«Мен - қазақпын!»

Отан қорғаушылар күнін мерекелеу аясында Павлодардағы Гагарин атындағы саябақта облыстық саптық әндер байқауы өтті. Байқауға әр ауданнан 12 топ қатысты.

Жастарға патриоттық тәрбие беруді дамыту, Отан қорғаушы мамандығын танымал ету, мектептердің әскери-патриоттық клубтарының жұмысын жандандыру және жетілдіру мақсатында өткен байқауға 3 қала мен 12 ауданнан 450 оқушы келді. Сайыс жалпы төрт кезеңнен тұрды.

- Оқушылар бір ай бойы осы байқауға арнайы дайындалды. 10-11-сынып оқушыларын таңдап алдық. Бүгін саптық әндер сайысының қорытындысы шығарылды. Мұндай шара облыстық деңгейде төртінші мәрте өткізіліп отыр, - дейді облыстық білім беру басқармасының дене шынықтыру және алғашқы әскери дайындық орталығының басшысы Бақтияр Түсіпов. Жеңімпаздар мен жүлдегерлер қала және аудандар арасында жеке-жеке анықталды. Олар дипломдармен және Алғыс хаттармен марапатталады. Үздік шыққан команда капитандары әскери командирлерінің атынан бағалы сыйлықтарға ие болды.

- Мұндай байқауға бірінші рет келдім. Біздің команда қыздар командасынан құралған. Топпен саптық жүру кезінде «Мен қазақпын» атты патриоттық әнді орындадық. Бұл шараның патриоттық тәрбие берудегі маңызы жоғары деп санаймын, - дейді Тереңкөл ауданынан келген қатысушы Әмина Етікбаева. Байқау қорытындысы бойынша аудандар арасында 1-орынды Ақтоғай ауданы, 2-орынды Тереңкөл ауданы, 3-орынды Успен ауданы иеленді. Қалалар арасында Павлодар қаласы үздік атанды. Екібастұз қаласының командасы екінші, ал үшінші орынға Павлодар қаласының оқушыларынан құралған тағы бір топ ие болды.

Айдана БОРАНБАЕВА.

Суретті түсірген –
Есенжол Исабек.

Количество показов: 738

Возврат к списку