Қор қаражатына несие жабылмайды

СОҢҒЫ ЖАРИЯЛАНЫМДАР

Алтын аға
10:30 04.08.2022 615

Балабақшалар қалай бақыланады?
10:28 04.08.2022 628

Әнші арманы
09:57 02.08.2022 637

«Мектепке жол» акциясы басталды
09:54 02.08.2022 819

Жол жабылмайды
09:52 02.08.2022 622

Мәшһүр Жүсіп және Бекасыл хазірет
09:49 02.08.2022 651

Пәтер кезегін себепсіз жылжытқан
09:47 02.08.2022 632

Денсаулық пойызы келді
09:45 02.08.2022 650

04.08.2022

Қор қаражатына несие жабылмайды

«Қазақстан халқына» қоры қоғамның ұсыныстарын ескере отырып, өз жұмысының форматын өзгертпекші. Атаулы көмек көрсетуге бағытталған аталмыш қор төрағасы Болат Жәмішев кеше Павлодарға жұмыс сапарымен келді. Облыс орталығында қоғам өкілдерімен кездесіп, медицина, білім беру салаларына, көп балалы отбасыларға көмек беру мәселелері қозғалды.

Мемлекет басшысы Қасым-Жомарт Тоқаевтың бастамасымен «Қазақстан халқына» атты қоғамдық қор құрылғаны мәлім. Аталмыш қор атаулы көмек көрсету және даму бағдарламасын іске асыру бағытында жұмыс істейді. Бүгінде қордан көмек сұрағандардың ішінде аз қамтылған және көпбалалы отбасылар көп. Дегенмен, қор ең алдымен ерекше қажеттілігі бар балалардың аяққа тұрып кетуіне барынша ықпалдасуда. Бұл расында «Балалар жылы» қарсаңында қолға алынған игі шаралардың бірегейі. Бұл туралы облысқа жұмыс сапарымен келген «Қазақстан халқына» қоғамдық қорының төрағасы Болат Жәмішев айрықша атап өтіп, қордың жоба-жоспары, бағыты туралы кеңінен айтып берді. Достық үйінде өткен кездесуде өңірдің қоғам белсенділері өз ұсыныстарын білдіріп, қор басшылығына сұрақтарын қойып, мардымды жауап алды. Өтініштердің көпшілігі денсаулық сақтауды қолдауға, ерекше балалар мен мүгедек адамдарға көмек көрсетуге қатысты болды.

– Алдымыздағы айда біз азаматтық қоғам өкілдерін, қор донорларын, қазақстандық ірі кәсіпорындар мен кәсіпкерлерді, Үкімет мүшелерін, депутаттарды шақырумен үлкен онлайн-конференция өткізуді жоспарлап отырмыз. Осы конференцияда Қордың жаңа тұжырымдамасын, қайырымдылық бағдарламалар мен жобаларды бекіткіміз келеді. Сіздердің ұсыныстарыңызды есту біз үшін маңызды. Осы мақсатта өңірлерді аралаудамыз, – деді Болат Жәмішев. Сонымен қатар, төраға қордың бүгінгі жұмыс барысы және жаңа бастамалары жайлы баяндады. Оның айтуынша, келіп түскен өтініштердің барлығы жік-жікке бөлініп, саралап қаралады. Қоғамдық қордың ақшасына несие жабылмайды және той-томалаққа көмек сұрағандарға берілмейді. Атаулы көмек тек шын мұқтаж жандарға ғана көрсетіледі.

- Қор денсаулық сақтау саласына айрықша көңіл бөлмек. Туғаннан көру қабілетінен айрылған нәрестелердің еміне, тірек-қимыл аппараты зақымданған балаларға жәрдемдесудеміз. Бұдан өзге тамыр патологиясы бойынша сырқаттанған балалардың ата-аналарының өтінішін қуаттап отырмыз. Кейінгі жылдары аутизммен ауыратын балалар да көбейіп келеді. Сондықтан біз сегіз өңірде реабилитациялық орталық ашуды жоспарладық. Бізде медицина саласындағы тәжірибелі мамандар көптеген ауруды емдеуге қауқарлы. Сондықтан реабилитациялық орталықтарда қызмет көрсету сапасына Еуропа-дағы елдер секілді айрықша көңіл бөлгеніміз жөн, – деді ол. Бұдан бөлек, «Қазақстан халқына» қоғамдық қорының төрағасы қордың алдағы жоспар-жобалары мен бағдар-ламалары және атқарылған жұмыс ауқымы туралы баяндап берді.

– Қор ресми тіркелген күні-ақ өз жұмысын бастап кетті. Үкіметтік емес ұйымдармен кездесулер өткізіп тұрамыз. Елімізде 25 мыңнан астам үкіметтік емес ұйым болса, оның ішінде мыңға тарта ұйым бізбен белсенді түрде жұмыс істейді. Қазір біз ауылдық білім беруді қолдау жөніндегі тиімді жобаларды іздестірудеміз. Арнайы мектеп-интернаттарды жабдықтау бойынша жоба дайындап жатырмыз. Бұл бағдарлама 99 мектептен өтінім алды. Сондай-ақ, «100 спорт залы» бағдарламасын қаржыландыру басталды, – деді Болат Жәмішев. Жиын барысында облыс әкімінің бірінші орынбасары Олег Крук медицина саласын дамыту және ауылдық жердегі білім сапасын қала деңгейіне жеткізу мәселесін қаузап, қордың осы жұмыстарға араласқанына ризашылығын білдірді. Кездесу соңында облыс әкімдігі мен «Қазақстан халқына» қоры төрағасы өзара ынтымақтастық туралы меморандумға қол қойды.

Алтынбек МҰҚЫШЕВ.

Суреттерді түсірген - Есенжол Исабек.

Количество показов: 530

Возврат к списку