Мінсіз қызметке

Кеше Отан қорғаушылар күніне орай Естай атындағы мәдениет сарайында салтанатты жиын өтті. Кең-байтақ Қазақстанның тыныштығын күзеткен Қарулы күштер қызметкерлеріне құрмет көрсетіліп, бір топ азаматқа марапаттар тапсырылды.

Биыл - Қарулы күштердің құрылғанына 30 жыл. Айбынды армиямыздың қуатын еселеп, әскери борышты абырой биігіне көтеру бағытында өңірімізде аз жұмыс жасалып жатқан жоқ. Салтанатты шараға қатысқан облыс әкімі Әбілқайыр Сқақов әскери қызметшілерді төл мерекемен құттықтап, еліміздің аман, әскеріміздің айбарлы болуын тіледі.

- Отыз жыл ішінде өңірдегі Қарулы күштер жоғары кәсіби біліктіліктің үлгісі мен ерлік символына айналды. Отанға деген сүйіспеншілік, елге деген жауапкершілік сіздер үшін ең басты құндылықтар болып қала береді деп сенеміз. Бүгін Мемлекет басшысы Қасым-Жомарт Тоқаев 30 жылдық мерейтойға орай Қарулы күштер қатарындағы қызметкерлерге алғысын білдірді. Осынау мереке қарсаңында алғашқы рет үш жерлесіміз жоғары әскери атақ - генерал-майор шенін алғаны бізді айрықша қуантып отыр. Ел ішіндегі тұрақтылықты, халықтың қауіпсіздігін қамтамасыз етуде аянбай еңбек етіп келесіздер. Осы үшін әрқайсыңызға айрықша алғысымды білдіремін. Аспанымыз ашық, жеріміз тыныш болсын! - деді аймақ басшысы. Қызметтік борышын үлгілі атқарғаны, жоғары кәсіби біліктілігі, қоғам мен мемлекеттің қауіпсіздігін қамтамасыз ету ісіне қосқан қомақты үлесі үшін бір топ әскери қызметші «Облыс алдында сіңірген еңбегі үшін» белгісімен, облыс әкімінің Құрмет грамотасымен және Алғыс хаттарымен марапатталды. Салтанатты жиынға жиналғандардың құрметіне концерт ұйымдастырылды. Көпшілік ҚР Еңбек сіңірген қайраткері Тамара Асардың және Иса Байзақов атындағы облыстық филармониясы әртістерінің өнеріне сусындап қайтты.

Өз тілшіміз.

Количество показов: 646

Возврат к списку