Онлайн оқу үлгерімге әсер етпейді

2021-2022 оқу жылының бірінші және екінші тоқсанын мектепте өткізген оқушылар үшінші тоқсанда тағы онлайн оқумен бетпе-бет келді. Дегенмен, жергілікті бас санитар дәрігердің бұл жолғы қаулысы бұрынғыдан қарағанда жеңілдеу. Қашықтан оқуға қала мектептерін ғана жіберіп, ауыл мектептерін штаттық режимде қалдырды. Ендеше, онлайн оқуға қандай мектептер және қай сыныптың оқушылары жіберілді? Қашықтан оқудың осы және өзге де тетіктері жөнінде облыстық білім беру басқармасының бөлім басшысы Нұргүл Азанбаевамен әңгімелестік.

- Нұргүл Шалабайқызы, облыс бойынша неше оқушы үшінші тоқсанды онлайн режимде бастады?

- Павлодар облысында 359 білім беру мекемесі бар. Онда 112 743 оқушы білім алады. Бас санитар дәрігердің қаулысына сәйкес үшінші тоқсанды 306 мектеп штаттық форматта, 53 мектеп қашықтық режимде бастады. Қазіргі таңда оқушылардың жалпы контингентінің 56,1 пайызы (63269) мектепте, 43,8% пайызы (49474) онлайн режимде оқып жатыр.

- Қалалар мектептерінде қандай сыныптар қашықтан оқу жүйесіне көшті?

- Жақында облыстық бас санитар дәрігердің «Павлодар облысы аумағында шектеулі карантиндік шаралар туралы» №1 Қаулысында білім беру ұйымдарының үшінші тоқсанда жұмыс істеу ережелері көрсетілген. Онда: «600-ден жоғары оқушысы бар қала мектептері қашықтықтан оқыту форматына ауысады, 600-ге дейін оқушысы бар мектептер мен барлық ауыл мектептері штаттық режимде жұмыс істейді», - делінген. Бірақ, бала саны 600-ден асса болды деп оқушылардың барлығын онлайнға көшірген жоқпыз. Мектеп әкімшілігінің шешімі бойынша, 1-2-сынып оқушылары штаттық режимде қалды. Сонымен қатар, 3-5-сынып оқушылары үшін кезекші сыныптар ұйымдастыруға рұқсат етілген. Штаттық немесе кезекшілік тәртіппен оқитын сыныптарда санитарлық талаптарды қатаң сақтауы керек және «Бір сынып – бір кабинет» қағидасынан ауытқымауы шарт. Сонымен қатар, мектеп ішінде маскалық режимді сақтай отырып, сыныптарда күнде таңертең дезинфекциялау және ылғалдандыру жүргізіледі. Бұған мектеп әкімшілігі тікелей жауапты болады. Сол секілді мектептен тыс қосымша білім беру ұйымдарына штаттық режимде жұмыс істеуге рұқсат етілді. Бірақ, кабинетте 10 адамнан артық болмауы қажет. Ал балаларды оңалту орталықтарына 8 адамға дейін қабылдауға рұқсат етілген. Балабақшалар болса күшейтілген санитарлық нормаларды сақтай отырып, штаттық режимде жұмыс істейді.

- Онлайн оқуға көшкен оқушыларға компьютерлік техникалар беріле ме?

- Мұғалімдер өз сыныбындағы оқушылардың әлеуметтік жағдайына талдау жасап, алдымен аз қамтылған және көп балалы отбасылардың балалары компьютермен қамтылады. Бүгінгі күнге дейін 2773 балаға арнайы құралдар берілді.

- Қашықтан оқу барысында 11-сынып оқушы-ларының ҰБТ сынақтарына дайындығы ақсап қалмай ма?

- Әрине, ол жағын да ойлас-тырып отырмыз. Биылғы түлектерге жауапты мұғалімдер оқушыларға үй жағдайында да дайындалуға мүмкіндік тудыратын болады. Жалпы, қашықтан оқу жүйесі - біздің оқушылар үшін жат дүние емес. Бұған дейін де онлайн оқуға дағдыланған. Бұл - уақытша ғана шешім. Алдымызда төртінші тоқсан бар. Яғни, түлектердің ҰБТ сынағына дайындалуына мүмкіндік туады. Сондықтан, онлайн оқу режимі оқушылардың үлгеріміне кері әсерін тигізбейді деп ойлаймын.

- Коронавирусқа қарсы вакцина алған оқушылардың басқаларынан қандай артық-шылығы бар? Жалпы, қазіргі күні оқушылардың коронавирус инфекциясын жұқтыру деңгейі төмендеді ме?

- КВИ-ге қарсы вакцинаның толық компонентін алған оқушыларға мектепке бара беруіне болады. Оларға тосқауыл жоқ. Өзге сыныптастары секілді қашықтан оқуына да болады. Соңғы мәліметке сүйенсек, облыс бойынша 1000-ға жуық оқушы вакцинаның екі компонентін алған. Ал оқушылардың вирус жұқтыру көрсеткіші төмендемей тұр.

- Әңгімеңізге рахмет!

Сұхбаттасқан - Тілеуберді САХАБА.

Количество показов: 704

Возврат к списку