Қоғамдық көліктің жүру уақыты ұзарды

Павлодарда төтенше жағдай режимі кезінде қоғамдық көліктердің қозғалысы мен жұмыс тәртібі қала әкімдігі мен облыс комендантының белгілеген кестесіне сай жүргізіледі.

10 қаңтардан бастап шаһарда қоғамдық көлік өз бағыттары бойынша тұрақты қатынауда. Өңірде сағат 23.00-ден 07.00-ге дейінгі комендант сағаты жарияланған төтенше жағдай режимі 19 қаңтарға дейін әрекет етеді. Кеше облыс орталығында қоғамдық көліктердің кестесі қайта қаралды. Павлодар қаласы әкімдігінен хабарланғандай, автобустар мен шағын автобустар енді таңғы сағат 06.00-ден кешкі 21.00 аралығында жүреді. Ал трамвайлардың жүріп-тұруына сағат 07.00-ден 23.00-ге дейін рұқсат. Қала маңындағы ауылдар тұрғындарының сұрауы бойынша №38, 66, 41, 40, 44 және №24 маршруттардың жұмыс уақыты да ұзарды. Сондай-ақ таңғы сағат жетіге дейін жұмысқа шығатын жүргізушілер мен кондукторларға тиісті кәсіпорындар тарапынан анықтамалар берілген. Бұл бойынша арнайы тізім облыстық комендатураға жіберілген. Ал автопарктердің қызметкерлері үшін үйлеріне апарып, алып келетін арнайы көліктер ұйымдастырылуда. Тағы
15 автобус қоғамдық тәртіпті сақтау шараларына жұмылдырылған. Облыстық жолаушылар көлігі және автомобиль жолдары басқармасының басшысы Қанат Қашкировтің сөзінше, бүгінде қоғамдық көліктің жүріп-тұруына қатысты проблема жоқ.

- Павлодарда 33 қалаішілік автобус маршруты жұмыс істейді. Теміржол қатынасы 13 бағыт бойынша қатынайды. Павлодар әуежайы Омбы бағыты бойынша ұшақтарды жөнелтуді жалғастыруда. Рейс әр сейсенбі сайын орындалады, - деп хабарлады ол.

Алтынбек ЕЛЕМЕСҰЛЫ,

Суретті түсірген - Есенжол Исабек.

Количество показов: 732

Возврат к списку