Нағашы апа

«Нағашы жұртың жақсылығыңа сүйсінеді, жаманшылығыңа күйінеді, әрқашан тілеуіңді тілейді, тілеуқор да жанашыр жұртың сол болады», - деп дана халқымыз бекерден-бекер айтпаған. Нағашы немесе нағашы жұрт туыстық атау болып саналады. Дәстүрлі қазақ қоғамында нағашының жиенге қарағанда жолы үлкен.

Нағашы жұрт – туған ананың әке-шешелерінен бастап, барлық аталас ағайын-туыстары мен үрім-бұтақтары болып саналады. Әже төркіні немересіне түп нағашы делінеді. Үш жұрттың ішіндегі ең ерекшесі болғандығынан шығар, олар жиенін әрқашан еркелетіп, сұрағанын беріп отырған. Тек туған нағашысы ғана емес, сол рудың барлығы да жиенге нағашы деп аталады. Нағашы жиенінің азаматтығы мен ізгі істеріне сүйсініп, мақтап отырады. Нағашы – ананың төркін жұрты. Бүгін нағашы жұртым, яғни анам Тоқсанова Бақыт Назарбековнаның туған жеңгесі Шәріпқызы Жаңыл апа туралы сөз етпекпін. Ол кісі 1947 жылы 22 сәуірде дүние есігін ашқан. Әкесі – Жәпеков Шәріп, анасы - Жәпекова Беймәриям. Апамыздың қарапайым жұмысшы болған, кезінде оқығанымен, ол сөз тек қағаз жайымен қалған. Отбасы 5 ағайындыдан тұрса керек. Қазіргі таңда Алланың жазуымен ағайынды екеуі көз жұмса, 3 ағайынды зейнеттің рахатын көруде. Жаңыл апамыз 1955-1956 жылдары мектеп табалдырығын аттап, «жазмыштан озмыш жоқ» демекші, апам 5–сынып оқып жүрген шағында әкесінен айырылады. Ол кісінің айтуы бойынша анасы «қой аузынан шөп алмас», момын адам болған екен. Барлық жүк ендігі кезекте Жаңыл апаның мойнында болған. Ендігі кезекте артынан ерген 4 бауырына әке орнына әке болып, бауырларын жеткіземін деген Жаңыл апамыз өзімен қатарлас сыныптастарымен қатар оқуға түсуден де қалып қояды. Осылайша, «тағдырдың жазғанына көнбеске амал жоқ» болған соң, Жаңыл апа жастайынан еңбекқорлығының, табандылығының, төзімділігі мен қайсарлығының арқасында 1964 жылы 8-сыныпты тәмамдап, мал шаруашылығы жұмысына араласады. 1967 жылы апамыз партияға кандидат болып, 1968 жылы партия қатарына өтіп, Болат Даржұманов тұсында облыстық партия конференциясына делегат болып қатысып, еңбегі бағаланып, «профком мүшесі», «облыстық партия мүшесі» болып сайланады. Осы жылы Алматыда кәсіподақ съезіне делегат болып қатысқан. 1969 жылы «Аудандық депутат» болып сайланса, 1971 жылы 13 маусымда «За трудовое отличие» медалімен марапатталып, 1974 жылы облыстық «XVIII партия конференциясында Қазақстан Коммунистік партиясының Павлодар облыстық комитетінің мүшесі» болып сайланды. 1975 жылы маусым айында «Қазақ КСР-інің Павлодар облысындағы Баянауыл ауданының еңбекшілер депу-таттарының Жаңатілек селолық Советінің депутаты» болған. Жаңыл апамыз Лениннің 100 жылдығына арналған марапатымен және де «адал еңбегі үшін», «еңбек ардагері», «еңбек озаты» медальдарымен наградталған. 1969 жылы 1 сәуірде 40 жылдық Октябрь совхозының кәсіподақ ұйымы апамызға «коммунистік еңбек екпіндісі» атағын берді. Жанту апа Сапар нағашыммен 1970 жылы тұрмыс құрып, 40 жыл тату – тәтті, үлгілі өмір сүрген. Атамыз бен апамыз 4 бала сүйген. Жаңыл апамыз қазіргі уақытта 7 жиен, 3 немере сүйіп отыр. Сапар атамыздың көзі кетсе де, Жаңыл апа бүгінгі күнге дейін өз қайын жұртына адал. Әлі күнге дейін үлкен шаңыраққа жиналып келген қайын жұртын құшақ жая қарсы алып, ақ дастарқанында күтіп алуға даяр тұрады. Амандық болсын, жамандық болмасын! Арамызда аман-есен жүре беріңіз! Немере-шөберелеріңіздің есейгенін көріп, олардың үйлену тойларына қатысып, төрінде дәл қазіргідей қуанып отыра беріңіз! Гүлдей жайнап жүз жасаңыз, балаларыңыздың, немере- жиендерінің қызығына  тоймай, ұзақ ғұмыр жасай беріңіз.

Жансая БАГИСОВА. Халқымыздың әдет-ғұрпында Ислам дінінен бастау алған құрбандық шалынып, тасаттық жасау дәстүрі бар. Ол әсіресе жауын-шашын аз болған кездері жүзеге асырылады.

Тасаттық берілді

Өткен аптада қалалық «Ақмешіт» мешітінің ұйымдастыруымен қала маңында құрбандық шалынып, екі бас намаз оқылып, жаңбыр тіленіп, дұға жасалды.

Сондай-ақ бұл рәсім өңіріміздің бірнеше мешітінде де атқарылды. Рәсімнің өткізілуіне ауыл тұрғындары мен имам-молдалар атсалысты. Ал құрбандық еттері мұқтаж жандарға, дін жолында жүрген шәкірттерге таратылды. Кейін шариғат талаптарына сай Алла Тағаладан жауын тілеу намазы мен дұғасы оқылды. Нәтижесін елді мекендердегі халық сол мезетте сезінді. Мұсылман бауырларымыздың тілек-тері қабыл болып, биыл егілген тұқым бітік шығып, қамбамыз мол астыққа толсын! Диқандардың еңбегі жанып, ырыс-берекесі арта берсін!

Жамағатпен жүздесті

«Нұр-Мүбәрак» Египет Ислам мәдениеті университетінің оқытушысы Ризабек Батталұлы екі күндік жұмыс сапарымен Павлодар облысына келді. Ризабек Батталұлы сапарын ең алдымен Павлодар қаласы маңында орналасқан түзету мекемелеріндегі және тергеу изоляторындағы жазасын өтеушілер тобымен және жеке кездесулер өткізумен бастады. Кездесулерден кейін осы мекемелерге қарасты теолог мамандарға жолығып, сотталғандармен қалай жұмыс атқару туралы, дін мәселелері бойынша ақыл-кеңес, түсіндірмелер берді. Ал кешкісін ақшам-құптан намазы аралығында, орталық Мәшһүр Жүсіп мешітінде болып, жамағатқа «Ислам дінінің бірлігі, ынтымағы туралы» уағызын айтты. Ертеңінде Павлодар қаласындағы «Әбу Бәкір Сыддық» медресесінде шәкірттермен кездесіп, медреседе білім-ғылым үйренудің артықшылығы туралы әңгіме өткізсе, келесі кезекте Екібастұз қалалық мешітінде жамағатпен кездесіп, уағыз жүргізді.

Амантай ТОЙШЫБАЙҰЛЫ,

Мәшһүр Жүсіп орталық мешітінің «Мәзхаб.кз» сайтының бас редакторы.