Пәтер тапшылығы байқалуда

СОҢҒЫ ЖАРИЯЛАНЫМДАР

19.05.2022

Пәтер тапшылығы байқалуда

Облыста жаңа пәтерлердің де, екінші нарықтағы үйлердің де тапшылығы байқалады. Тұрғындардың сұранысын өтеу үшін Павлодар қаласында жеке құрылыс компания-
лары «элиталық» үйлер салып жатыр. Алайда олардың басым бөлігінде тиісті рұқсатқағаздар жоқ.

Аймақ басшысы Әбілқайыр Сқақовтың төрағалығымен өткен аппараттық жиын барысында қалалардың бас жоспарларын, егжей-тегжейлі жоспарлау жобаларын дайындау мәселелері талқыланды. Облыстық сәулет және қала құрылысы басқар-масының басшысы Серік Әбдірахманов атап өткендей, бүгінгі күні тек Павлодар қаласының бас жоспары бар. Екібастұз қаласының әкімдігі, Ақсу басшылығы биыл ғана шаһардың жоспарын жасауға кірісті. Бұл жұмыстар жыл соңына дейін аяқталуы тиіс. Сол сияқты аталған екі қалада егжей-тегжейлі жоспарлау жұмыстары сылбыр жүргізілуде. Ал облыс орталығында жоспардың мұндай түрінің сегізі дайын. Сол арқылы қала билігі мен жеке инвесторлар бос жатқан аумақтарды, сол жердегі инфрақұрылымды кез келген уақытта көріп, соған сәйкес құрылыс жұмыстарын жоспарлай алады.

- Бұл қалаларда инженерлік-коммуникациялық желілерге қатысты мәліметтерді цифр-ландыруға қатысты көрсеткіш те төмен. Айталық, Екібастұзда ақпараттың 9,8 пайызы, Ақсу қаласында 12,7 пайызы ғана электронды форматқа аударылған. Салыстырмалы түрде қарар болсақ, облыс орталы-ғындағы бұл көрсеткіш 69,5 пайызды құрайды, - деді С.Әбдірахманов. Сонымен қатар, жекеменшік тұрғын үй құрылыстарына қатысты кемшіліктер бар. Үлескерлік қатысу арқылы бой көтеретін баспаналардың көп жағдайда тиісті рұқсатқағаздары жоқ. Тіпті, «Тұрғын үй құрылысы кезінде үлескерлік қатысу» туралы Заң талаптары сақталмай отыр. Оған дәлел – пәтерлерді броньдау келісімшартының қолданылуы. Сөйтіп, тұрғындар төлеген қаржы «көлеңкелі» экономикаға түседі. Ал оларға пәтерлердің уақытылы және сапалы салынарына ешкім кепілдік бермейді.

- Құрылыс компаниялары пәтер тапшылығын тудырып отырса, жергілікті әкімдіктер ақпарат тапшылығын қолдан жасап отыр. Себебі үлескер-лердің барлығы дерлік келісімшарт жасайтын компания туралы біле бермейді. Сондықтан алданып, ақшасынан айырылуы әбден мүмкін. Мұндай жағдай болмас үшін аудан-қала әкімдіктерінің ресми ресурстарында құрылысы жоспарланған тұрғын үйге, оны салатын мердігерге қатысты барлық ақпарат болуы тиіс. Тұрғындар жобалық-сметалық құжаттарды, рұқсатқағаздардың бар-жоғы туралы мәліметті білуі керек. Соған қарай, пәтер сатып алу туралы шешімді қабылдайды, - деді Ә.Сқақов.

Сондай-ақ, аймақ басшысы жиын соңында нақты құрылыстан айналып өтіп, кварталдық жобалауға көшу керек екенін айтты. Құрылыс алаңдарының орнын анықтау, нысандарды салу жұмыстарын жоспарлау шаралары жергілікті тұрғындармен, қауымдастықпен келісілуі керек.

Қ.ҚАБЫЛДЕНОВА.

Суретті түсірген - Валерий Бугаев.

Количество показов: 1248

Возврат к списку