«Рахметте» баға қалай түзіледі?

Азық-түлік өнімдері бағасының қолжетімді болуы қарапайым тұрғындарды алаңдататыны рас. Облыс әкімі Әбілқайыр Сқақов жауапты мекеме басшыларына Павлодардағы «Рахмет» базарына өнімдерді жеткізу жолын, олардың бағасының белгіленуін тексеру керектігін айтқан болатын. Осы орайда, аталған сауда орнына барып, өнім бағаларын бақылап қайттық.

Базар басшысы Гүлдана Нығыманованың айтуынша, мұнда әлеуметтік маңызы бар өнімдерден картоп, сәбіз, пияз және орамжапырақ көтерме сауда бағамен шаһардың түкпір-түкпіріне босатылады. «Павлодар» әлеуметтік-кәсіпкерлік корпорациясымен келісімшарт жасалған. Яғни, аталған ұйым арзан көкөністермен қамтамасыз етеді. Өнімдер базар арқылы әлеуметтік дүкендерге жол тартады. Бұл - тұрғындарға қолжетімді болуы үшін жасалған тетік. Десе де, әзірге базарда корпорация әкелген өнім жоқ. Картоп пен сәбіз Павлодар ауданындағы шаруа-лардан, орамжапырақ еліміздің оңтүстік өңірлерінен жеткізілуде. Пияз көбіне Жамбыл облысынан сатып алынады. Бірақ, соңғы жылдары жергілікті шаруалар да аталған көкөністі өсіруге машықтанып, ара-тұра базардан табылады. Қысқасы, аталған төрт өнім бойынша тапшылық жоқ, деп сендірді базар басшылығы. Картоптың көтерме бағасы келісіне – 160 теңге. Бөлшек саудадағы бағасы - 170 теңге. Сәбіз 115 (120-125 теңге) теңгеден, орамжапырақ 280 (300) теңгеден, пияз 80 (90) теңгеден босатылуда. Базарда қияр және қызанақ сатумен 3-4 кәсіпкер айналысады. Олармен әңгімелескенімізде, аталған өнімдердің тапшылығы байқалатынын жасырмады. Жеке кәсіпкер Бағдат Ерғабулова Екібастұз қаласындағы жылыжаймен келісімшартқа отырған. Бірақ апта сайын жіберілетін өнім жеткіліксіз.

- 3 қаңтарда 1 тонна 98 кг тонна қияр әкелінді. Бұл шамамен 100 қорап қана. Ал 13 қаңтарда 983 келі жеткізілді. Негізінде сұранысқа сай әр апта сайын 5 тонна қияр сатылуы керек. Енді бағаға тоқталсақ. Жылыжайдан әкелінетін өнімнің тасымалдау құнын өзім төлеймін. Осылайша, қиярдың 1 келісін 810 теңгеден аламын. Көкөністі базардағы дүңгіршек иелеріне 880 теңгеден босатамын. Ал олар 950 теңгеден саудалауда. Жалпы, қияр мен қызанақ бағасының шарықтауы жыл басында ғана тіркеледі. Жылда қайталанатын жағдай бұл. Жылыжайдан көкөніс арзан бағамен босатылса, бізден де арзан бағамен тұрғындарға жол тартатын еді. Әкімдік мұны назарға алса екен, - дейді Бағдат Ерғабулова. Жергілікті кәсіпкерлер Ақмола облысының Степногорск қаласындағы жылыжай басшылығымен де байланыс орнатқан. Өткен айда ол жақтан қиярдың 1 келісі 850 теңгеден жеткізіліпті. Ақпан айынан бастап жергілікті нарықты Ақсу қаласындағы жылыжай көкөніспен қамтамасыз етеді деп күтілуде. Екібастұздықтар да апта сайын 5 тонна өнім жіберуге ниеттенуде. Базардағы сатушылар өнім мол әкелінсе, көкөніс бағасы біршама арзандайтынына сендіруде.

Оралхан ҚОЖАНОВ.

Количество показов: 258

Возврат к списку

Сарыарқа самалы, 20 қаңтар, бейсенбі

Раздел не найден.