Оқушы білімі қандай болмақ?

СОҢҒЫ ЖАРИЯЛАНЫМДАР

16.06.2022

Оқушы білімі қандай болмақ?

Білім саласын әлемдік дамыған инновациялық технологиялармен жабдықтау, сапалы білім беруге қол жеткізу, сұранысқа жауап беретін білікті маман даярлау – білім жүйесіндегі басты талап. Десек те, соңғы уақытта заманауи елдердің оқыту тәсілінің еліміздегі білім саласына енуінің нәтижесінде мәселелер пайда болуда. Оның бірі – үш тілді оқыту. Сонымен қатар, оқулықтардың саны ғана жеткіліксіз емес, жаңартылған бағдарлама негізінде жасалған кітаптардың сапасы сын көтермейтін тұсы тағы бар. Егерде оқулықта олқылық болса, білім беру жүйесі бірізділікке түспесе, оқушы білімі қандай болмақ? Осы мәселені «Алаң» қатысушыларының талқысына салып көрген едік.

Асхат АЙМАҒАМБЕТОВ, ҚР Оқу-ағарту министрі (пікір интернеттен алынған):

- Зерттеулер мен талдаулар жүргіз-геннен кейін біз бірінші сынып оқушысына бірден 3 тілді меңгеру қиын екенін көрдік. Бұл – тиімсіз. Мәселе дидактика мен физиологияда. Біз бұл мәселеге қатысты шешім қабылдадық. Енді қазақ тілінде оқитын мектептерде 1-сынып оқушысы бір ғана тілді, яғни қазақ тілін меңгереді.

Баланың алдымен өз ана тілінде оқуды және жазуды үйренуі үшін тиісті жұмыс жүргізіп те жатырмыз. Бүлдіршіндер алдымен ана тілінде оқып және жазып үйренеді.

Екінші сыныпта бағдарламаға орыс тілі, үшінші сыныпта ағылшын тілі қосылады. Орыс тілінде оқитын мектептерде 1-сыныпта орыс тілі мен мемлекеттік тіл, ал 3-сыныптан бастап ағылшын тілі болады. Әдістеме тұрғысынан алып қарағанда, бұл – дұрыс бағыт. Мұндай зерттеулер мен ұсыныстар бұрын да болған, енді оны енгізуді жоспарлап отырмыз.

жаннат.jpg

Жанат ҚАМЫСБАЙҚЫЗЫ, дарынды балаларға арналған Абай атындағы №10 мектеп-лицейінің бастауыш сынып мұғалімі:

- Биылғы оқу жылында жарыққа шыққан «Әліппе» оқулығын тексерістен өткізген сарапшылардың құрамында болдым. Жалпы, 1 жыл ішінде оқулық құрастыру мүмкін емес. Оның үстіне, оқулықты сүзгіден өткізу үшін де 2 ай ғана уақыт беріледі. Бұл – тым аз мерзім. Соның салдарынан баспадан шыққан кітаптарда қате жиі кетіп жатады. Сондай-ақ, жаңартылған мектеп бағдарламасындағы жүйеде шикілік бар. Мысалы, әр сабақ сайын жаңа тақырып бекітілген. Сабақты қорыту мәселесі шетке ысырылған. Кей тұстарда оқулық тапсырмаларындағы есепте қате табылады. Сол себепті, мұғалімдер әр сабаққа екі-үш есе тыңғылықты әзірленеді.

Қазіргі таңда бүлдір-шіндердің басым бөлігі қ, ғ сынды дыбыстарды анық айта алмайды. Сондықтан, бастауыштан бастап ана тілінде және сауатты кітаптан білім алған оқушының болашаққа деген арман-мақсаты айқын боларына сенемін. Бастысы – оқулықтағы қатенің орын алуына жол бермеу керек.

Баян1.jpg

Баян ЖҰМАҚАЕВА, зейнеткер ұстаз, Баянауыл ауданы:

- Қазақты қазақ етіп таныту үшін ең әуелі тіліміз түзу, құнарлы болуы абзал. Әрине, ана сүті арқылы бойымызға сіңген ана тілімізде сөйлеу, құрмет білдіру, мектеп қабырғасында, әсіресе бастауыш сыныптарда қаланатыны сөзсіз. Сондықтан, осы орайда үш тілді оқытуға қатысты өзгеріс жұртшылыққа үлкен сүйінші әрі қуанышты жаңалық дер едім.

Бүгінде зейнеткер ұстазбын. Ұзақ жылдар бойы балаларға әріп танытып, жазуды үйреттім. Білімнің кілті бастауышта қалыптасатынына көзім жетті. Бастапқы білім тек қана ана тілде жүргізу, өзге тілдермен шұбарламау – тіл тазалығының кепілі. Дана халқымыз «Тіл тазалығы – жан тазалығы» деп бекер айтпаса керек.

Ал оқулық – бүлдіршіннің білім алатын, бет түзейтін айнасы. Алдымен оқулықты ретке келтіруді бастауыш сыныптың кітаптарынан бастау қажет. Мұндағы басты олқылық қателікте емес, сол қателіктің орнын толтыруда.

«Алаңды» үйлестірген – Махаббат Төлебай.

Количество показов: 500

Возврат к списку