«Омикроннан» үрей көп

Дүниежүзілік денсаулық сақтау ұйымы коронавирустың «Омикрон» деп аталатын жаңа штамын жаһанға қауіптілігі жоғары деп отыр. Елімізде вирусты инфекцияның аталған түрін өршітіп алмау мақсатында жаңадан шектеулер енгізіп, тұрғындарды қайта вакцина алуға үндеуде. Себебі, коронавирус пандемиясын еңсерудің жалғыз жолы – жаппай вакцина салдыру арқылы халықтың ұжымдық иммунитетін қалыптастыру.

Қайта вакциналаудың қарқыны төмен

Біздің облыс тұрғындарын қайта вакциналау науқаны өткен жылдың қараша айында басталғаны мәлім. Облыстық денсаулық сақтау басқармасының мәліметінше, содан бері өңірде 30 мыңнан астам адам коронавирус инфекциясына қарсы екпенің екінші кезеңін алып үлгерген. Сонымен қатар, ауруға қарсы екпе қабылдаған балалар мен әйелдер саны 5 мыңға жақындаған. Атап айтар болсақ, 3247 балаға, 170 жүкті әйелге және 707 бала күтіміндегі анаға «Комирнати» екпесі салынған. Жалпы, облыс тұрғындарының
70 пайыздан астамы коронавирусқа қарсы екпе алған. Атап айтар болсақ, 350 520 (70,43 пайыз) адам вакцинаның бірінші компонентін, 337 706 (67,25 пайыз) адам екінші компонентін қабылдаған. Павлодар қаласындағы «MED-С» емханасының бас дәрігері Гүлбақыт Ғалымқызының сөзінше, соңғы бір аптаның дересінде қайта вакцина алуға келетін тұрғындардың қатары сиреген. Мұның себебі елде орын алған ахуалға және енгізілген төтенше жағдайға байланысты деп санайды мамандар.

- Біздің емханада вакциналау және қайта вакциналау науқаны үздіксіз жүргізіліп келеді. Қайта вакциналау науқаны алғаш басталған кезде күніне 20-30 адамнан қабылдасақ, бүгінде бір күнде 10-15 адам келеді. Біздің мекемеге келген азаматтарға негізінен QazVac, Спутник V, Vero Cell, «Комирнати» түрлерін салудамыз. Қайта вакциналауға бірінші кезеңнің екі компонентін бірдей алғаннан соң алты айдан кейін келе беруге болады. Екпе алу үшін емхана таңдаудың қажеті жоқ. Азаматтар өзінің тұрғылықты мекенжайы бойынша немесе өзі қалаған басқа мекемеге барып екпе салдыруына құқылы. Бұл – ауруды жеңудің ең тиімді тәсілі. Сондықтан, барша павлодарлық-
тарды вирусқа қарсы екпе қабылдаудан қалыс қалмауға шақырамын, - дейді Гүлбақыт Ғалымқызы.

«Сарыға» өттік

Денсаулық сақтау саласы мамандарының хабарлауынша, соңғы апталарда коронавирус жұқтыру оқиғалары көбейген. Облыс «жасыл» деңгейден «сары» аймаққа өтті. Күніне 30-40 адамнан вирустың белгісі анықталуда. Соңғы мәліметке сүйенсек, облыс бойынша стационарлық емдеуде жатқандардың саны 383 болса, амбулаторлық емдеуде 410 адам бар. Денсаулық сақтау мекемелерінде әзірленген төсек-орындардың 28 пайызы және реанимациялық төсек-орындардың 17 пайызы толған.

- Екі адамның халі ауыр жағдайда. Дәрігерлер толық бақылауға алып, сауықтыруға қолдан келгенді жасауда. Сонымен қатар 30-ға жуық жүкті әйел COVID-19 инфекциясын жұқтырған. Олардың 10-ы стационарлық, 20-сы амбулаторлық емдеуде, бір жүкті әйелдің халі ауыр. Короновирус инфекциясымен ауырып жатқан балалар да бар. Жалпы, 29 жеткіншек дәрігердің бақылауында. Олардың ішінде 17 стационарлық, қалғаны амбула-торлық ем алуда, - дейді облыстық денсаулық сақтау басқармасының баспасөз хатшысы Эльмира Темірғалиева. Еске сала кетейік, соңғы тәулікте елімізде 2 мыңнан астам адамның коронавирус инфекциясын жұқтыр-ғаны анықталды.

Тілеуберді САХАБА.

Количество показов: 624

Возврат к списку