Рекордтық көрсеткіш!

Соңғы жылдары кеншілер шаһарында тұрғын үй құрылысы қарқынды дамып келеді. Оған өткен жылы 69 мың шаршы метр баспананың пайдалануға берілуі дәлел. Бұрын-соңды Екібастұз өңірінде осындай көлемдегі пәтер ел игілігіне берілген емес. Жергілікті билік қарқынды одан әрі үдетіп, алдағы уақытта 20-ға жуық көпқабатты үйді салуды жоспарлап отыр.

Екібастұз қаласының тұрғыны Гүлмира Асқарова жаңа пәтер кілтін қолға алар сәтті 8 жыл күтті. Тұрғын үй кезегі жеткенге дейін баспана жалдап тұруға тура келді. Ал өткен жылы көптен күткен арманы орындалып, жалғызбасты әрі көпбалалы ана жайлы үйге қоныстанды.
- Пәтерден пәтерге көшіп, үй иесінің қас-қабағына қарайлау оңай емес. Оған қоса, арқасүйер азаматым жоқ, тұңғышым денсаулығына байланысты мүгедектік алды. «Нұрлы жер» бағдарламасы аясында баспаналы болғанымда арқамнан ауыр жүк түскендей болды. Баспана мәсе-лесіне бас қатырмай, балаларыммен алаңсыз өмір сүруге мүмкіндік жасалды. Осындай жағдайды қарастырған әкімдікке, кең пәтерді салып берген құрылысшыларға ризашылығымды білдіремін, - дейді Г.Асқарова.

Былтыр баспаналы болып, қуанышқа бөленген Гүлмира Асқарованың отбасы ғана емес. Кеншілер шаһарында 646 отбасыға мемлекет тарапынан жалдамалы пәтерлер берілді. Атап айтқанда, 132 көп балалы отбасы, ата-анасынан айырылған 123 жас, 83 бюджеттік қызметкер мен әлеуметтік осал топтардың қатарына кіретін 308 адам баспаналы болды.

Жалпы, өткен жылы бұл өңірде 1007 пәтері бар 13 тұрғын үй пайдалануға берілді. Барлығы 69 мың шаршы метр баспана салынды. Оның 10 мың шаршы метрі - жеке үйлер. Бұл – рекордтық көрсеткіш. Осы уақытқа дейін Екібастұз аумағында осындай көлемдегі тұрғын үй құрылысы қолға алынған емес.
Бұл ретте қала іргесіндегі Солнечный кентіне көп көңіл бөлінгенін бөле-жара атап өткен жөн. Соңғы 30 жыл аралығында мұнда бірталай пәтер бос қалып қойған еді. Баспаналарды сатып алушылардың қарасы көрінбеген соң үй иелеріне пәтерлерін қаңыратып қалдырып кетуге тура келді. Ал бұл ретте кентте 200-ден астам адам өз үйіне қол жеткізе алмай, бірнеше жыл бойы пәтер кезегінде тұрды.
Тек өткен жылы тұрғын үйлерді қалпына келтіру жұмыс-тарының нәтижесінде кезек күткен 160 отбасы қоныс тойын тойлады. Олардың қатарында Ибрагим Мүсәріпов бар.

- Мен 2014 жылы отбасыммен бірге жұмыс бабымен Солнечный кентіне қоныс аудардым. Сол уақыттан бері, яғни бес жыл бойы пәтер жалдап тұрдық. Былтыр ғана кезегіміз келіп, үш бөлмелі үй алдық, - дейді И.Мүсәріпов.
Мемлекеттік қолдаудың нәтижесінде кенттегі 144 пәтер жаңартылды. Бұл бағыттағы жұмыс алдағы уақытта жалғасын таппақ. Соның есебінен кенттегі тұрғындар саны көбеюі әбден мүмкін. Қазір Солнечныйда 6 мыңға жуық адам тұрады. Олардың басым бөлігі жергілік-
ті электр станциясында еңбек етеді.

Екібастұз қаласының әкімі Ардақ Қаңтарбаевтың айтуынша, кеншілер шаһарында былтыр құрылысы аяқталған алты үй дайын тұр. Бұл баспаналар шоғырланған №9 шағын ауданда осы көктемде абаттандыру жұмыстары жүргізілген соң тағы 432 пәтер екібастұздықтардың игілігіне беріледі.
- Биыл 8 көпқабатты баспананың құрылысын бастау жоспарда бар. Оның төртеуінің құрылысына қажет қаржы қарас-тырылды. Тағы төрт үйді тұрғызу үшін облыстық, республикалық бюджеттен қаражат бөлуді сұрадық. Бес қабатты 7 үйдің жобалық-сметалық құжаттама-
сын дайындалуда. Қаржылан-
дыру мәселелері оң шешімін тапса, барлығы 15 баспана салынып, 1015 отбасы үй ала алады. Одан бөлек, көпбалалы отбасыларға, әлеуметтік осал топ өкілдеріне 84 пәтер сатып алу үшін 716 млн. теңге бөлінді, - деді А.Қаңтарбаев.
Екібастұз қаласын дамыту тұжырымдамасы аясында алдағы үш жылда 3,5 мың отбасыға арналып 213 мың шаршы метр тұрғын үй салынбақ. Сол арқылы пәтер кезегін 42 пайызға дейін қысқарту көзделіп отыр.

Құндыз ҚАБЫЛДЕНОВА.

Количество показов: 333

Возврат к списку