Мектеп жабылмайды, жол жөнделеді

Аққулы ауданына қарасты Шоқтал ауылының тұрғындары небары 8 бала оқитын мектеп жабылып қала ма деп алаңдаулы. Елді мекендегі жалғыз білім мекемесі жұмысын тоқтатса, тұтас ауылдың да тозары белгілі. Балаларды біліммен, мұғалімдерді тұрақты жұмыспен қамтып отырған оқу орнының ендігі жайы не болады? Балаларға басқа мектепте оқуға, тұрғындарға үдере көшуге тура келе ме? Облыс әкімі Әбілқайыр Сқақовтың жуырда Аққулы ауданы жұртшылығымен кездесуде көтерілген мәселелер қалай шешілуде деген сауалмен анықтау жүргізген болатынбыз.

Құндыз ҚАБЫЛДЕНОВА

Ресейдің Алтай өлкесімен шекаралас жатқан Шоқтал ауылындағы Амангелді бастауыш мектебінде бүгінде 8 бала оқиды. Шағын орталықта тағы үш тәрбиеленуші бар. Жыл сайын ел арасында «Балалар санының аздығына байланысты мектеп жабылады» деген әңгіме желдей есіп жүреді. Жақында тағы да бұл мәселенің шеті шықты. Облыс әкімі Әбілқайыр Сқақовтың 19 мамырда Аққулы ауданы тұрғындарымен кездесуі барысында жергілікті депутат Раушан Байдүйсенова өзекті жайтты тілге тиек етті.

- Түптеп келгенде, шекараның шегінде орналасқан елді мекендердегі әлеуметтік маңызы бар нысандардың, әсіресе мектептің жұмысын тоқтатуға болмайды. Ауылды «асырап» отырған жалғыз мекеме жабылса, елді мекеннің жағдайы күйрейтіні айтпаса да түсінікті. Бірақ қазіргі уақытта оқушылар санының аз болуы салдарынан тағы да мектепті жабылу мәселесі тұр. Осы жайтты назарға алсаңыздар, - деген тілегін білдіріп еді депутат. Сол тұста аймақ басшысы Әбілқайыр Сқақов бұл жайтты саралау керектігін айтқан болатын. Ал таяуда Аққулы ауданының әкімдігі Амангелді мектебі жабылмайтынын нық сеніммен айтты. Жалпы, алдағы уақытта аудандағы бірде-бір оқу ордасы жұмысын тоқтатпайтынын да атап өтті. Жөн делік. Әкімдік уәдесінде тұрса, Шоқталдағы ағайынның уайымы азаяры анық. Сол сияқты Шарбақты ауылындағы ата-аналардың алаңдаушылығына себеп болған тағы бір мәселе бар. Ол – балабақша жайы. Мұндағы балабақшаның жөндеу көрмегеніне біраз жылдың жүзі болды. Соның салдарынан жаңбыр жауса болғаны, төбеден су ағады. Бұл мәселені балабақша меңгерушісі Қарлығаш Кәрім де облыс әкімімен кездесу барысында көтерді.

- Бұған дейін төбе жұмсақ материалдардан жабылды. Яғни, шатыры болған жоқ. Сондықтан жаңбыр жауған кезде жиналған судың барлығы бірден ғимарат ішіне ағады. Бұл балаларға айтарлықтай қолайсыздықтар тудырады. Мәселені реттеу үшін жобалық-сметалық құжаттама дайындап, оны сараптамадан өткізген едік. Енді бюджеттен қаржы бөлінсе, төбені жөндеуге мүмкіндік болар еді, - деген еді балабақша меңгерушісі. Әбілқайыр Сқақов аудан әкімдігі мен білім беру басқармасының басшылығына жағдайды назарға алуды тапсырған еді. Белгілі болғандай, инвестициялық жоба құзырлы органдардың қарауына жолданды.

- Шарбақты ауылындағы балабақшаның шатырын күрделі жөндеуден өткізу үшін 26,03 млн теңге қаржы қажет. Қазіргі уақытта бұл жоба облыстық құрылыс басқармасына берілді. Тиісті шаралар өткен соң ғимараттың төбесін қалпына келтіру жұмыстары басталуы тиіс, - деп мәлімдеді аудандық әкімдік өкілдері. Аймақ басшысының Аққулы ауданы жұртшылығымен кездесу барысында білім беру нысандарына қатысты көтерілген екі мәселенің де шешу жолдары табылғаны қуантады. Ендігі ретте жоспарлы жұмыстары сапалы әрі уақытылы атқарылса болғаны. Жол демекші, аудан тұрғындарының тарапынан жол сапасына қатысты көп сын айтылды. Айталық, Төсағаш пен Жабағылы, Қазы мен Қарақала, Мерғалым мен Майқарағай, Қазантай мен Малыбай ауылдарының араларын жалғайтын жолдарда ой-шұңқыр көп. Сол тұста аудан әкімі Абзал Балғабаев бұл бағыттағы жұмыстар кезең-кезеңмен шешілетінін айтқан еді. Белгілі болғандай, биыл Аққулыда аудандық маңызы бар 50 шақырымнан астам жолға орташа жөндеу жұмыстары жүргізіледі. Бұл мақсатқа 1 млрд 724 млн теңге көлемінде қаражат қарастырылып отыр. Мәселен, Қарақала-Қазы-Баймолды, Аққу-Қазы-Майқарағай, Майқарағай-Шақа бағыттарындағы автомобиль жолдарына асфальт төселеді. Сонымен қатар, Қазы ауылына кіреберіс 4 шақырым да реттеледі. Бұл жұмыстарды жүргізетін мердігер компания ретінде «АЗА» кәсіпорны анықталып, келісімшарт жасалды. Қазіргі уақытта жұмыстардың кей бөлігі басталды.

- Сонымен қатар, Қарақала, Қазы, Малыбай, Мерғалым, Майқарағай және Шақа ауылдары сапалы инфрақұрылыммен қамтылады. Бұл елді мекендерде 3 мыңнан астам тұрғын бар, - делінген әкімдіктің ресми хабарламасында. Аудан жұртшылығы көтерген осындай түйткілдердің түйінін тарқату жұмыстары қолға алына бастады. Оларды жүзеге асыруға қатысты аймақ басшысы Әбілқайыр Сқақов нақты тапсырмаларды берді. Өз кезегінде біздің газет журналистері де көпшіліктің көкейіндегі өзекті жайттардың шешілу барысын назарда ұстайтын болады.