Шәкірттері шыңға шыққан

Облыс орталығындағы «Баянтау» спорт сарайында еркін күрестен КСРО-ның спорт шебері, ҚР құрметті спорт қайраткері, Павлодар қаласының Құрметті азаматы Амангелді Аймағамбетовтің құрметіне арналған еркін күрестен XVI дәстүрлі турнир өтті.

Оралхан ҚОЖАНОВ

2008 жылы туған және одан кіші ұл-қыздардың арасында ұйымдастырылған жарысқа 300-ге жуық бала қатысты. Ашық турнир деп хабарланғандықтан, Ақмола және Шығыс Қазақстан облыстарының жас жеткіншектері де келіпті. Аталған турнир былтыр дүрілдеп өту керек еді. Себебі, Амангелді Сапарғалиұлы 80 жасқа толған болатын. Карантиндік шектеулердің салдарынан дәстүрлі жарыс биыл ұйымдастырылды. Қуантарлығы, ел Тәуелсіздігінің 30 жылдығымен тұспа-тұс келіп отыр. Турнирдің ашылу салтанатына облыстың туризмді және спортты дамыту жөніндегі басқарма басшысы Дәуір Ерғабұлов, Павлодар қаласы әкімінің орынбасары Светлана Гладышева, «Nur Otan» партиясы облыстық филиалы төрағасының бірінші орынбасары Илья Теренченко қатысып, ізгі лебіздерін білдірді. Мерейтой иесіне шапан жауып, бағалы сыйлықтарын табыстады. Амангелді Аймағамбетовтің шәкірттері де сөз алып, өңірдің спорт саласына қосқан еңбегін атап өтті.

- Амангелді ағамызға қарап бой түзедік. Спортта ғана емес, өмірде де ақыл-кеңестері кәдеге жарап жатты. Бүгінде шәкірттері еліміздің түкпір-түкпірінде ұстаз салған сара жолмен жүріп келеді. Жыл сайын дәстүрге айналған турнир балалар арасында салауатты өмір салтын насихаттауға зор үлес қосып келеді. Ағамыз 100-ге келіп, мерейтойлық турнирді ұйымдастыруды талқылап отыруға жазсын, - деді шәкірттері атынан сөз алған Нәдір Әділханов. Қос кілемде қатар белдескен жас балуандар екі күн бойы кіл мықтыны анықтады. Кейбір кездесулер таза жеңіспен небары 1 минуттың ішінде аяқталса, кейбір белдесулерде соңғы минутқа дейін жеңімпазды анықтау қиынға соқты. Әсіресе, финалдық кездесулер тартысты өтті. Нәтижесінде өз салмақ дәрежелерінде жарыстың жеңімпазы болып Ерсұлтан Ертай (Павлодар ауданы), Тамерлан Ашенов (Ақмола облысы), Захар Шуяков (Тереңкөл ауданы), Икрам Қожахан (Тереңкөл ауданы), Әлинұр Қанатов (Ертіс ауданы), Хамзат Сарбөпеев (Павлодар қаласы), Марсель Кочканбаев (Павлодар қаласы), Даниил Степанюк (Солнечный кенті), Фархат Оразалиев (Ертіс ауданы), Айқын Қаскин (Екібастұз қаласы), Данияр Дарханұлы (Шығыс Қазақстан облысы), Еламан Серікбаев (Екібастұз қаласы), Кемел Қажтай (Павлодар қаласы), Вероника Чепурнова (Павлодар ауданы), Инабат Серікбай (Ақсу қаласы), Злата Радионова (Павлодар ауданы), Муслима Абылай (Ақмола облысы), Фариза Хасенова (Шығыс Қазақстан облысы) танылды.

Количество показов: 691

Возврат к списку