығару бойынша мәселе көтерілді. Жаңа блок-модульдік қазандықты биыл орнаттық. Ал мектепті жылыту жаңа жүйеге ауысқанмен, іштегі қазандықты сыртқа шығару жұмысы келесі жылы жүзеге асады, - дейді Жаннұр Манашқызы. Мектеп директорының сөзінше, блок-модульдік қазандық осы жылы сынақтан өтетіндіктен, ескі от ошағы алынбаған.

- Бір ай уақыт ішінде қазандық жұмысы жаңарып, блок-модуль салынды. Ол үшін аудандық білім бөлімінен 20 млн 735 мың теңге қаражат бөлінді. Жауапты ұйым Қарағанды қаласындағы «ТермоГазЭнерджи» ЖШС бұл ретте 2 жыл кепілдік беріп отыр. Жылыту маусымында мұның күші мен жылу деңгейін назарда ұстаймыз. Атап өтер болсақ, бұл салынған блок-модульдің артық-шылығы көп. 2-3 сағат көлемінде жылуды ұстап тұрады. Тіпті, ішінде 2 қазандық бар. Бірі іске қосылса, екіншісі төтенше жағдайға арналған. Қызметкерлерге арналған жуыну бөлмелері, дәретхана мен демалыс орны да қарастырылған. 3 қызметкер тәулік бойы ауысыммен жұмыс істейді, - деді ол. Сонымен қатар, Ұшқұлын негізгі мектебінің жылыту маусымына көмір қажеттілігі 142 тоннаны құрайтынын атап өтті. Бүгінгі күні қатты отынмен 100 пайыз қамтылғанын жеткізді. Ал облыстық төтенше жағдайлар департаментіндегі мемлекеттік өрт бақылау басқармасының бастығы Сергей Огай өңірімізде қауіпсіздік айлығын өткізу барысында әлі де оқу орындарының қабырғаларында орналасқан пешпен жылытылатын мектептер бар екенін анықтаған.

- Мұндай айлық әлеуметтік мекемелерде де жүргізілуі тиіс. Шалғайдағы елді мекендерде қазандықтар ғимаратта орналасқан бірнеше мектеп бар. Ережелер бойынша қазандық бөлек шығарылуы керек. Оған қоса, қазандықтар адамдар орналасқан объектілерден тыс болуы керек. Әкімдіктермен бірге пештерді ғимараттың сыртына шығару жұмыстарын жүргізіп жатырмыз. Бұл жұмысты үш-төрт жыл бойы жүргізіп келеміз. Өйткені, пештерді сыртқа шығаруға қаражат бөлінген. Өткен жылы департаменттің шешімімен екі мектептің қазандығы сыртқа шыға-рылды, - деді Сергей Огай. Маман электр жабдықтарын монтаждау және пайдалану, отпен абайсызда жұмыс істеу, пешті жылыту, тұрмыстық электр аспаптарын салу және пайдалану ережелерін бұзу кезінде негізгі бұзушылықтар салдарынан адам өлімі болуы мүмкін екенін де еске салды. Оның сөзінше, жылыту маусымы басталғаннан жеке тұрғын үй секторында 24 өрт болған. Облыстық мемлекеттік-жекеменшік әріптестік және инвестициялық жобаларды дамыту бөлімі басшысының міндетін атқарушы Әйгерім Бекмұхаметова қазіргі таңда аймақ бойынша 355 жалпы білім беретін мектеп жұмыс істейтінін айтты. Оның ішінде 4 білім мекемесіндегі қазандықтар өрт қауіпсіздігі талаптарына сәйкес келмейтін орындарда орналасқан. Аталған мәселені шешу үшін модульдік қазандықтарды орна-туға бюджеттен қаражат бөлінген.

- Шарбақты ауданындағы Александровка орта мектебіне блок-модульдік қазандық, Павлодар ауданындағы Қаракөл білім мекемесіне электр қазандығы орнатылды. Сондай-ақ, Баянауыл ауданындағы Үшқұлын негізгі мектебіне де блок-модульдік қазандық іске қосылды. Ал аталған елді мекенге қарасты Жайма мектебіне жылу беруге арналған жабдықтың оңтайлы нұсқасы ретінде электр немесе блок-модульдік қазандық орнату мәселесі қарастырылуда. Еске салайық, білім беру ұйымдарында қазандықтарды қауіпсіз пайдалануға мектеп директорының шаруашылық бөлімі жөніндегі орынбасарлары жауапты, - дейді Әйгерім Шапайқызы.

Махаббат ТӨЛЕБАЙ.

Суреттер газет мұрағатынан алынды.